អ្នក​ទេសចរ ៣ នាក់​ដែល​បានជាប់គាំងលើភ្នំរយៈពេល ២ថ្ងៃកន្លងមក ត្រូវបានមន្រ្តីឧទ្យានុរក្ស និង​ប្រជា​សហគមន៍​ជួយ​សម្រួល​ចុះ​មក​ក្រោម​វិញ​ដោយសុវត្ថិភាព។ ដោយ​ឡែក រថយន្ត​ចំនួន ៤ គ្រឿង​ដែល​ស្ថិត​ក្បែរ​ជើង​ភ្នំ​មិន​ទាន់​អាច​បញ្ជូន​មក​ភូមិ​នៅ​ឡើយ​ទេ។

តាម​ការ​​​នៅ​លើ​ផេក​ផ្លូវ​ការ​របស់​ក្រសួង​បរិស្ថាន​បាន​ឱ្យ​ដឹង​ថា ទេសចរ និងពលរដ្ឋ ៣ នាក់ចុងក្រោយ ដែលបានជាប់គាំងនៅលើតំបន់ភ្នំខ្នងផ្សារ ត្រូវបានជម្លៀស និងចុះមកដល់ជើងភ្នំ ដល់ភូមិតាំងបំពង់ ឃុំតាសាល ស្រុកឱរ៉ាល់ខេត្តកំពង់ស្ពឺ ដោយសុវត្ថិភាពទាំងអស់ហើយ បន្ទាប់ពីមានកិច្ចអន្តរាគមន៍ និងជួយសង្គ្រោះយ៉ាងសកម្មពីមន្ត្រីឧទ្យានុរក្សក្រសួងបរិស្ថាន សហការជាមួយអាជ្ញាធរមូលដ្ឋាន និងប្រជាសហគមន៍។

គិតត្រឹមម៉ោង២និង៥នាទី ថ្ងៃ ១៤ ខែកក្កដា ឆ្នាំ២០២៦ ទឹកជំន់ទឹកភ្លៀងក្នុងរយៈពេលប៉ុន្មានថ្ងៃកន្លងមកនៅតំបន់ភ្នំខ្នងផ្សារ បានស្រកអស់ច្រើន។ ប្រជាពលរដ្ឋអាចធ្វើដំណើរបាន និងឆ្លងម៉ូតូបានជាធម្មតា ដោយសាររយៈពេលនេះ ពុំមានភ្លៀងទៀតទេក្នុងតំបន់នោះ។

គួរ​ឱ្យ​ដឹង​ថា ជំនន់ទឹកភ្លៀងបានកើតឡើងនៅរសៀលថ្ងៃទី១២ ខែកក្កដា ឆ្នាំ២០២៦ នៅតំបន់ទេសចរណ៍ភ្នំខ្នងផ្សារ និងបានប៉ះពាល់ទេសចរចំនួន ៥៥១នាក់ បានជាប់គាំងមិនអាចចុះពីលើភ្នំបាន ដោយសារទឹកហូរធ្លាក់ខ្លាំង៕

ចុចទីនេះដើម្បីទស្សនាវីដេអូសង្គ្រោះ ៖ https://www.facebook.com/share/v/19ECwirp1e/

រូបភាព ៖ ក្រសួងបរិស្ថាន