វណ្ណដា ទម្លាក់ ៣ បទ រ៉ាយរ៉ាប់រឿងខ្លោចផ្សានៃក្ដីស្នេហាក្នុងចម្រៀង ផ្អើលអស់អ្នកគាំទ្រលើបណ្ដាញសង្គម

រឿងរ៉ាវជីវិតកំពូលតារារ៉េប ម៉ាន់ វណ្ណដា តែងតែត្រូវបានអ្នកស្អប់ លើកយកមកបើកកកាយគ្រប់សព្វបែបយ៉ាង រហូតដល់គ្រប់ platform បណ្ដាញសង្គម វែកញែករឿងហេតុផ្ទាល់ខ្លួន ឯកជនភាព ទោះល្បីឈ្មោះក៏គ្មានសេចក្ដីសុខ។ ទ្រាំនឹងទុក្ខខ្លោចផ្សា វណ្ណដា មិនខ្ចីបកស្រាយសម្ងំនៅស្ងៀមបៀមទុក្ខក្រំក្រៀម បញ្ចេញជាសំនៀងក្នុងបទចម្រៀងថ្មី ៣ បទ។

ភាពល្បីល្បាញ ធ្វើឲ្យ វណ្ណដា ស្អប់ខ្លួនឯងជាខ្លាំង។ នេះជាការលើកឡើងរបស់តារាប្រុសដែលមានដើមកំណើតនៅខេត្តព្រះសីហនុ រូបនេះ។ វណ្ណដា បានបញ្ចេញការឈឺចាប់តាមរយៈបទចម្រៀង ៣ បទមានដូចជា ” DO YOU”, “BLUE STORY” និង “HERO 2 VILLAIN” ដោយរ៉ាយរ៉ាប់ពីក្ដីឈឺចាប់ទាំងប៉ុន្មាននៅក្នុងនោះទាំងអស់ មិនថាគ្រួសារ ពិសេសរឿងស្នេហាទើបបាក់បែក និងរកឃើញថ្មីៗ ត្រូវកក្រើកអស់ហ្វេនប្រុសស្រីទាំងក្នុង និងក្រៅស្រុក។

តារាប្រុសវ័យ ២៩ ឆ្នាំ បានអត់ទ្រាំមិនស្ដីពីរឿងរ៉ាវជាច្រើនក្នុងជីវិត ដែលត្រូវញាំញីដោយមតិចម្រុះលើបណ្ដាញសង្គម។ វណ្ណដា បានបង្ហាញការឈឺចាប់ទាំងអម្បាលម៉ានទៅក្នុងចម្រៀង ៣ បទ ដែលទម្លាក់កាលពីយប់មិញនោះ។ គ្រប់ Lyric ក្នុងបទចម្រៀង គួរឲ្យចាប់អារម្មណ៍ជាទីបំផុត ព្រោះម្ចាស់Skull ទាំង ២ អាល់ប៊ុម បានរៀបរាប់ពីបញ្ហាថ្មីៗនេះ ហើយអត្ថន័យធំធេងបំផុតគឺ រឿងរ៉ាវក្នុងចិត្តជាច្រើន បែរជាមិនអាចនិយាយរៀបរាប់បាន ទើបត្រូវអធិប្បាយតាមរយៈបទចម្រៀងជំនួស។

វណ្ណដា ជ្រើសរើសយកភាពស្ងប់ស្ងាត់ តែមិនអាចបំបាត់ទុក្ខ ព្រោះបណ្ដាញសង្គមកំពុងជីក គាស់ កកាយ បរិយាយពីជីវិតលោក ទាំងសាមីខ្លួនមិនធ្លាប់បាននិយាយសូម្បីតែមួយម៉ាត់។ ទីបំផុត ការរុករានទន្ទ្រានជីវិតឯកជនម្ដងហើយម្ដងទៀត ទាំងគ្រួសារ ស្នេហា ធ្វើឲ្យ ម៉ាន់ វណ្ណដា អស់ភាពអត់ធ្មត់ សង្កត់ចិត្តចេញចម្រៀង ៣ បទក្នុងពេលតែមួយយប់ កក្រើកអស់អ្នកគាំទ្រ។

មកវិញម្ដងនេះ ម្ចាស់បទ “Baby Mama” បង្កប់ន័យក្ដីឈឺចាប់ ក្រោយបែកបាក់ស្នេហា ដោយធ្វើឲ្យអ្នកគាំទ្រ ចុចចូលទៅទស្សនាមិនដល់ ១ ថ្ងៃផង ជិត ៤ លានដង លើហ្វេសប៊ុក។ បើទោះជាអ្នកគាំទ្រសប្បាយ ត្រេកអរ ដែល Idol បញ្ចេញបទថ្មី ដើម្បីបំពេញបំណងអ្នកគាំទ្រ តែក៏ជាក្ដីទុក្ខសោកខ្លួនឯង ដែលបានលាក់បាំងមកជាយូរហើយដែរ៕