គ្រូមួយថ្ងៃ គ្រូមួយជីវិត! លោកស្រី សុភា បុត្រឈរ ជូនប្រាក់ ១៨ ម៉ឺនដុល្លារ ដល់គ្រូ១៨នាក់ដែលធ្លាប់បង្រៀនកាលពីក្មេង

ដូចពាក្យដែលគេតែងនិយាយ គ្រូមួយថ្ងៃគ្រូមួយជិវិត គឺមនខុសពិតមែន។ ជាក់ស្ដែង លោកស្រី សុភា បុត្រឈរ ទោះជាទៅដល់ទីណាក៏មិនដែលភ្លេចគ្រូបង្រៀនដែលធ្លាប់បង្រៀនលោកស្រីកន្លងមកនោះទេ។

ថ្មីៗនេះ ក្រុមការងារលោកស្រី សុភា បានចុះទៅខេត្តកំពង់ធំ ដែលជាទីកន្លែងកំណើតក្រោយពីទទួលបានដំណឹងថាលោកគ្រូ អ្នកគ្រូដែលធ្លាប់បង្រៀនខ្លួនមានជំងឺ។ ដោយការចុះទៅសួរសុខទុក្ខផ្ទាល់នេះ ក្រុមគ្រួសារឧកញ៉ា ណូ សុភា ក៏មានបានឧបត្ថម្ថវិកាបន្ដិចបន្ដួចដើម្បីទុកឱ្យលោកគ្រូ អ្នកគ្រូ គ្រាន់ដោះស្រាយជីវភាព និងព្យាបាលជំងឺផងដែរ។ ដោយក្នុងនោះ អ្នកគ្រូ លោកគ្រូ ១៨នាក់ ទទួលបានម្នាក់ ១ម៉ឺនដុល្លារ សរុប១៨ម៉ឺនដុល្លារ។

លោកស្រី ណូ សុភា បានបង្ហាញចំណាប់អារម្មណ៍ដែរថា៖ “អំណោយនេះ មិនមែនជាការតបស្នងគុណដ៏ធំធេងរបស់លោកគ្រូ អ្នកគ្រូបានគ្រប់គ្រាន់នោះទេ ព្រោះគ្មានទ្រព្យសម្បត្តិ ឬថវិការចំនួនណាមួយ អាចប្រៀបធៀបនឹងការលះបង់ ការខិតខំប្រឹងប្រែង ការអប់រំ និងសេចក្ដីស្រឡាញ់ដែលលោកគ្រូ អ្នកគ្រូបានផ្តល់ឱ្យសិស្សនោះឡើយ។ ប៉ុន្តែខ្ញុំសង្ឃឹមថា អំណោយដ៏តូចមួយនេះ អាចជាសក្ខីភាពនៃការគោរព ការដឹងគុណ និងទឹកចិត្តដ៏ស្មោះស្ម័គ្ររបស់សិស្សម្នាក់ ដែលមិនធ្លាប់ភ្លេចគុណលោកគ្រូ អ្នកគ្រូជារៀងរហូត”។

អគ្គនាយិកា ក្រុមហ៊ុន Böttcher AG រូបនេះបានបន្ថែមទៀតថា លោកគ្រូ អ្នកគ្រូ គឺជាអ្នកដែលបានផ្តល់ទាំងចំណេះដឹង អប់រំចិត្តគំនិត និងបង្ហាញផ្លូវជីវិតដល់ខ្លួន។ បើគ្មានការខិតខំប្រឹងប្រែង ការអត់ធ្មត់ និងការលះបង់របស់លោកគ្រូ អ្នកគ្រូ ក៏ប្រហែលជាលោកស្រីមិនអាចមានថ្ងៃនេះដែរ។ ស្រ្តីខ្មែរដែលមានស្វាមីជាសេដ្ឋីអាល្លឺម៉ង់រូបនេះប្រកានន់ខ្ជាប់ពាក្យថា «មានថ្ងៃនេះ ព្រោះមានលោកគ្រូអ្នកគ្រូ» យល់ច្បាស់ពីទុក្ខធុរៈ និងស្គាល់បុណ្យ គុណ ដែលទួលបានពីលោកគ្រូអ្នកគ្រូទាំងអស់។ លោកស្រីពោរពេញដោយក្តីនឹករលឹកទៅកាន់លោកគ្រូ-អ្នកគ្រូចាស់ៗ ដែលពេលនេះពួកគាត់ខ្លះមានវ័យជរាទៅហើយ។

ថវិកាចំនួន ១ម៉ឺនដុល្លារក្នុងម្នាក់នេះ ត្រូវបានបែងចែកជូនទៅដល់លោកគ្រូ-អ្នកគ្រូជាបន្តបន្ទាប់ ដើម្បីជាការលើកទឹកចិត្ត ក៏ដូចជាការជួយសម្រាលបន្ទុកមួយផ្នែក ក្នុងជីវភាពរស់នៅរបស់ពួកគាត់ ខណៈពួកគាត់ភាគច្រើនរួមរឹតដោយជំងឺក្នុងវ័យជរា។ ចំណែកឯលោកគ្រូ-អ្នកគ្រូដែលបានទទួល ស្ទើរតែទប់ទឹកភ្នែករំភើបមិនចង់បាន ព្រោះមិននឹកស្មានថាសិស្សដែលខ្លួនធ្លាប់បង្ហាត់បង្រៀនពីតូច ក្លាយជាបុគ្គលជោគជ័យហើយ នៅតែចងចាំ និងវិលមកតបស្នងសងគុណពួកគាត់វិញទាំងក្តីអាណិតស្រលាញ់បែបនេះ។

កាយវិការដ៏ប្រពៃ និងបេះដូងមហាកតញ្ញូរបស់ឧកញ៉ា ណូ សុភា បានសាបព្រោះគ្រាប់ពូជនៃក្ដីស្រឡាញ់ ការដឹងគុណ និងការចែករំលែកយ៉ាងពិតប្រាកដនៅក្នុងសង្គមខ្មែរ។ សូមបួងសួងឱ្យលោកគ្រូ អ្នកគ្រូ មានសុខភាពល្អប្រសើរឡើងវិញ និងមានអាយុយឺនយូរដើម្បីមើលឃើញភាពជោគជ័យរបស់សិស្សានុសិស្សបន្តបន្ទាប់ទៀត។

គួរបញ្ជាក់ផងដែរថាកាលពីពេលថ្មីៗនេះលោកស្រី សុភា បានចូលរួមរៀបចំថវិកាជាង ១ សែនដុល្លារ ដើម្បីកសាងសាលារៀន ជូនដល់សិស្សនៅតាមទីជនបទ មានឱកាសបានសិក្សាក្រេនយកចំណេះវិជ្ជា។ លោកស្រី សុភា បុត្រឈរ ដែលទទួលបាន គោរមងារឧកញ៉ា ណូ សុភា បានជួយដល់សង្គមជាតិសឹងតែគ្រប់វិស័យមិនថាសុខាភិបាល វិស័យការពារជាតិ វិស័យអប់រំ និងវិស័យជាច្រើនទៀត៕

រូបភាព៖ Sophea Böttcher

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត