នៅក្នុងសម័យកាលដែលគ្រប់គ្នាសុទ្ធតែមមាញឹកនឹងការងារ ការផ្តល់ពេលវេលាដល់គូស្នេហ៍គឺជាកត្តាចម្បងក្នុងការរក្សាតុល្យភាពរវាងការងារ និងសេចក្តីស្នេហា។ ទោះបីជាការងារគឺជាទំនួលខុសត្រូវដ៏សំខាន់ ប៉ុន្តែវាមិនមែនមានន័យថា ការផ្តល់អាទិភាពលើការងាររហូតភ្លេចគិតគូរដល់ដៃគូនោះជារឿងត្រឹមត្រូវឡើយ។

ការចេះគ្រប់គ្រងពេលវេលាប្រកបដោយប្រសិទ្ធភាព និងការនិយាយគ្នាឱ្យបានច្បាស់លាស់ គឺជាគន្លឹះដែលធ្វើឱ្យចំណងស្នេហានៅតែមានក្ដីសុខ ទោះបីជាមានបន្ទុកការងារច្រើនយ៉ាងណាក៏ដោយ។ ការបង្កើត Work-Love Balance គឺជាសិល្បៈនៃការរស់នៅដែលគូស្នេហ៍គ្រប់គូគួររៀនសូត្រ និងអនុវត្តតាមវិធីសាស្ត្រខាងក្រោម៖

គុណភាពសំខាន់ជាងបរិមាណ៖ ការចំណាយពេលជាមួយគ្នាត្រឹមតែរយៈពេលខ្លី ប៉ុន្តែពោរពេញដោយការយកចិត្តទុកដាក់ និងការចែករំលែកអារម្មណ៍ពិតឱ្យគ្នាទៅវិញទៅមក នឹងបង្កើតឱ្យមានពេលវេលាប្រកបដោយគុណភាព។ ទោះបីមានរយៈពេលខ្លី ប៉ុន្តែ Quality Time មានអត្ថន័យជ្រាលជ្រៅជាងការនៅក្បែរគ្នាពេញមួយថ្ងៃ តែម្នាក់ៗរវល់តែចុចទូរស័ព្ទ ឬធ្វើការរៀងៗខ្លួន។

បើកចិត្តនិយាយពីគោលបំណងរបស់ខ្លួន៖ គូស្នេហ៍គួរនិយាយគ្នាឱ្យត្រង់ទៅត្រង់មកអំពីតម្រូវការ ការរំពឹងទុក និងបញ្ហាពេលវេលា ដើម្បីស្វែងរកដំណោះស្រាយរួមគ្នា ការពារការអន់ចិត្ត។ ប្រសិនបើភាគីដែលរវល់ពិតជាមានចេតនាចង់ដោះស្រាយបញ្ហា បុគ្គលនោះនឹងព្យាយាមរកចំណុចកណ្តាល។ ទោះបីជាដំណោះស្រាយនោះមិនទាន់អាចបំពេញតាមតម្រូវការរបស់ភាគីម្ខាងទៀតបាន ១០០ ភាគរយក៏ដោយ ក៏វាប្រសើរជាងការនៅស្ងៀមដែរ។

បង្កើតទម្លាប់តូចៗប្រចាំថ្ងៃ៖ ក្នុងកាលៈទេសៈដែលពិបាកចំណាយពេលវែងជាមួយគ្នា ការបង្កើតទម្លាប់តូចៗគឺជារឿងចាំបាច់ ជាពិសេសសម្រាប់អ្នកដែលរស់នៅជាមួយគ្នា។ សកម្មភាពសាមញ្ញៗដូចជា ការញ៉ាំអាហារពេលព្រឹកជាមួយគ្នា ឬការមើលរឿងមុនចូលគេង គឺជាថ្នាំបំប៉នដ៏ល្អសម្រាប់ទំនាក់ទំនង។

ប្រើប្រាស់បច្ចេកវិទ្យាជាជំនួយ៖ ទោះរវល់យ៉ាងណា ការផ្ញើសារខ្លីៗដើម្បីសួរនាំ បង្ហាញការយកចិត្តទុកដាក់ ឬផ្តល់កម្លាំងចិត្ត និងការឆ្លើយតបសារភ្លាមៗនៅពេលទំនេរ នឹងជួយឱ្យដៃគូមានអារម្មណ៍ថាខ្លួននៅតែជាអាទិភាព នៅតែជាទីនឹកដល់។

ការយោគយល់គ្នា៖ នៅពេលដែលភាគីម្ខាងមានគម្រោងការងារសំខាន់ ឬត្រូវប្រឈមមុខការមមាញឹកខ្លាំង ភាគីម្ខាងទៀតត្រូវចេះយោគយល់ មិនដាក់សម្ពាធបន្ថែម និងផ្តល់កម្លាំងចិត្តឱ្យគ្នាទៅវិញទៅមក។

កុំភ្លេចមើលថែខ្លួនឯង៖ តុល្យភាពការងារ និងស្នេហាកើតឡើងទៅបាន លុះត្រាតែអ្នកមានសុខភាពល្អទាំងកាយនិងចិត្ត។ នៅពេលអ្នកមានកម្លាំងពេញលេញ អ្នកនឹងអាចផ្តល់ក្តីស្រឡាញ់ដល់ដៃគូ និងបំពេញការងារបានល្អទាំងព្រម។

តុល្យភាពរវាងការងារ និងស្នេហា មិនមែនមានន័យថាត្រូវបែងចែកពេលវេលាឱ្យស្មើគ្នា ៥០/៥០ នោះទេ ប៉ុន្តែវាគឺជាការចេះគ្រប់គ្រងពេលវេលា និងកម្លាំងកាយចិត្តឱ្យស្របតាមតម្រូវការរបស់ភាគីទាំងសងខាង។ វាមិនមែនជារឿងងាយស្រួលឡើយ តែវាទាមទារឱ្យមានការយោគយល់ ការបត់បែន និងការខិតខំប្រឹងប្រែងរួមគ្នា ដើម្បីឱ្យទាំងអាជីពការងារ និងជីវិតស្នេហាអាចរីកចម្រើនទៅមុខបានយ៉ាងល្អ៕