ក្រុមហ៊ុនផ្នែក Fashion និងផលិតផលសម្រស់របស់អ្នកច្នៃម៉ូដ Victoria Beckham បានរាយការណ៍ថា ខ្លួនទទួលបានប្រាក់ចំណេញពីប្រតិបត្តិការអាជីវកម្មជាលើកដំបូងបំផុត ចាប់តាំងពីត្រូវបានបង្កើតឡើងក្នុងឆ្នាំ២០០៨។

យោងតាមរបាយការណ៍គណនេយ្យបានបង្ហាញថា ក្រុមហ៊ុន Victoria Beckham Holdings Ltd ដែលដឹកនាំដោយភរិយា David Beckham ក្នុងនាមជានាយិកាផ្នែកច្នៃប្រឌិត (Creative Director) ទទួលបានប្រាក់ចំណេញពីប្រតិបត្តិការចំនួន ៧.៣ លានផោន ឬ ៩.៨៧ លានដុល្លារក្នុងឆ្នាំ២០២៥ បន្ទាប់ពីបានជួបប្រទះការខាតបង់អស់ជាច្រើនឆ្នាំ។

លោកស្រី Beckham បានប្រាប់សារព័ត៌មាន Financial Times ថា៖ «យើងទាំងអស់គ្នាបានខិតខំប្រឹងប្រែងធ្វើការយ៉ាងខ្លាំងអស់រយៈពេលជាយូរ សម្រាប់ពេលវេលានៃប្រាក់ចំណេញ និងការរីកចម្រើនមួយនេះ»។

«យើងបានបើកចំហយ៉ាងច្បាស់លាស់អំពីបញ្ហានានាដែលយើងបានជួបប្រទះនៅក្នុងអាជីវកម្ម ប៉ុន្តែយើងបានស្តារឡើងវិញ ហើយឥឡូវនេះកំពុងលូតលាស់ក្នុងល្បឿនមួយដ៏សមរម្យ។ បន្ទាប់ពីរយៈពេល ២០ឆ្នាំមកនេះ មនុស្សទូទៅលែងចាត់ទុកម៉ាកយីហោរបស់ខ្ញុំត្រឹមជាម៉ាកយីហោរបស់បុគ្គលល្បីទៀតហើយ»។

ជោគជ័យលើផលិតផលថែរក្សាស្បែក

កាលពីឆ្នាំមុន ខ្សែភាពយន្តឯកសារនៅលើ Netflix បានរៀបរាប់ពីរឿងរ៉ាវនៃការខិតខំប្រឹងប្រែងរបស់លោកស្រី ក្នុងការបង្កើតម៉ាកយីហោហ្វេសិន និងការស្វែងរកប្រាក់ចំណេញ — ហើយស៊េរីរឿងនេះផ្ទាល់ បានជួយរុញច្រានការលក់ឱ្យកើនឡើងយ៉ាងខ្លាំង «ដោយមានការគាំទ្រខ្លាំងជាពិសេសលើផលិតផលខោអាវខូវប៊យ និងអាវយឺត»។ នេះបើយោងតាមរបាយការណ៍គណនេយ្យដដែល។

របាយការណ៍បានបន្តថា ផ្នែកហ្វេសិនរបស់ក្រុមហ៊ុនសម្រេចបាន «ការកើនឡើងទ្វេដងយ៉ាងរឹងមាំ» ​ក្នុងឆ្នាំ២០២៥ ខណៈដែលផ្នែកផលិតផលសម្រស់ ដែលបាន​ដំណើរការក្នុងឆ្នាំ២០១៩ បាន «បង្ហាញពីសមិទ្ធផលដ៏រឹងមាំបំផុតមួយមិនធ្លាប់មាន»។

ជោគជ័យនេះបានមកពីប្រជាប្រិយភាពនៃផលិតផលម្សៅទ្រនាប់ Foundation Drops របស់លោកស្រី ដែលមានបញ្ជីឈ្មោះអតិថិជនរង់ចាំទិញរហូតដល់ ២៥០០០នាក់ និងបានធ្វើឱ្យទំហំអាជីវកម្មផ្នែកថែរក្សាស្បែករបស់ក្រុមហ៊ុនកើនឡើងទ្វេដង។

ខ្សែភាពយន្តឯកសារ Netflix បានបង្ហាញពីអតីតតារាចម្រៀងប៉ុបរូបនេះ និយាយអំពីការជម្នះឧបសគ្គពីគ្រប់គ្នាដែលសង្ស័យលើសមត្ថភាពរបស់លោកស្រី ដើម្បីឱ្យគេទទួលស្គាល់ជានាយកច្នៃប្រឌិត និងជាសហគ្រិនពិតប្រាកដ រហូតដល់ពេលជួបវិបត្តិហិរញ្ញវត្ថុ នៅពេលដែលក្រុមហ៊ុនបាន «ខាតបង់ប្រាក់អស់រាប់សិបលាន»។

គួរបញ្ជាក់ថា អាជីវកម្មនេះត្រូវបានជួយសង្គ្រោះដោយស្វាមីរបស់លោកស្រី គឺអតីតតារាបាល់ទាត់ David Beckham ដោយលោកបានចែករំលែកក្នុងកម្មវិធីនោះថា៖ «ការដែលប្រពន្ធខ្ញុំត្រូវដើរមកប្រាប់ខ្ញុំថា “​បងអាចជួយបានទេ យើងត្រូវការប្រាក់បន្ថែមទៀត អាជីវកម្មត្រូវការដើមទុនបន្ថែម” — វាជារឿងដ៏លំបាកមួយសម្រាប់យើងទាំងពីរ ព្រោះខ្ញុំក៏មិនមានប្រាក់ឯណាជួយបន្តទៀតរហូតដែរ»។

Victoria បាននិយាយថា៖ «ប្រសិនបើគាត់មិនជឿជាក់លើ​ខ្ញុំទេ ខ្ញុំក៏មិនអាចរក្សាអាជីវកម្មនេះបានរហូតមកដល់ពេលនេះដែរ»។

បន្ទាប់មក លោកស្រីទទួលបានការវិនិយោគចំនួន ៣០លានផោន ដោយបានលក់ភាគហ៊ុន ៣០% នៃក្រុមហ៊ុនទៅឱ្យក្រុមហ៊ុន NEO Investment Partners ក្នុងឆ្នាំ២០១៧ ដែលជាអ្នកចាប់ផ្តើមរៀបចំរចនាសម្ព័ន្ធក្រុមហ៊ុនឡើងវិញ។

ចំណុចជោគជ័យដ៏សំខាន់

ការរៀបចំរចនាសម្ព័ន្ធឡើងវិញនោះ រួមបញ្ចូលទាំងការដោះស្រាយបញ្ហាចំណាយខ្ជះខ្ជាយដែលលោកស្រី Beckham ផ្ទាល់បានទទួលស្គាល់ថា «មិនគួរឱ្យជឿ» ដូចជា «ការដឹកជញ្ជូនកៅអីតាមយន្តហោះពីចុងម្ខាងនៃពិភពលោកទៅចុងម្ខាងទៀត» និងការចំណាយប្រាក់ «៧០០០០ ផោនក្នុងមួយឆ្នាំ» លើរុក្ខជាតិលម្អការិយាល័យ។ នេះបើយោងតាមការលើកឡើងរបស់លោក David Belhassen មកពី NEO។

នៅក្នុងសេចក្តីថ្លែងការណ៍មួយកាលពីថ្ងៃចន្ទ លោក Belhassen ដែលជាប្រធានក្រុមហ៊ុន Victoria Beckham Holdings បានមានប្រសាសន៍ថា៖ «តាមរយៈម៉ាស៊ីនរុញច្រានការលូតលាស់ពីរ គឺផ្នែកហ្វេសិន និងសម្រស់ រួមជាមួយនឹងមូលដ្ឋានអតិថិជនអន្តរជាតិដែលកាន់តែរីកធំ និងគំរូប្រតិបត្តិការដ៏ច្បាស់លាស់ អាជីវកម្មនេះមានជំហរយ៉ាងរឹងមាំសម្រាប់ជំហានបន្ទាប់នៃការលូតលាស់ប្រកបដោយប្រាក់ចំណេញ» ៕