ថ្មីៗនេះសមាគមឧស្សាហកម្មថតសំឡេងអូស្ត្រាលី (ARIA) បានចេញវិធានការថ្មីដោយហាមឃាត់បទចម្រៀងដែលបង្កើតឡើងដោយបច្ចេកវិទ្យាបញ្ញាសិប្បនិម្មិត (AI) មិនថាការប្រើប្រាស់ AI ទាំងស្រុង ឬភាគច្រើន មិនឱ្យមានសិទ្ធិចូលរួមក្នុងតារាងចម្រៀងល្បីៗរបស់ប្រទេសឡើយ។

ARIA បានបញ្ជាក់ថារាល់ស្នាដៃតន្ត្រីទាំងអស់ត្រូវតែបង្កើតឡើងដោយមនុស្សជាចម្បង ដើម្បីលើកកម្ពស់សិល្បៈពិតប្រាកដរបស់អ្នកនិពន្ធ និងអ្នកចម្រៀង។ ការសម្រេចចិត្តនេះកើតឡើងបន្ទាប់ពីមានការជជែកដេញដោលយ៉ាងក្តៅគគុកជុំវិញបទចម្រៀង Cover “Like A Prayer” របស់ Madonna ដែលផលិតឡើងវិញដោយ DJ ជនជាតិអូស្ត្រាលី Josh Fawaz។ បទនេះបានហក់ឡើងដល់លេខ ១ ក្នុងតារាង ARIA Dance Singles និងឈរនៅលេខ ២ ក្នុងតារាងចម្រៀងសរុបទូទាំងប្រទេសដោយមានការស្ដាប់ (streaming) លើ Spotify រហូតជាង ៤៨ លានដង។ ទោះជាយ៉ាងណា Fawaz ទើបតែបន្ថែម Credit ដល់ AI ក្រោយពេលមានប្រតិកម្មប្រឆាំងពីសាធារណជន។

យោងតាម BBC News មុនមានការប្រកាសរបស់ប្រទេសអូស្ត្រាលី កាលពីខែមករា ឆ្នាំ២០២៦ ប្រទេសស៊ុយអែតបានក្លាយជាប្រទេសទីមួយបានហាមឃាត់បទចម្រៀង AI រួចទៅហើយ ខណៈដែលសហព័ន្ធអន្តរជាតិនៃឧស្សាហកម្មហ្វូណូក្រាម (IFPI) ក៏កំពុងរៀបចំដាក់ចេញនូវគោលការណ៍ណែនាំ AI សម្រាប់តារាងចម្រៀងនៅអាមេរិកឡាទីន មជ្ឈិមបូព៌ា អាហ្វ្រិក និងអាស៊ីអាគ្នេយ៍ផងដែរ។

ចំណាត់ការនេះទទួលបានការគាំទ្រយ៉ាងខ្លាំងពីសិល្បករអូស្ត្រាលីដោយពួកគេបានលើកឡើងថា AI កំពុងតែដកហូតបទពិសោធន៍របស់មនុស្សចេញពីជីវិតពិត។ ជាមួយគ្នានេះដែរនាយករដ្ឋមន្ត្រីអូស្ត្រាលី Anthony Albanese បានសន្យាថានឹងផ្តល់ការការពារផ្នែកច្បាប់យ៉ាងរឹងមាំដល់អ្នកផលិតតន្ដ្រី និងបទចម្រៀង ដោយបានបញ្ជាក់យ៉ាងច្បាស់ថា ការយកស្នាដៃរបស់សិល្បករទៅហ្វឹកហ្វឺន AI ដោយគ្មានការអនុញ្ញាត ឬគ្មានការទូទាត់សំណងគឺជា “អំពើចោរកម្ម”៕