ឡឺរេន ដែលធ្វើឲ្យទស្សនិកជនវៀតណាមចំហមាត់កាលពីពេលថ្មីៗនេះ មានបទពិសោធន៍ជោគជាំលើឆាកបង្ហាញម៉ូដតាំងពីអាយុ ៥ ឆ្នាំ

វីដេអូដែលម៉ូដែលខ្មែរវ័យក្មេង ឡឺរេន បានដើរបង្ហាញម៉ូដលើឆាក CAMUSE Bridal 2026 Collection នៃកម្មវិធី COSMIC ROYALE – RULE THE COSMO កាលពីពេលថ្មីៗ ហើយត្រូវបានមហាជនទាំងក្នុងស្រុកក៏ផ្ទាល់ភ្ញាក់ផ្អើលពីការបង្ហាញតិចនិកបង្វិលខ្លួនយ៉ាងល្អ មិនជាន់ស្បៃសក់ដល់វែងនោះ ធ្វើឲ្យអ្នកទស្សនាផ្ទាល់ដែលសុទ្ធសឹងជាតារាបង្ហាញម៉ូដ និងតារាម៉ូដែលស្រាប់ ឃើញហើយចំហមាត់ ព្រោះមិននឹកស្មានថាកុមារីរូបនេះ ធ្វើបានល្អអ៊ីចឹងឡើយ។

វ៉ា ជាងវ៉ាលឡឺរេន ចាប់ផ្ដើមជីវិតជាតារាបង្ហាញម៉ូដពីឆ្នាំ ២០២៣ មកម្ល៉េះ ដូចនេះចំណោទបញ្ហាការបង្ហាញម៉ូដបែបធម្មតាៗដូចកាលពីពេលថ្មីៗ ម៉ូដែលវ័យក្មេងរបស់កម្ពុជារូបនេះ ដោះស្រាយបានយ៉ាងស្រួល។

កុមារី ឡឺរេន ដែលមានសញ្ជាតិខ្មែរ និងអាមេរិក បានគ្រងឈុតកូនក្រមុំប៉ោងខ្លី តែស្បៃសក់វែងអូសដី សម្រាប់ CAMUSE Bridal 2026 Collection កាលពីថ្ងៃ២៥ ខែកក្កដា កន្លងទៅ។ ឡឺរេន បានបង្វិលខ្លួននៅចំពោះមុខទស្សនិកជន ដោយមិនឲ្យភ្លាត់ដួល ឬជាន់ស្បៃសក់វែងអូសដីនោះទេ ធ្វើឲ្យអ្នកទស្សនាជួរមុខដែលសុទ្ធសឹងមានអាជីពជាអ្នកដើរម៉ូដដែរនោះ មិននឹកស្មានដល់ថាម៉ូដែលតូចរូបនេះ អាចធ្វើបានយ៉ាងងាយ។

បើនិយាយថាការដែលធ្វើបានល្អដូចនេះយ៉ាងងាយ នោះក៏ព្រោះម៉ូដែលវ័យ ៨ ឆ្នាំរូបនេះ បានហាត់រៀនជាមួយគ្រូជំនាញត្រឹមត្រូវ។ ក្មេងស្រីតូចរូបនេះធ្លាប់មានបទពិសោធន៍ជោគជាំទាំងឆាកបង្ហាញម៉ូដក្នុងស្រុក និងក្រៅស្រុក ហើយក៏មានបទពិសោធន៍ក្នុងវិស័យបវរកញ្ញាទាំងក្មេងខ្ចីថែមទៀត។ អ្វីដែលកាន់តែពិសេស វ៉ា ជាងវ៉ាលឡឺរេន ធ្លាប់បង្ហាញខ្លួននៅ Milan Fashion Week 2023 ដែលគ្រានោះក៏ធ្វើឲ្យនាងតូច ទទួលបានការសរសើរពីភ្ញៀវចូលរួមទស្សនាដូចគ្នា។

មិនមែនតែពូកែផ្នែកបង្ហាញម៉ូដនោះ ចំណេះដឹងក៏ Mini Miss Cambodia 2024 រូបនេះទទួលបានការសិក្សានៅសាលាអន្តរជាតិ ហើយក៏បានហាត់រៀនរបាំបុរាណខ្មែរ។ វ៉ា ជាងវ៉ាលឡឺរេន មានម្ដាយជាជនជាតិខ្មែរ និងឪពុកជាជនជាតិបរទេសដែលមានសញ្ជាតិអាមេរិក៕

រូបភាព៖ Miss Cosmo Cambodia និង Leraine

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត