គ្រឹះប្រាសាទបុរាណទើបកំណាយឃើញនៅតំបន់ព្រែកព្នៅនឹងក្លាយជា «សារមន្ទីរលម្ហ» ឱ្យភ្ញៀវចូលទស្សនា

គ្រឹះប្រាសាទបុរាណ មុនសម័យអង្គរ ត្រូវបានកំណាយឃើញនៅតំបន់ជាយក្រុងមួយកន្លែង នៃរាជធានីភ្នំពេញ។ ពេលនេះក្រសួងកំពុងរៀបចំឱ្យក្លាយជា «សារមន្ទីរលម្ហ» ឱ្យភ្ញៀវចូលទស្សនា និងសម្រាប់ការសិក្សាស្រាវជ្រាវ។

នាពេលថ្មីៗ នេះអ្នកជំនាញបុរាណវិទ្យាបានកំណាយឃើញរចនាសម្ព័ន្ធនៃគ្រឹះប្រាសាទបុរាណមួយមុនសម័យអង្គរនៅស្ថានីយ ទួលអង្គកំណប់ ស្ថិតក្នុងភូមិចុងថ្នល់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ ត្រង់នេះគួរបញ្ជាក់ដែរថា ក្រសួងវប្បធម៌បានបញ្ជូនក្រុមជំនាញចុះធ្វើកំណាយនៅទីតាំងខាងលើក្នុងរយៈពេល ៣០ ថ្ងៃ ដោយគិតចាប់ពីថ្ងៃទី ០១ ដល់ថ្ងៃទី ៣០ ខែ កញ្ញា ឆ្នាំ ២០២៦ ជាលទ្ធផលបានរកឃើញនូវគ្រឹះប្រាសាទឥដ្ឋដែលទំនងជាស្ថិតក្នុងសតវត្សរ៍ទី៦ ទ្រាប់ដោយថ្មទន្លេជំនួសគ្រឹះថ្មភក់និងថ្មបាយក្រៀម ដែលធ្លាប់បានប្រទះនៅតាមបុរាណស្ថានដទៃនាពេលកន្លង។

ក្រោយការកំណាយ និងគិតគូរយ៉ាងយកចិត្តទុកដាក់ ក្រសួងវប្បធម៌និងវិចិត្រសិល្បៈបានសម្រេចរៀបចំទីតាំងទួលបុរាណមួយនេះឱ្យក្លាយជា «សារមន្ទីរលម្ហ» ដោយមានការសាងសង់នូវផ្លូវបេតុងសម្រាប់ការជិះចូលទស្សនា ព្រមជាមួយការធ្វើស្លាកព័ត៌មានអំពីបុរាណស្ថាន។ ជាពិសេសសាងសង់ដំបូលប្រក់ក្បឿងគ្របលើគ្រឹះប្រាសាទ ការរៀបចំសួនច្បារ ដើម្បីបម្រើជាប្រយោជន៍សាធារណជន សិស្ស និស្សិត ក្នុងការចូលទស្សនា គោរពបូជា និងការសិក្សាស្រាវជ្រាវផងដែរ៕