រឿងពិតនៅពីក្រោយភាពលេចធ្លោនៃការសម្ដែងរបស់ ទេព បូព្រឹក្ស នៅម៉ាឡេស៊ី

ការចេញទៅសម្ដែងនៅប្រទេសម៉ាឡេស៊ីលើកនេះ ទេព បូព្រឹក្ស បានបង្កើតការចាប់អារម្មណ៍មិនត្រឹមជាបទចម្រៀងនៅលើឆាកតែមួយមុខប៉ុណ្ណោះទេ។ ក្រឡេកមកសកម្មភាពនៅពីក្រោយនៃការសម្ដែងមួយនេះទើបដឹងច្បាស់ថាបើគ្មានមនុស្សសំខាន់ទាំងនេះពិតជាមិនអាចបង្កើតនូវជោគជ័យនៅលើឆាកអន្តរជាតិ១មួយនេះបានឡើយ។

មហាជនកំពុងផ្ទុះការកោតសរសើរអ្នកនាង ទេព បូព្រឹក្ស ក្រោយបានទស្សនាការសម្ដែងដ៏អស្ចារ្យរបស់តារាចម្រៀងហ៊ីបហបរូបនេះលើឆាកតន្ត្រី ROUND Festival កាលពីថ្ងៃទី ២២ ខែ មិថុនា កន្លងទៅ។ នេះជាលើកទី១ សម្រាប់តារាចម្រៀងកម្ពុជារូបនេះក្នុងការដឹកនាំក្រុមទៅសម្ដែងនៅឯប្រទេសម៉ាឡេស៊ី។ ក្រឡេកមកសកម្មភាពក្រោយឆាកនៃការរៀបចំរបស់តារាស្រី ទេព បូព្រឹក្ស និងក្រុមការងារពិតជាធ្វើឱ្យមហាជនមិនសរសើរមិនបានពិតមែន។

មកដឹងពីសកម្មភាពខ្លះៗនិងរឿងពិតមួយចំនួននៅក្រោយឆាកសម្ដែងរបស់អ្នកនាង ទេព បូព្រឹក្ស ៖

អ្នកនាង ទេព បូព្រឹក្ស បានរើសយកចម្រៀង ៣ បទគឺ វីរនារី ទេវរាជ និង New Era ទៅសម្ដែងនៅប្រទេសម៉ាឡេស៊ី។ ក្នុងការសម្ដែងនាលើកនេះអ្នកនាងក៏បានដឹកដៃលោក ជី ដេវីត ស្វាមីរូបសង្ហារបស់អ្នកនាងទៅជាមួយផងដែរ។ តែអ្វីដែលធ្វើឱ្យមហាជនស្ងើចសរសើរនោះ គឺកម្លាំងចិត្តដ៏មហិមាពីស្វាមីរូបសង្ហាដែលបានដើរតួនាទីជាគ្រប់យ៉ាងរបស់អ្នកនាង។ លោក ជី ដេវីត បានដើរតួនាទីជាអ្នកគ្របគ្រងផ្ទាល់ខ្លួនរបស់ភរិយាដោយបានរៀបចំគ្រប់យ៉ាងព្រមជាមួយគ្នានោះលោកតែងនៅក្បែរនិងផ្ដល់កម្លាំងចិត្តដល់ភរិយាថែមទៀតផង។

ក្រៅពីនេះក៏នៅមានចំណុចគួរឱ្យចាប់អារម្មណ៍បន្ថែមទៀតនោះគឺអ្នកផាត់មុខឱ្យតារាស្រីរូបនេះគឺជាអ្នកផាត់មុខអាជីពនិងលំដាប់ទៀតផង។ រីឯក្រុមការងាររៀបចំឈុតនិងអ្នករាំសុទ្ធសឹងជាអ្នកមានជំនាញដែលធ្វើឱ្យការសម្ដែងរបស់អ្នកនាង ទេព បូព្រឹក្ស លេចចេញនូវផ្លែផ្កាគួរជាទីមោទកភាពបែបនេះ។

ជាលទ្ធផលការសម្ដែងដែលបានត្រៀមអស់ពេលជាច្រើនខែក៏បានបញ្ចប់ដោយរលូន។ ការខិតខំមួយនេះត្រូវបានមហាជនជាច្រើនសាទរជាខ្លាំងចំពោះការប្រឹងប្រែងរបស់អ្នកនាងក្នុងការនាំយកវប្បធម៌ខ្មែរទៅបង្ហាញនៅលើឆាកអន្តរជាតិដើម្បីឱ្យប្រទេសដ៏ទៃបានស្គាល់ពីភាពល្បីរន្ទឺនិងអស្ចារ្យរបស់កម្ពុជាបន្ថែមទៀត៕

នេះជាកម្រងរូបភាពទាំងក្នុងការសម្ដែង និងខាងក្រោយឆាក របស់តារាចម្រៀង ទេព បូព្រឹក្ស៖