ស្ថាបនិកសាលាដូង អំពាវនាវសប្បុរសជនជួយធុងចម្រុះទឹកសម្រាប់ក្មេងតូចៗលើភ្នំគិរីរម្យ

ស្ថាបនិកសាលាដូងលោក អ៊ុក វណ្ណដេ ប្រកាសដំណឹងដល់សប្បុរសជនជិតឆ្ងាយ ដ្បិតថាពេលនេះកំពុងតម្រូវការធុងចម្រោះទឹកស្អាតសម្រាប់កុមារតូចៗលើភ្នំគិរីរម្យ ដែលកំពុងសិក្សារៀនសូត្រនៅក្នុងសាលាដូង។

ការប្រកាសស្វែងរកជំនួយជាថវិកា ដើម្បីទិញធុងចម្រោះទឹកស្អាតនាពេលនេះ ត្រូវបានស្ថាបនិកសាលាដូង ដែលមហាជនភាគច្រើនស្គាល់ថាជាលោក អ៊ុក វណ្ណដេ ឬ (អ្នកចម្បាំងសំរាម) ឱ្យដឹងបន្ថែមថា «លោកត្រូវការធុងទឹកស្អាត សម្រាប់ក្មេងៗ ១៦២ នាក់ ដែលធុងទឹកមួយនេះមានតម្លៃ ១ ៥០០ ដុល្លារ ហើយនេះជាចំណែកដែលជួយឱ្យក្មេងៗងាកមកផឹកទឹកជំនួសគ្រឿងផ្អែម។ នេះជាការលើកឡើងរបស់បុរសសម្ដីមុតស្រួចរូបនេះ ដ្បិតលោកពិតបារម្ភពីសុខុមាលភាពរបស់ក្មេងៗលើភ្នំគិរីរម្យ ណាចង់ឱ្យកូនសិស្សទាំងនោះទទួលបានសុខភាពល្អ ចៀសផុតឆ្ងាយពីជំងឺផងដែរ។

ដូចដែលមហាជនបានដឹងហើយថា សាលាដូងមានទីតាំងស្ថិតនៅលើភ្នំគិរីរម្យ។ សាលាសប្បុរសធម៌មួយនេះត្រូវបានបង្កើតឡើងដោយលោក អ៊ុក វណ្ណដេ ហើយគោលបំណងចម្បងរបស់សាលានេះគឺដើម្បីផ្ដល់ចំណេះវិជ្ជាទៅដល់ក្មេងៗខ្វះខាតដែលរស់នៅលើភ្នំគិរីរម្យឱ្យបានសិក្សារៀនសូត្រជាស្ពានចម្លងទៅថ្ងៃអនាគត៕

រូបភាព ៖ អ៊ុក វណ្ណដេ

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។