ព្រះនាង ជេនណា បកស្រាយចម្រៀងជាមួយតារាចម្រៀងជើងចាស់ Jiang Yuheng លើឆាកតន្ត្រីដ៏ធំនៅចិន

ព្រះនាង នរោត្តម ជេនណា ត្រូវបានអញ្ជើញជាភ្ញៀវពិសេសក្នុងការបកស្រាយចម្រៀងជាមួយសិល្បកររៀមច្បង ជាំង យូហេង (Jiang Yuheng) នៅក្នុងការប្រគំតន្ត្រីផ្ទាល់ខ្លួនរបស់លោកនៅកីឡដ្ឋានអូឡាំពិក Ningbo នៅឯប្រទេសចិន។

កាលពីថ្ងៃទី ២៦ ខែ មិថុនា កន្លងទៅ ព្រះនាង នរោត្តម ជេនណា បានបង្ហាញវត្តមានក្នុងនាមជាភ្ញៀវពិសេសក្នុងការប្រគំតន្ត្រីរបស់សិល្បករជើងចាស់ ជាំង យូហេង។ នាឱកាសដ៏ពិសេសនេះព្រះនាងបានបកស្រាយចម្រៀងរួមគ្នា ១ បទជាមួយតារាប្រុសជើចាស់ Jiang Yuheng និងចម្រៀង ២ បទផ្សេងទៀតនៅលើឆាកដ៏ធំដោយមានសំឡេងហ៊ោពីអ្នកគាំទ្ររាប់ពាន់នាក់។ ព្រះនាង ជេនណា បានឱ្យដឹងថាការប្រគំតន្ត្រីនាលើកនេះគឺជាការសម្ដែងដ៏ធំលើកដំបូងរបស់ទ្រង់នៅក្រៅប្រទេស រីឯទិដ្ឋភាពនិងអនុស្សាវរីយ៍មួយនេះទ្រង់នឹងចងចាំទុកពុំមានថ្ងៃភ្លេចនោះទេ។

ក្រោយការសម្ដែងបានបញ្ចប់ព្រះនាង ជេនណា បានថ្លែងអំណរគុណយ៉ាងជ្រាលជ្រៅចំពោះលោក Jiang Yuheng ព្រមទាំងក្រុមការងារទាំងអស់សម្រាប់ការផ្ដល់ឱកាស និងការស្វាគមន៍យ៉ាងកក់ក្ដៅចំពោះទ្រង់។ បន្ថែមពីនេះ ទ្រង់សង្ឃឹមយ៉ាងមុតមាំផងដែរថានឹងមានឱកាសពិសេសបែបនេះនាពេលអនាគត៕