ទីវ តារារិទ្ធិ អ្នកជិះកង់ឆ្លងទ្វីបដំបូងគេក្លាយជាទូតសុឆន្ទៈក្រសួងទេសចរណ៍

បេសកកម្ម ២ ឆ្នាំ នៅលើកែបកង់របស់អ្នកផ្សេងព្រេងកម្ពុជាម្នាក់បានធ្វើឱ្យមហាជនទាំងក្នុង និងក្រៅស្រុកជ្រួតជ្រាបនិងរំជួលចិត្តជាពន់ពេក ត្បិតក្រោយបានដឹងថាការជិះកង់របស់លោកមិនមែនជាការកម្សាន្ត ប៉ុន្តែជាការជួយដល់កុមារកម្ពុជា។

តើលោកគឺជាអ្នកណា? តើលោកបានធ្វើអ្វីខ្លះ និងបានឆ្លងកាត់រឿងរ៉ាវអ្វីខ្លះក្នុងដំណើរផ្សេងព្រេងឆ្លងប្រទេសដើម្បីរៃអង្គាសប្រាក់ជួយដល់កុមារកម្ពុជា?

លោក ទីវ តារារិទ្ធិ ជាកូនខ្មែរដំបូងគេដែលបានបញ្ចប់បេសកកម្មជិះកង់ដើម្បីកុមារកម្ពុជា ដោយចាយពេល ២ ឆ្នាំ លើចម្ងាយផ្លូវជិត ៦ ម៉ឺនគីឡូម៉ែត្រ នាំយកក្ដីសង្ឃឹមកុមារកម្ពុជាឆ្លងកាត់ប្រទេស និងទ្វីបធំៗជាច្រើនលើពិភពលោក។ លោកបានហៅបេសកកម្មលើកនេះថា «CYCLING FOR CHILDREN» ជាមួយគោលដៅនៃការរៃអង្គាសថវិកាឱ្យបាន ២៥ ម៉ឺនដុល្លារ។

រម្លឹកទៅកាលពី ២ ឆ្នាំមុន ក្នុងអំឡុងខែ មិថុនា ឆ្នាំ ២០២៤ បុរសដែលប្រកាន់ខ្ជាប់គោលការណ៍ជួយដល់កុមារកម្ពុជារូបនេះបានធ្វើដំណើរចាកចេញពីប្រទេសកម្ពុជា ដោយបានជ្រើសយកគោលដៅចេញគឺមន្ទីរពេទ្យកុមារអង្គរ ខេត្តសៀមរាប និងបានបន្តដំណើរជាហូរហែឆ្លងកាត់ទ្វីបអាស៊ី អឺរ៉ុប និងចុងក្រោយទ្វីបអាហ្វ្រិកខាងត្បូង សរុប ៤០ ប្រទេស។ ក្នុងដំណើរមួយនេះលោកបានជួបរឿងរ៉ាវជាច្រើន មានខ្លះក៏ធ្វើឱ្យរូបលោករំភើបចិត្តស្ទើរហូរទឹកភ្នែកចេញមកក្រៅ ក៏មានខ្លះទៀតបានធ្វើឱ្យលោកអាចស្វែងយល់បានកាន់តែច្រើនបន្ថែមទៀតអំពីពិភពលោកខាងក្រៅ។ រឿងរ៉ាវទាំងអស់នេះត្រូវបានលោក ទីវ តារារិទ្ធិ កត់ត្រាចារក្នុងក្នុងសៀវភៅ ដោយលោកមានគម្រោងផលិតសៀវភៅមួយក្បាលដែលរៀបរាប់អំពីជីវិតរយៈពេល ២ ឆ្នាំ ជាមួយកង់។

យ៉ាងណាមិញ បុរសដែលរស់នៅផ្សងព្រេងជាមួយកង់ដល់ទៅ ២ ឆ្នាំ ម្នាក់ឯងរូបនេះ ទីបំផុតក៏សម្រេចបានសមិទ្ធផលមួយនេះយ៉ាងជោគជ័យ ដោយបានវិលត្រឡប់មកកាន់ប្រទេសកម្ពុជានិងបានរៃអង្គាសថវិកាសរុបប្រមាណ ២៦ ម៉ឺនដុល្លារ។ គួរជម្រាបដែរថា ថវិកាទាំងអស់នេះនឹងត្រូវប្រគល់ជូនមន្ទីរពេទ្យកុមារអង្គរ និងមូលនិធិគន្ធបុប្ផាកម្ពុជា ដើម្បីឧបត្ថម្ភ និងទ្រទ្រង់ដល់ការពិនិត្យព្យាបាល និងថែទាំសុខភាពកុមារកម្ពុជា។

ជាមួយគ្នា ក៏មានដំណឹងដ៏សែនរំភើបមួយទៀតនោះគឺលោក ទីវ តារារិទ្ធិ ទទួលបានការតែងតាំងជាទូតសុឆន្ទៈនៃក្រសួងទេសចរណ៍កម្ពុជា ដើម្បីបន្តជួយផ្សព្វផ្សាយ និងនាំកិត្តិនាមកម្ពុជាទៅកាន់ពិភពលោកក្រោមរូបភាពវិជ្ជមាន ក្នុងនាមជាកូនខ្មែរមួយរូប៕