សោកស្ដាយ! កម្ពុជាបាត់បង់ធនធានសិល្បករជើងចាស់ម្នាក់ទៀតហើយគឺលោក ផៃ ផុងរ៉ាក់

ដំណឹងដ៏សែនសោកសៅ សម្រាប់វិស័យសិល្បៈនៅកម្ពុជា ខណៈសិល្បករជើងចាស់លោក ផៃ ផុងរ៉ាក់ ដែលត្រូវបានគេស្គាល់ថាជាម្ចាស់បទ «យក្សកើតអេដស៍» បានទទួលមរណភាព ដោយរោគាពាធ ក្នុងជន្មាយុ ៦៧ ឆ្នាំ កាលពីម្សិលមិញនេះ។

កាលពីវេលាម៉ោង ៨៖៣០ នាទីព្រឹក ថ្ងៃ ៥ ខែឧសភា ឆ្នាំ ២០២៦ លោក ផៃ ផុងរ៉ាក់ ដែលជាធនធានសិល្បករជើងចាស់១ រូបរបស់កម្ពុជាបានឃ្លាតចាកពីទស្សនិកជនជនរបស់លោកហើយ។ ដំណឹងមរណភាពរបស់តារាចម្រៀងជើងចាស់រូបនេះ បានធ្វើឱ្យមហាជនជាពិសេសអ្នកនៅក្នុងវិស័យសិល្បៈទាំងក្មេង-ចាស់ បង្ហាញការសោកស្ដាយជាពន់ពេកចំពោះការបាត់បង់ធនធានសិល្បៈដ៏មានតម្លៃមួយរូបក្នុងវិស័យតន្ត្រីខ្មែរនាពេលនេះ។ ជាមួយគ្នាបណ្ដាអ្នកប្រើប្រាស់បណ្ដាញសង្គមបានចូលរួមរំលែកទុក្ខដល់ក្រុមគ្រួសារ សាច់ញាតិរបស់លោកផងដែរ។

គួរឱ្យដឹងថា តារាចម្រៀងជើងចាស់ លោក ផៃ ផុងរ៉ាក់ ជាសិល្បករល្បីល្បាញនាអំឡុងទសវត្សរ៍៨០ (លោកក៏ជាអតីតជ័យលាភីលេខ១ ប្រឡងចម្រៀងឆ្នាំ១៩៨១)។ កន្លងជាង៤០ឆ្នាំមកនេះ លោក ផៃ ផុងរ៉ាក់ បានបន្សល់ស្នាដៃបទចម្រៀងដែលធ្លាប់បំពេអារម្មណ៍មហាជនដូចជា យក្សកើតអេដស៍ , ផ្គរលាន់ត្រប៉ាងប៉ាច , ទឹកភ្នែកមេប៉ុស្តិ៍ និងបទរង្វាន់បានពេទ្យ ដែលជាចម្រៀងផ្ទុះការគាំទ្រជាថ្មី និងបានឱ្យក្មេងៗជំនាន់ក្រោយបានស្គាល់រូបលោក៕

រូបភាព ៖ Phay Phongrak

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។