Sai និងបុគ្គលល្បីច្រើនរូបត្រៀមចូលរួមព្រឹត្តិការណ៍ Preah Vihear Temple Run 2025 អបអរខួប ១៧ ឆ្នាំប្រាសាទព្រះវិហារបានចូលបញ្ជីបេតិកភណ្ឌពិភពលោក

តារាចម្រៀង Sai ព្រមទាំងបុគ្គលល្បីជាច្រើនរូបកំពុងត្រៀមខ្លួនចូលរួមព្រឹត្តិការណ៍រត់ឆ្លងកាត់ឧបសគ្គ Preah Vihear Temple Run 2025 ដែលនឹងរៀបចំឡើងនៅថ្ងៃទី៦ ខែកក្កដា ខាងមុខ ក្នុងឱកាសអបអរសាទរខួប ១៧ ឆ្នាំនៃការចុះប្រាសាទព្រះវិហារក្នុងបញ្ជីបេតិកភណ្ឌពិភពលោក។

ព្រឹត្តិការណ៍រត់ ឆ្លងកាត់ឧបសគ្គ Preah Vihear Temple Run លើកទី៣ ជាព្រឹត្តិការណ៍ដែល សហការរៀបចំដោយក្រុមការងារ RUN WITH SAI ជាមួយអាជ្ញាធរជាតិព្រះវិហារ និងសហការគាំទ្រដោយ ក្រសួងវប្បធម៌ និងវិចិត្រសិល្ប:រដ្ឋបាលខេត្តព្រះវិហារ សហភាពសហព័ន្ធយុវជនកម្ពុជា។

ព្រឹត្តិការណ៍រត់នេះដែរត្រូវបានរៀបចំក្នុងគោលបំណងដើម្បីស្វាគមន៍កីឡាកររត់ប្រណាំងជាតិ និងអន្តរជាតិ ទៅចូលរួមរត់នៅព្រះវិហារដើម្បីទទួលបាននូវបទពិសោធន៍នៃការរត់ឆ្លងកាត់ឧបសគ្គទៅកាន់សំណង់ស្ថាបត្យកម្មសម្បត្តិបេតិកភណ្ឌពិភពលោកដ៏មហិមា គឺរមណីយដ្ឋានប្រាសាទព្រះវិហារ ដែលជាបេតិកភណ្ឌ ស្ថិតក្នុងចំណោមសម្បត្តិបេតិកភណ្ឌពិភពលោក មានសំណង់ស្ថាបត្យកម្មដ៏អស្ចារ្យ គួរឱ្យស្ញប់ស្ញែងនៅក្នុងតំបន់ និងពិភពលោក។

ជាពិសេសការរត់ឆ្លងកាត់ តាមបណ្តោយផ្លូវបុរាណ អមដោយហេដ្ឋារចនាសម្ព័ន្ធបុរាណនៃប្រាសាទ ដើម្បីអបអរសាទរខួបលើកទី១៧ នៃការចុះបញ្ជីប្រាសាទព្រះវិហារក្នុងបញ្ជីបេតិកភណ្ឌពិភពលោក (៧ កក្កដា ២០០៨-៧ កក្កដា ២០២៥)។

អមជាមួយគ្នានោះ ព្រឹត្តិការណ៍ទាំងមូលក៏រួមមានកម្មវិធីទស្សនីយភាព ការសម្តែងរបាំប្រពៃណី ឧបករណ៍ប្រពៃណីខ្មែរ និងរបាំប្រចាំតំបន់នៅប្រាសាទព្រះវិហារ ដើម្បីស្វាគមន៍ដល់កីឡាករ កីឡាការិនី ទាំងអស់ដែលរត់ដល់ទីបានជោគជ័យ ក៏ដូចជាការផ្តល់នូវអនុស្សាវរីយ៍ និងការចងចាំដ៏ល្អរួមគ្នា នៅលើប្រាសាទព្រះវិហារ ដ៏ពិសិដ្ឋមួយនេះដែរ។