ភូមិគ្រឹះដង្ខៅ ប៉ិច ថៅកែឥដ្ឋសញ្ញាអង្គរដ៏ល្បីល្បាញនាសម័យសង្គមរាស្ត្រនិយម សព្វថ្ងៃស្ថិតក្នុងតំបន់ចាក់អង្រែ

សំណង់ស្ថាបត្យកម្មដែលមានដល់ទៅ ៣ រចនាបថចូលគ្នា ខ្មែរ បារាំង និង ចិន មួយនេះត្រូវបានគេស្គាល់ថាជាអតីតផ្ទះរបស់ថៅកែឥដ្ឋសញ្ញាអង្គរដ៏ល្បីល្បាញកាលជំនាន់សង្គមរាស្ត្រនិយម បច្ចុប្បន្នសំណង់អគារប្រវត្តិសាស្ត្រមួយនេះនៅមានរូបរាងនៅឡើយ។

ដង្ខៅ ប៉ិច ឬ លឹម វេងគី ជាឈ្មោះរបស់ម្ចាស់ «សិប្បកម្មឥដ្ឋ-ក្បឿងសញ្ញាអង្គរ» ដ៏ល្បីល្បាញប្រចាំតំបន់ចាក់អង្រែ ដែលសិប្បកម្មរបស់លោកដើរតួនាទីយ៉ាងសំខាន់ក្នុងវិស័យសំណង់នាសម័យសង្គមរាស្ត្រនិយម។ បើរម្លឹកពីអាជីវកម្មដ៏ល្បីល្បាញនាជំនាន់នោះឡឥដ្ឋនិងឡក្បឿងរបស់លោកផលិត «ឥដ្ឋតាន់» និង «ក្បឿងក្បាច់» សញ្ញាអង្គរដែលមានគុណភាពរឹងមាំខ្លាំង។ នៅលើក្បឿងនីមួយៗ ថែមមានបោះពុម្ពឆ្លាក់អក្សរឈ្មោះ «លឹម វេងគី»។

តាមរយៈការសិក្សាស្រាវជ្រាវរបស់ក្រុមនិស្សិតស្ថាបត្យកម្មនៃសាកលវិទ្យាល័យន័រតុនបានរំលេចអំពីប្រវត្តិនៃការកាន់កាប់របស់ម្ចាស់ផ្ទះបន្តជំនាន់មកទល់សព្វថ្ងៃ៖ ម្ចាស់ជំនាន់ទី១ ជាជនជាតិបារាំង បានសាងសង់អគារមួយនេះជាពេទ្យទាហាន (១៨៦៣ – ១៩៥៣) រហូតដល់អំឡុងឆ្នាំ ១៨៧៦ ដល់ ១៨៨០ ត្រូវបានលក់ម្ចាស់ទី២ ជនជាតិខ្មែរ ដែលមានឈ្មោះថា ដង្ខៅ ប៉ិច ជាអ្នកមានស្ដុកស្ដម្ភនាសម័យនោះដែលលោកជាថៅកែដុតឥដ្ឋនិងក្បឿង។

ក្រោយលោកទទួលមរណភាពក៏បានផ្ទេរឱ្យសាច់ញាតិដែលមានឈ្មោះថា យាយ លឹម ស៊ីណា (ម្ចាស់ទី៣) ក្នុងអំឡុងឆ្នាំ ១៩៨០។ ក្រោយមកក៏បានជួលឱ្យជនជាតិចិន បើកជារោងចក្រ តម្បាញ កាត់ដែរ អាវប៉ាក់ ក្នុងឆ្នាំ ១៩៩៨។ ក្រោយមកទៀត ដល់ឆ្នាំ ២០២២ ម្ចាស់ទី៤ ដែលជាជនជាតិចិនតែវ៉ាន់ ក៏បានទិញ និងបានជួលវីឡានេះឱ្យក្រុមហ៊ុនបូមខ្សាច់ (ដល់បច្ចុប្បន្ន)។ គួរឱ្យដឹងដែរថា ផ្ទះនេះ ប្រើសសរនឹងធ្នឹមជាបេតុង RC និងជញ្ជាំងជាឥដ្ឋតាន់សុទ្ធ៕