ពិតជាស័ក្តិសម! សូរ ពេជ្រវលក្ខណ៍ ក្លាយជាម្ចាស់មកុដ Miss International Cambodia 2025

ក្រុមហ៊ុន Cambodia International Models បានប្រកាសពីម្ចាស់មកុដ Miss International Cambodia 2025 ជាតំណាងឲ្យកម្ពុជាចូលរួមក្នុងការប្រកួត Miss International 2025 នៅប្រទេសជប៉ុននាពេលខាងមុខនេះ គឺកញ្ញា សូរ ពេជ្រវលក្ខណ៍។

បន្ទាប់ពីខកខានមួយរយៈក្នុងកម្មវិធីប្រកួតប្រជែងសម្រស់ ពេលនេះ សូរ ពេជ្រវលក្ខណ៍ បានវិលមករកវេទិកាប្រកួតប្រជែងសម្រស់សាជាថ្មីហើយ។ លក្ខណ៍ គឺជាបវរកញ្ញាខ្មែរដែលមានទាំងរូបសម្រស់ ចំណេះដឹង កម្ពស់ ព្រមទាំងបទពិសោធន៍ច្រើនក្នុងអាជីព ហើយកញ្ញាក៏ជាបេក្ខភាពធ្លាប់តំណាងឲ្យកម្ពុជាលើឆាកអន្តរជាតិកន្លងមកដែរ។

លោក ម៉ែន និមលរ័ត្ន ធ្លាប់បង្ហើបខ្លះៗរួចមកហើយថា ម្ចាស់មកុដ Miss International Cambodia ឆ្នាំនេះជាបេក្ខភាពធ្លាប់ចេញទៅប្រកួតនៅក្រៅប្រទេសម្ដងរួចមកហើយ។ មិនតែប៉ុណ្ណោះកញ្ញា ក៏ជាស្ត្រីលេចធ្លោ ក្នុងការចូលរួមរៃអង្គាសថវិកា ដើម្បីទៅជួយដល់វីរកងទ័ពខ្មែរ ដែលបានការពារទឹកដីពីការឈ្លានពានរបស់សត្រូវ។

ជាបវរកញ្ញាលេចធ្លោមួយរូបរបស់កម្ពុជា ហើយធ្លាប់ចេញទៅប្រកួតនៅឆាកអន្តរជាតិទៀតនោះ ពិតណាស់ ថារូបសម្បត្តិ វលក្ខណ៍ ច្បាស់ជាស្រស់ស្អាតខ្លាំងណាស់ហើយ។ តែនោះមិនមែនជាកត្តាតែម្យ៉ាងអាចឲ្យនាង ដណ្ដើមបានមកុដទៀតឡើយ ចំណុចអស្ចារ្យ គឺថានាងមានរូបឆោមលោមពណ៌បែបខ្មែរ វង្សភក្ត្រស្រទន់ ញញឹមមានមន្តស្នេហ៍។

ចំណុចពិសេសម្យ៉ាងទៀត ពេលនាងឡើងបញ្ចេញមតិជាសាធារណ មិនថាភាសាខ្មែរ ឬភាសាបរទេសឡើយ សំឡេងនាងពីរោះ ទាក់ទាញចំណាប់អារម្មណ៍អ្នកស្ដាប់។

គួរបញ្ជាក់ថា សូរ ពេជ្រវលក្ខណ៍ ជាម្ចាស់មកុដ Miss Aura Cambodia 2023 ហើយចេញទៅប្រកួត Miss Aura international 2023 នៅប្រទេសតួកគី និងធ្លាប់ទទួលបានថ្នាក់លំដាប់រងលេខ២ MISS MERA កាលពីឆ្នាំ ២០២៤។ ថ្មីៗនេះកញ្ញាក៏បានប្រឡូកក្នុងវិស័យភាពយន្ត «កូនក្រមុំតៃហោង – Die with me» នឹងចាក់បញ្ចាំងនាខែក្រោយ៕