ល្អខ្លាំងណាស់! កំពង់ស្ពឺ រៀបចំពិធីប្រណាំងរទេះសាឡីគោលឿន ព្រោះជាប្រពៃណីបុរាណ និងមិនចង់ឱ្យបាត់បង់

ពិធីប្រណាំងរទេះសាឡីគោ ជាទំនៀមទម្លាប់ប្រពៃណីតាំងពីបុរាណ ដែលអ្នកស្រុកនាំគ្នាផ្ដួចផ្ដើមគំនិតរៀបចំធ្វើដើម្បីអបអរពិធីបុណ្យចូលឆ្នាំខ្មែរ។ ជាមួយគ្នា ខេត្តកំពង់ស្ពឺ បានបន្តរៀបចំពិធីបុណ្យមួយនេះតមកដល់បច្ចុប្បន្ន ដ្បិតចង់ថែរក្សា និងមិនចង់ឱ្យបាត់បង់តាមអាយុកាល។

តាមរយៈការជម្រាបជូនដំណឹងរបស់មន្ទីរវប្បធម៌ និងវិចិត្រសិល្បៈខេត្តកំពង់ស្ពឺ បានឱ្យដឹងថា មន្ទីរវប្បធម៌ខេត្តសហការជាមួយរដ្ឋបាលខេត្តកំពង់ស្ពឺ សហភាពសហព័ន្ធយុវជនកម្ពុជាខេត្តកំពង់ស្ពឺ រដ្ឋបាលក្រុងច្បារមន និងសមាគមរទេះសាឡីគោលឿនខេត្តកំពង់ស្ពឺ រៀបចំពិធីប្រណាំងរទេះសាឡីគោលឿន ជាថ្មីម្ដងទៀត ក្នុងឆ្នាំ ២០២៦ នៅមុនពិធីបុណ្យចូលឆ្នាំប្រពៃណីខ្មែរមកដល់។ ពិធីប្រណាំងរទេះសាឡីគោលឿន ឆ្នាំនេះ ប្រារព្ធធ្វើនា ថ្ងៃទី៥ ខែមេសា វេលាម៉ោង ៨ ព្រឹក នៅភូមិស្នោទី១ សង្កាត់រការធំ ក្រុងច្បារមន ខេត្តកំពង់ស្ពឺ។

ចំពោះគោលបំណងនៃការរៀបចំការប្រណាំងរទេះសាឡីគោលឿន ឆ្នាំ២០២៦នេះ គឺដើម្បីចូលរួមអភិរក្ស លើកស្ទួយ អភិវឌ្ឍ និងផ្សព្វផ្សាយឱ្យកាន់តែទូលំទូលាយនូវប្រពៃណីប្រណាំង រទេះសាឡីគោលឿននៅក្នុងខេត្តកំពង់ស្ពឺ ដែលបុព្វបុរសខ្មែរបានបន្សល់ទុកជាយូរណាស់មកហើយ។

បើតាមការសិក្សាអំពីប្រវត្តិនៃពិធីនេះគឺ ដើមឡើយរទេះសាឡីគោ ប្រើប្រាស់សម្រាប់តែដឹក ជញ្ជូនបណ្ណាការក្នុងពិធីអាពាហ៍ពិពាហ៍ និងដឹកជញ្ជូនលោកយាយ លោកតា ចូលរួមក្នុងពិធីអាអាពាហ៍ពិពាហ៍ ពិធីបុណ្យប្រពៃណី និងពិធីបុណ្យផ្សេងៗទៀតតែប៉ុណ្ណោះ លុះក្រោយៗមកទៀត អ្នកភូមិ ក៏បានផ្ដួចផ្ដើមគំនិត បង្កើតពិធីប្រណាំងរទេះសាឡីគោនេះ នៅតាមភូមិ និងតាមសហគមន៍ រហូតនៅតាមទីប្រជុំជន ដើម្បីអបអរមុនពិធីបុណ្យចូលឆ្នាំថ្មីប្រពៃណីជាតិ ឈានចូលមកដល់៕

រូបភាព ៖ មន្ទីរវប្បធម៌ និងវិចិត្រសិល្បៈខេត្តកំពង់ស្ពឺ & Sopheakphat

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។