ផលិតកម្មចម្រៀងកូរ៉េ YG Entertainment ទើបតែបង្ហើបឱ្យដឹងពីគម្រោងធំៗជាច្រើនរបស់ខ្លួន សម្រាប់ឆមាសទីពីរនៃឆ្នាំ ២០២៦ ខាងមុខនេះ។

ខណៈដែលត្រូវប្រារព្ធខួប ៣០ ឆ្នាំក្នុងឆ្នាំនេះ ផលិតកម្ម YG បានបង្ហាញយ៉ាងច្បាស់ពីកេរ្តិ៍ឈ្មោះដ៏អស្ចារ្យរបស់ខ្លួន ចាប់តាំងពីការត្រឡប់មកវិញដ៏ជោគជ័យរបស់ BLACKPINK រហូតដល់ការជួបជុំគ្នាឡើងវិញដែលមហាជនទន្ទឹងរង់ចាំជាយូរមកហើយរបស់ក្រុម Big Bang នៅលើឆាកតន្ត្រី ‘2026 Coachella’ ​នៅដើមឆ្នាំ២០២៦នេះ។ សម្រាប់ឆមាសទីពីរវិញ ត្រូវបានគេរំពឹងថា នឹងមានគម្រោងធំៗអស្ចារ្យកាន់តែច្រើនទៀត។

ផ្អែកតាមការចុះផ្សាយរបស់ Allkpop នៅថ្ងៃទី១៧ ខែមេសានេះ ជាដំបូង YG Entertainment គ្រោងនឹងបើកទំព័រថ្មីសម្រាប់ក្រុម Big Bang ជាមួយនឹងការប្រគំតន្ត្រីទេសចរណ៍ពិភពលោក ដែលគ្រោងនឹងធ្វើឡើងនៅពាក់កណ្តាលឆ្នាំ ២០២៦ ដើម្បីបញ្ជាក់ជាថ្មីនូវឥទ្ធិពលដ៏យូរអង្វែងរបស់ក្រុមនេះនៅក្នុងពិភព K-Pop។ ដោយឡែកនៅក្នុងប្រទេសកូរ៉េវិញ សិល្បករជំនាន់ក្រោយរបស់ YG គឺក្រុម TREASURE និង BABYMONSTER សុទ្ធតែមានផែនការចេញអាល់ប៊ុមថ្មីៗនៅឆមាសទីពីរនៃឆ្នាំ ២០២៦ ដូចគ្នា មុនពេលពួកគេចាប់ផ្តើមដំណើរទេសចរណ៍ប្រគំតន្ត្រីថ្មីៗរៀងខ្លួន។

ជាចុងក្រោយ YG Entertainment ក៏បានបង្ហើបពីការបង្ហាញគម្រោងក្រុមចម្រៀងបុរសថ្មី នៅក្រោយពាក់កណ្តាលឆ្នាំ ២០២៦ ផងដែរ។ បច្ចុប្បន្ន គម្រោងនេះកំពុងដំណើរការយ៉ាងសកម្ម ក្រោមការត្រួតពិនិត្យដោយផ្ទាល់ពីសំណាក់លោក Yang Hyun Suk ដែលជាប្រធានផលិតកររបស់ YG តាមរយៈការជ្រើសរើសអ្នកមានសមត្ថភាពពីការប្រឡងសមត្ថភាពជាសកល (Global Auditions) និងកម្មវិធីបណ្តុះបណ្តាលរបស់ YG ផ្ទាល់ ៕