នៅថ្ងៃទី ២០ ខែមីនា កន្លងទៅ BTS ទើបតែបានចេញផ្សាយអាល់ប៊ុម Comeback ក្រោមចំណងជើង Arirang។ ខណៈពេលដែលសមាជិក ៦ នាក់ទទួលបានក្រេឌីតលើការតែងនិពន្ធសម្រាប់អាល់ប៊ុមថ្មី បែរជា Jin បានអវត្តមាននៅលើបញ្ជីនេះ។

នៅក្នុងថ្ងៃតែមួយ BTS បាន Live ជួបជុំគ្នានៅលើកម្មវិធី Weverse ក្រោមឈ្មោះ Studio Note Arirang ដើម្បីចែករំលែករឿងរ៉ាវពីក្រោយអាល់ប៊ុម Arirang ដែលជាអាល់ប៊ុមវិលត្រឡប់មកជួបជុំគ្នាជាថ្មីម្ដងទៀតរបស់សមាជិកទាំង ៧រូបក្នុងរយៈពេលជិត ៤ឆ្នាំ។

អាល់ប៊ុមពេញខ្នាតទី ៥នេះ មានសរុប ១៤ បទ  ដោយសមាជិកម្នាក់ៗ ដូចជា RM Suga J-Hope Jungkook V និង Jimin បានចូលរួមក្នុងការសរសេរ និងនិពន្ធបទចម្រៀង ដែលនាំឱ្យសមាជិកទាំង ៦នាក់ទទួលបានក្រេឌីតសម្រាប់ស្នាដៃខាងលើ។ យ៉ាងណាមិញ Jin បានអវត្តមានចំពោះការចូលរួមនេះ ដែលនាំឱ្យលោកមិនទទួលបានឈ្មោះក្រេឌីតសម្រាប់បទណាមួយឡើយ។

ជាក់ស្ដែង ការខកខានរបស់ Jin បានកើតឡើងដោយសារតែលោកបានជាប់រវល់នឹងការប្រគំតន្រ្តីទេសចរណ៍ទោល ខណៈពេលដែលមានកាលវិភាគត្រួតគ្នាជាមួយនឹងការរួមក្រុម។ ទាក់ទិនទៅនឹងបញ្ហាខាងលើ RM បានបកស្រាយថា៖ “ប្រសិនបើដំណើរប្រគំតន្រ្តីទេសចរណ៍របស់ Jin បានបញ្ចប់មុននេះបន្តិច គេនឹងអាចចូលរួមបានច្រើនជាងនេះ។ វាជារឿងគួរឲ្យអាណិតណាស់”។

ដោយការងារប្រគំតន្ត្រីទោលនេះមានសភាពមមាញឹកខ្លាំង V បានបន្ថែមថា៖ “មានពេលខ្លះដែលយើងពិតជាបានធ្វើការជាមួយគ្នាបាន ប៉ុន្តែគេមិនមែនទំនេរស្រួលខ្លួនអាចចូលរួមពេញទីទេ ហើយការប្រគំតន្ត្រីទេសចរណ៍នោះក៏នៅមិនបញ្ចប់ដូចគ្នា”។

ដ្បិតខកខានចូលរួមផលិតបទថ្មីជុំគ្នាក៏ពិតមែន តែ RM និង Jimin ក៏បានកោតសរសើរដល់ Jin ថា​ សមាជិករូបនេះពិតជាបានខិតខំប្រឹងប្រែង និង អរគុណដែលបានជួយក្រុម រហូតអាចឱ្យ BTS ចេញផ្សាយអាល់ប៊ុមនេះជូនអ្នកគាំទ្រ។

ទន្ទឹមគ្នានេះ Jungkook ក៏បានលើកទឹកចិត្ត Jin ដោយទះស្មាលោកតិចៗ ខណៈបងធំ BTS រូបនេះ ក៏បានអរគុណដល់សមាជិកទាំង ៦ដែលបាននិពន្ធបទពិរោះៗជាច្រើនសម្រាប់អាល់ប៊ុមថ្មីរបស់ក្រុម។  

ក្នុងនាមជាសមាជិកដែលមានអាយុច្រើនជាងគេប្រចាំក្រុម Jin គឺជាមនុស្សដំបូងគេដែលបានបញ្ចប់កាតព្វកិច្ចយោធា ពោល គឺនៅក្នុងខែមិថុនា ឆ្នាំ ២០២៤។ ក្រោយបំពេញការងារជូនជាតិរួច តារាប្រុសវ័យ ៣៣ឆ្នាំ បានចេញផ្សាយអាល់ប៊ុមទោលដំបូងដែលមានឈ្មោះថា Happy និងបានចាប់ផ្តើមដំណើរប្រគំតន្ត្រីទេសចរណ៍ពិភពលោកទោល Run Seokjin។

ដោយសារតែភាពមមាញឹកដែលនាំឱ្យមានកាលវិភាគត្រួតគ្នា បានធ្វើឱ្យ Jin​ ចូលរួមផលិតអាល់ប៊ុម​ Comeback នេះ យឺតជាងសមាជិកទាំង ៦នាក់ទៀត ដែលនាំឱ្យលោកមិនអាចផលិតចម្រៀងទាន់ពេលវេលានៅគ្រានោះ៕