ស្គាល់គាត់អត់? តួអង្គ លួង ក្នុងរឿង «ដំបូងខ្មែរក្រហមសម្លាប់ប៉ាខ្ញុំ» មួយប៉ប្រិចភ្នែកសោះ ១៩ ឆ្នាំបាត់

រម្លឹកទៅកាល ១០ ឆ្នាំមុន ពេលដែលខ្សែរឿងប្រវត្តិសាស្ត្ររបស់កម្ពុជា «ដំបូងខ្មែរក្រហមសម្លាប់ប៉ាខ្ញុំ ឬ First They Killed My Father » របស់លោកស្រី អ៊ឹង លួង បានចាប់ផ្ដើមថត ពេលនោះតួអង្គ លួង មានអាយុត្រឹម ៩ ឆ្នាំប៉ុណ្ណោះ។

កន្លងជាង ១០ ឆ្នាំមកនេះ សារឿម ស្រីម៉ុច ដែលសម្ដែងជាតួ លួង បានចម្រើនវ័យ ពេញរូបរាង គួរឱ្យស្រលាញ់ មើលសឹងមិនស្គាល់។ អ្នកដែលបានតាមដានទស្សនាខ្សែរឿង «ដំបូងខ្មែរក្រហមសម្លាប់ប៉ាខ្ញុំ» ប្រាកដជាបានស្គាល់ ហោចណាស់ធ្លាប់បានលឺ និងនឹកឃើញដល់ឈ្មោះតួអង្គ លួង នេះដែរ។

រឿងខ្នាតវែងមួយនេះដឹកនាំដោយតារាហូលីវូដដ៏ល្បីឈ្មោះ អេចូលីណា ជូលី Angelina Julie ជាភាពយន្តប្រែសម្រួលចេញពីការចងចាំដ៏ឈឺចាប់របស់អ្នកស្រី អ៊ឹង លួង ដែលជាអ្នកនិពន្ធសៀវភៅ និង សកម្មជនការពារសិទ្ធិមនុស្ស។ អ្នកស្រីបានរួចផុតជីវិតពីរបបខ្មែរក្រហមដ៏សាហាវយង់ឃ្នង ពីឆ្នាំ ១៩៧៥ ដល់ ឆ្នាំ១៩៧៩។ សាច់រឿងត្រូវបានរៀបរាប់តាមការមើលឃើញរបស់អ្នកស្រីតាំងពី អាយុ៥ឆ្នាំ នៅពេលដែលខ្មែរក្រហមឡើងកាន់អំណាច រហូតដល់គាត់អាយុ៩ឆ្នាំ។ ខ្សែភាពយន្តនេះឆ្លុះបញ្ចាំងអំពីស្មារតីយ៉ាងមោះមុត និង ការតស៊ូយ៉ាងប្តូរផ្តាច់របស់ គ្រួសារអ្នកស្រី ដើម្បីបានរស់នៅជាមួយគ្នាយ៉ាងវេទនាអំឡុងសម័យខ្មែរក្រហម។

លោកស្រី អ៊ឹង លួង គឺជាកូនខ្មែរ១រូប ដែលបានរម្លឹកខ្សែជីវិតផ្ទាល់របស់លោកស្រី នៅលើផ្ទាំងក្រដាសពណ៌ស ជាមួយស្លាបកាទឹកខ្មៅ ក្នុងរបបប្រល័យពូជសាសន៍ ប៉ុល ពត ដែលកាលនោះលោកស្រីមានអាយុត្រឹម ៥ ឆ្នាំប៉ុណ្ណោះ។ រយៈពេល ៤ ឆ្នាំ នៃការចូលកាន់កាប់របស់ខ្មែរក្រហម ឆ្នាំ ១៩៧៥ ដល់ ១៩៧៩ កុមារ អ៊ឹង លួង ត្រូវបង្ខំចិត្តចាកចេញពីផ្ទះដ៏កក់ក្ដៅ ហើយត្រូវធ្វើដំណើរចេញពីទីក្រុងដូចប្រជាជនខ្មែរឯទៀត ក្រោមការឃោសនារបស់កងខ្មែរក្រហមថា ៣ថ្ងៃត្រឡប់មកវិញហើយ។ ៣ ថ្ងៃ ក្លាយជា ៣ ឆ្នាំ ជីវិតរស់ដូចស្លាប់ ស្រូវស្រែធ្វើបាន តែមិនអាចកិនហូប បន្លែ ផ្លែឈើ សាច់ត្រី បានត្រឹមតែឃើញ មិនអាចពាល់ មិនអាចសូម្បីតែហិត ត្រូវរស់នៅក្រោមការចង្អុលបង្ហាញរបស់អង្គការ មិនអាចបង្ហាញអត្តសញ្ញាណពិត មិនអាចនិយាយ មិនអាចតវ៉ា ព្រោះបើគេរកឃើញថាមានបំណង ឬក្បត់អង្គការ នឹងត្រូវយកទៅសម្លាប់ចោល (ដែលសម័យនោះ គេប្រើពាក្យយកទៅរៀនសូត្រ ឬកសាង ហ្នឹងឯង) ។

ក្រោយរួចផុតរបបខ្មៅងងឹត ប៉ុល ពត ជាមួយរឿងរ៉ាវដ៏សែនជូរចត់រាប់មិនអស់ ការបាត់បង់សមាជិកគ្រួសារ ក្រោមដៃរបស់ទាហានខ្មែរក្រហម បានបន្សល់ស្លាកស្នាមដ៏សែនឈឺចាប់ រហូតលោកស្រី អ៊ឹង លួង បានសម្រេចរៀបរាប់ជីវិតលោកស្រីនាពេលនោះឡើងវិញ ហើយក៏បានផលិតជាភាពយន្តខ្នាតវែង ដែលដឹកនាំសម្ដែងដោយ អេចូលីណា ជូលី តារាហូលីវូដដ៏ល្បីឈ្មោះ ព្រមជាមួយតួសម្ដែងជាង ១ម៉ឺននាក់ និងក្រុមការងារមិនក្រោម ១០០ នាក់ ដើម្បីសម្រេចឱ្យចេញផ្លែផ្កានៃខ្សែរឿងមួយនេះ។

ដោយឡែក កាលពីពេលថ្មីៗ កន្លងទៅ ម្ចាស់ស្នាដៃសៀវភៅ First They Killed My Father រូបនេះបានសរសេរនៅលើអាខោនរបស់លោកស្រីយ៉ាងដូច្នេះថា៖«ជាពេលព្រឹកមួយដ៏ពិសេសកាលពីខែមុន ដែលខ្ញុំបានចំណាយពេលជាមួយ លួង ដែលជាតួអង្គក្នុងរឿង First They Killed My Father»។ ជាមួយគ្នា លោកស្រីក៏បានរម្លឹកអតីតកាលខ្លះៗកាលពី១០ឆ្នាំមុន ដែលកាលនោះ លួងតូច មានអាយុត្រឹម ៩ឆ្នាំ ពេលសម្ដែង ហើយនាងក៏មិនធ្លាប់ចូលសម្ដែងអីពីមុនមកដែរ តែនៅពេលនាងដើរចូលឆាកសម្ដែង លួងតូចរូបនេះ បានធ្វើឱ្យបេះដូងគ្រប់គ្នា ស្ទើរតែលេងលោតទៅហើយ ដ្បិតនាងធ្វើវាបានយ៉ាងល្អជាទីបំផុត ដែលយើងនឹកស្មានមិនដល់»។

លោកស្រី អ៊ឹង លួង បានបន្ថែមទៀតថា៖«ឥលូវ លួង ធំហើយ នាងមានអាយុ ១៩ ឆ្នាំ នាងស្អាត ឆ្លាត ហើយរឹងមាំណាស់។ បច្ចុប្បន្ន ជានិស្សិតសិក្សាលើមុខជំនាញ Business ទៀតផង»។ លោកស្រីក៏បានចំអន់លេង ស្រីម៉ុច ហៅលោកស្រីថា យាយ ខណៈដែលលោកស្រីចាត់ខ្លួនឯងជាអ្នកមីងដែលមានមោទកភាពបំផុតលើក្មេងស្រីម្នាក់នេះបំផុត៕

រូបភាព ៖ Loung Ung

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។