ប្រជាប្រិយភាព ព្រាប សុវត្ថិ គ្មានភាពថមថយឡើយ ជាក់ស្ដែងថ្ងៃប្រគំតន្រ្តីកាលពីសប្ដាហ៍មុន

សំឡេងស្រែហ៊ោកញ្ជ្រៀវនៃអ្នកគាំទ្រថ្ងៃប្រគំតន្ត្រីកាលពីពេលថ្មីៗនេះ បញ្ជាក់យ៉ាងច្បាស់ថា ប្រជាប្រិយភាពកំពូលតារាចម្រៀងប្រុស ព្រាប សុវត្ថិ គ្មានការថមថយឡើយ បើទោះជាម្ចាស់បទ «ម្ចាស់បេះដូង» វ័យកាន់តែច្រើន និងមានតារាចម្រៀងជាច្រើនរះឡើងជាបន្តបន្ទាប់។

ព្រាប សុវត្ថិ បានធ្វើឲ្យមហាជនមើលឃើញថា ការឈរជើងលើវិថីសិល្បៈ ៣០ ឆ្នាំរបស់លោក មិនបានបាត់ឡើយអ្នកគាំទ្រ។ បើទោះជាមានកូនប្រុសទាំង ៣ ឈរជើងក្នុងវិថីសិល្បៈចម្រៀង រាំនេះទន្ទឹមខ្លួនក៏ដោយ ហើយបើទោះជាបច្ចុប្បន្នមានតារាចម្រៀងប្រុសស្រីល្បីៗជាបន្តបន្ទាប់ ក៏ការឈរលើចំណុចកំពូលមិនទាន់មាននរណាអាចជំនួសបានទេ។

មិនថាការរៀបចំតុបតែងខ្លួន បទចម្រៀង ក្បាច់រាំ តារាចម្រុងប្រុសវ័យ ៥១ ឆ្នាំ នៅតែមានថាមពលក្នុងការសម្ដែង។ បង្ហាញខ្លួនម្ដងៗមិនថាកម្មវិធីខនសឺត តូចធំ ម្ចាស់បទ «ចិត្តព្រៃផ្សៃ» ទទួលបានការគាំទ្រពីសំណាក់អ្នកគាំទ្រច្រើនសន្ធឹក។

កំពូលតារាចម្រៀងប្រុសរូបនេះមានវ័យចំណាស់ ដូចនេះច្បាស់ណាស់មនុស្សជាច្រើន គិតថាអ្នកគាំទ្រមិនមែនក្មេងៗយុវវ័យឡើយ។ ផ្ទុយទៅវិញអ្នកគាំទ្រ ព្រាប សុវត្ថិ មិនមែនមានអ្នកវ័យដូចគ្នាឡើយ ក្មេងៗជំនាន់ក្រោយបើទោះជាទើបតែធំដឹងក្ដី ក៏បានបាក់ចិត្តលង់នឹងសំឡេងគ្រប់បទរបស់ ព្រាប សុវត្ថិ។

ព្រាប សុវត្ថិ មិនថាច្រៀងបទចាស់កាលនៅទ្រនំមុន និងនៅផលិតកម្មចាស់ឡើយ ទាំងបទចម្រៀង និងការសម្ដែងរបស់លោក ពិតជាទាក់ទាញ បន្ថែមដោយកូនប្រុសទាំង ២ របស់ម្ចាស់បទ «ថ្នម» កាន់តែរស់រវើក។ ពេលឡើងសម្ដែងម្ដងៗតារាប្រុសរូបនេះ ត្រូវបានអ្នកគាំទ្រស្រែកច្រៀងបន្ទរ រាំលេងកម្សាន្ត ហើយក៏មានអ្នកគាំទ្រខ្លះបានយកវត្ថុអនុស្សាវរីយ៍ផ្សេងៗជូន។

សម្រាប់មហាជនច្បាស់ជាដឹងហើយថាតារាចម្រៀងប្រុសលំដាប់ជួរមុខនៃប្រទេស ព្រាប សុវត្ថិ ជាមនុស្សដែលមានទេពកោសល្យសំឡេងដែលអាចបកស្រាយបទចម្រៀងបានគ្រប់ទម្រង់ ហើយសូម្បីតែចង្វាក់ហ៊ីបហប់ Rap កំពុងទទួលបានការគាំទ្រពីសំណាក់យុវវ័យសម័យថ្មីក៏លោកអាចបត់បែនបានគ្រប់យ៉ាងដែរ។

ដូចនេះហើយមិនចម្លែកឡើយដែល ព្រាប សុវត្ថិ អាចគ្រងតំណែងជាតារាប្រុសជួរមុខនៃប្រទេសជាច្រើនឆ្នាំមកនេះ។ ក្រោយចប់ការប្រគំតន្រ្តីនារត្រីថ្ងៃ ១ ខែសីហា ឆ្នាំ ២០២៦ នោះអ្នគាំទ្រមួយចំនួនចង់ឲ្យ ព្រាប សុវត្ថិ ធ្វើ solo concert ផ្ទាល់ខ្លួនម្ដង ហើយក៏មានការពេញចិត្តគំនិតនេះផងដែរ៕

រូបភាព៖ Ganzberg Snow

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត