របរធ្វើធូបបុរាណ ក្នុងស្រុកអង្គរធំ-សៀមរាប ប្រឈមការបាត់បង់ បើសិនគ្មានអ្នកបន្តវេន

របរធ្វើធូបបុរាណខ្មែរ ជាសិប្បកម្មប្រពៃណីក្នុងស្រុកអង្គរធំ ខេត្តសៀមរាប ដែលបន្សល់ទុកពីដូនតា បច្ចុប្បន្នរបរតជំនាន់មួយនេះកំពុងប្រឈមនិងការបាត់បង់។ នេះបើតាមការបង្ហោះឱ្យដឹងនៅលើផេកមន្ទីរព័ត៌មានខេត្តសៀមរាប។

ភូមិសំរោង ឃុំលាងដៃ ស្រុកអង្គរធំ ជាភូមិដែលមានពលរដ្ឋ រក្សាទំនៀមធ្វើធូបបុរាណខ្មែរច្រើនជាងគេនៅតំបន់អង្គ។ របរតជំនាន់មួយនេះបានចិញ្ចឹមអ្នកភូមិក្នុងតំបន់ រាប់ជំនាន់មកហើយ ក្រៅពីរបរធ្វើស្រែចម្ការ។ សព្វថ្ងៃ សិប្បកម្មបែបប្រពៃណីបុរាណមួយនេះកំពុងប្រឈមនិងការបាត់បង់ ដ្បិតថាមិនសូវមានអ្នកជំនាន់ក្រោយចាប់យកជំនាញនេះបន្ត ណាមួយរបរនេះរកចំណូលពុំសូវបានច្រើន ចំណាយពេល និងភាពហត់នឿយក៏ច្រើន ហើយនៅលើទីផ្សារក៏មានអ្នកផលិតជាសិប្បកម្មធំៗ និងមានការនាំចូលច្រើនថែមទៀតផង។

ក៏មានកត្តាផ្សេងទៀតដូចជា ផលវិបាកក្នុងការស្វែងរកដើមសម្បកបាយដែលជាវត្ថុធាតុដើមចម្បងក្នុងការធ្វើធូប ដោយសារបច្ចុប្បន្នដើមរុក្ខជាតិប្រភេទនេះកាន់តែខ្សត់ទៅៗ ណានៅតំបន់ជិតភូមិក៏ពុំមាន ទាល់តែត្រូវធ្វើដំណើរចូលព្រៃឬតំបន់ជិតភ្នំទើបមាន តែក៏មិនសូវច្រើននោះដែរ។ បើនិយាយពីការធ្វើធូបទៀតសោត ក៏មានច្រើនដំណាក់កាល ចំណាយកម្លាំង ពេលវេលាក៏ច្រើន ជាហេតុជំរុញឱ្យក្មេងៗស្រករក្រោយ មិនសូវជាចូលចិត្តរបរនេះ។

យ៉ាងណាមិញ ប្រសិនបើអ្នកបានធ្វើដំណើរទៅកាន់ភូមិខាងលើ អ្នកប្រាកដជាបានឃើញអ្នកភូមិដែលភាគច្រើនជាមនុស្សចាស់នៅផ្ទះបន្តរបរធ្វើធូប ដ្បិតជារបរតជំនាន់ពីដូនតារបស់ពួកគាត់។ គួរឱ្យដឹងដែរថា លក្ខណៈពិសេសរបស់ធូបខ្មែរ គឺប្រើក្លិនធម្មជាតិ និងអុជបានយូរ៕

រូបភាព ៖ មន្ទីរព័ត៌មានខេត្តសៀមរាប

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។