ពលរដ្ឋប្រទះឃើញប្រាសាទចំណាស់មួយ កណ្ដាលព្រៃក្រោយចម្ការអ្នកភូមិ

ប្រាសាទចំណាស់មួយត្រូវបានពលរដ្ឋក្នុងខេត្តសៀមរាបប្រទះឃើញនៅទីតាំងមួយក្រោយចម្ការអ្នកភូមិ។ ប្រាសាទបុរាណមួយនេះធ្លាប់ត្រូវបានអ្នកភូមិជូនដំណឹងទៅខាងអាជ្ញាធរអប្សរា និងបានមកពិនិត្យម្ដងហើយ។

តាមរយៈសម្រង់សម្ដីរបស់លោក Samnang Norn ម្ចាស់អាខោនដែលបានបង្ហោះរូបភាពច្រើនសន្លឹកពីប្រាសាទបុរាណដែលអ្នកភូមិបានប្រទះឃើញខាងក្រោយចម្ការរបស់ពួកគេបានប្រាប់ឱ្យដឹងថា ក្រោយលោកទទួលបានដំណឹងពីអ្នកភូមិថាបានឃើញប្រាសាទចំណាស់មួយក្រោយចម្ការលោកក៏បានទៅដល់ទីតាំងផ្ទាល់និងបានថតទាំងរូបភាពនិងវីដេអូដើម្បីចែកចាយលើបណ្ដាញសង្គម។

តាមរយៈការបង្ហោះរបស់លោកបានសរសេររៀបរាប់បែបនេះថា៖ «ពួកយើងបានប្រទះប្រាសាទដ៏កម្សត់មួយលាក់ខ្លួនក្រោយចម្ការអ្នកភូមិ ពុំមានអ្នកដឹងថតបង្ហាញទេ។ នេះជាប្រភេទប្រាសាទទោល (ប្រាង្គតែមួយ) សង់ពីឥដ្ឋបែរទៅទិសខាងកើត ខូចខាតផ្នែកកំពូលបន្តិច ឥដ្ឋនៃប្រាង្គខាងក្រៅរបះធ្លាក់ច្រើន ដោយសារឫសដើមជ្រៃចាក់រុំព័ទ្ធ ប៉ុន្តែខាងក្នុងនៅស្អាត។ បំណែកផ្តែរនិងត្របកផ្កាឈូកនៃកំពូលមិនបាត់បង់ទេ ផ្នែកផ្សេងមិនឃើញដោយសារព្រៃដុះក្រាស់ពេកពិបាកពិនិត្យមើល»។ ប្រាសាទនេះមានចម្ងាយពីផ្លូវប្រហែល៥០០ម៉ែត្រ ស្ថិតនៅភូមិអូររូង ឃុំតាសៀម ស្រុកស្វាយលើ ខេត្តសៀមរាប។

បន្ថែមពីនេះលោកក៏បានប្រាប់ឱ្យដឹងថា៖ «ខ្ញុំមិនបានជូនដំណឹងទៅអាជ្ញាធរទេដោយសារតែម្ចាស់ផ្ទះក្បែរនោះបានប្រាប់ខាងអប្សរាធ្លាប់មកទីនេះម្ដងមកហើយ អ្នកចម្ការក្បែរនោះសុទ្ធតែបានដឹងប៉ុន្តែមិនបានថតបង្ហាញទើបមិនសូវមានអ្នកស្គាល់»។

ខាងក្រោមនេះជារូបភាពដែលថតបានពីប្រាសាទចំណាស់ដែលពលរដ្ឋបានប្រទះឃើញ៖