ស៊ីន យូប៊ីន សុខចិត្តបោះបង់ ៣ កម្មវិធីនៅក្រៅប្រទេសដោយមិនសោកស្តាយ

កំពូលតារាសម្ដែងស្រីឆ្នើមលំដាប់ប្រទេស កញ្ញា ស៊ីន យូប៊ីន បានបង្ហាញខ្លួនយ៉ាងស្រស់ស្អាតលើកម្រាលព្រំក្រហមនៃមហោស្រពភាពយន្តកម្ពុជា-អាស៊ី លើកទី៣ (3rd Cambodia Asian Film Festival) កាលពីល្ងាចថ្ងៃ៦ ខែកញ្ញា ឆ្នាំ ២០២៥ នៅបុរីកោះពេជ្រ ដោយមានការចូលរួមពីសំណាក់ថ្នាក់ដឹកនាំក្រសួងពាក់ព័ន្ធ ព្រមទាំងផលិតករភាពយន្ត សិល្បករ និងភ្ញៀវកិត្តិយសជាតិ ព្រមទាំងអន្តរជាតិជាង ៥០០ នាក់។

កម្មវិធីមហោស្រពកម្ពុជាអាស៊ីលើកទី៣ បានប្រកាស ស៊ីន យូប៊ីន ជាទូតសុឆន្ទៈជាមួយតារាហុងកុងដ៏ល្បីឈ្មោះ Samantha Ko។ រឹតតែពិសេស យូប៊ីន បានបង្ហាញការសម្ដែងដ៏អស្ចារ្យមួយ ជាទម្រង់សិល្បៈបង្កើតថ្មី ភ្ជាប់ជាមួយបច្ចេកវិទ្យាទំនើប Ai មកបង្ហាញជូនថ្នាក់ដឹកនាំក្រសួងពាក់ព័ន្ធ និងអង្គពិធីទាំងមូល។

យូប៊ីន បានឲ្យដឹងថានាងមានមោទនភាព និងរំភើបចំពោះតំណែងទូតសុឆន្ទៈមហោស្រពកម្ពុជាអាស៊ី លើកទី៣ ហើយរឹតតែរំភើបខ្លាំង គឺកម្ពុជាមានឱកាសធ្វើជាម្ចាស់ផ្ទះរៀបចំមហោស្រពភាពយន្តកម្ពុជា-អាស៊ី ជាថ្មីម្ដងទៀត។ នេះបញ្ជាក់ឲ្យឃើញពីភាពវិជ្ជមាននៃវិស័យភាពយន្តខ្មែរដែលកំពុងបញ្ជ្រាបខ្លួនចូលទៅទីផ្សារអន្តជាតិម្ដងបន្តិចៗ។ ម៉្យាងក៏ប្រាប់ដល់ពិភពលោកថា កម្ពុជាមានសុវត្ថិភាពពេញលេញ ប្រកបដោយស្នាមញញឹម ភាពរួសរាយរាក់ទាក់ ត្រៀមទទួលស្វាគមន៍ភ្ញៀវជាតិ-អន្តរជាតិដែលមានបំណងធ្វើដំណើរមក។ តារាសម្ដែងស្រីវ័យ ២៩ ឆ្នាំរូបនេះក៏ទទួលបានវិញ្ញាបនបត្រមួយបញ្ជាក់ពីតំណែងជាទូតសុឆន្ទៈនៃ 3rd Cambodia Asian Film Festival ផងដែរ។

ងាកមកពាក់ព័ន្ធនឹងការងារក្រៅប្រទេសវិញ យូប៊ីន បានបញ្ជាក់ថា មកទល់ពេលនេះនាងលុបចោល ៣ កម្មវិធីហើយ គិតចាប់តាំងពីថ្ងៃទី ១ ខែសីហា ឆ្នាំ ២០២៥ មកទល់ពេលនេះ។ នោះមានន័យថានាងសល់តែ Event ប៉ុណ្ណោះនៅបរទេស តែកញ្ញាក៏កំពុងពិចារណាថាគួរទៅ ឬក៏អត់ដែរ ព្រោះបើទ យូប៊ីន ត្រូវគិតលើផលចំណេញណាដល់ជាតិដែរ។ នាងបានសម្រេចចិត្តបោះបង់ចោលការងារក្រៅស្រុកមួយចំនួនដោយមិនសោកស្ដាយប្រាក់កម្រៃទទួលបានពីការងារទាំងនោះឡើយ។

យូប៊ីន កំពុងពិចារណាគម្រោងការងារក្រៅស្រុកធំមួយយ៉ាងល្អិតល្អន់ថា គួរទៅចូលរួម ឬក៏អត់? ព្រោះនាងត្រូវជ្រើសរើសការងារណាមួយណាផ្ដល់ផលចំណេញដល់មុខមាត់ប្រទេសជាតិ ស្របពេលដែលប្រទេសយើងកំពុងត្រូវការការសាមគ្គីជាធ្លុងមួយនៅក្នុងស្រុក។

មួយវិញទៀតវានាងតួឯកស្រីដ៏ល្បីរូបនេះចង់សម្រាកឲ្យបានច្រើន ដោយសារមួយរយៈមុនផ្លូវចិត្តរបស់នាងប៉ះទង្គិចខ្លាំងដែរ តែកញ្ញាមិនបានខឹងស្អប់ការរិះគន់ទាំងនោះឡើយ ព្រោះយើងតែម្នាក់មិនអាចល្អគ្រប់គ្រាន់តាមការចង់បានរបស់មនុស្សគ្រប់គ្នាឡើយ។
ស៊ីន យូប៊ីន តារាស្រីដែលចូលចិត្តបង្ហាញទង្វើច្រើនជាងពាក្យសម្តី អ្វីដែលសំខាន់បំផុតចំពោះនាងតាំងពីដើមរហូតមកទល់ពេលនេះ គឺការការពារ និងការបង្ហាញឲ្យពិភពលោកឃើញពីអត្តសញ្ញាណជាតិខ្មែរទោះបីស្ថិតក្នុងកាលៈទេសៈណាឡើយ៕