ឡុងដ៍ ៖ ​អង់គ្លេស និង បារាំង នៅថ្ងៃអង្គារ ​ទី១២ ឧសភា​ ស្អែកនេះ នឹងរៀបចំកិច្ចប្រជុំពហុជាតិ នៃ រដ្ឋមន្ត្រីការពារជាតិ ៤០ប្រទេស ស្តីពីផែនការយោធា ដើម្បីស្តារលំហូរពាណិជ្ជកម្ម តាមរយៈច្រកសមុទ្រ ហ័រមូស នេះបើតាមការបញ្ជាក់ របស់រដ្ឋាភិបាលទីក្រុងឡុងដ៍។
 
សេចក្តីថ្លែងការណ៍របស់ក្រសួងការពារជាតិអង់គ្លេស ចេញផ្សាយ កាលពីថ្ងៃអាទិត្យ​ រៀបរាប់ ថា «លោក រដ្ឋមន្ត្រីការពារជាតិ John Healey នឹងធ្វើជាសហប្រធាន នៃកិច្ចប្រជុំជាង ៤០ ប្រទេស រួមជាមួយនឹងសមភាគីបារាំង​ ​ សម្រាប់កិច្ចប្រជុំរដ្ឋមន្ត្រីការពារជាតិ លើកដំបូង របស់បេសកកម្ម ចម្រុះជាតិសាសន៍» ។
 
រដ្ឋមន្ត្រីការពារជាតិអង់គ្លេស លោក Healey បាននិយាយថា «យើងកំពុងប្រែក្លាយកិច្ចព្រមព្រៀងការទូត ទៅជាផែនការយោធាជាក់ស្តែង ដើម្បីស្តារទំនុកចិត្តឡើងវិញ សម្រាប់ការដឹកជញ្ជូន តាមរយៈច្រកសមុទ្រ Hormuz»។
 
បើតាម CNA, ​កិច្ចប្រជុំនេះត្រូវកើតឡើង ចំពេលដែលបារាំង និងអង់គ្លេស បញ្ជូននាវាចម្បាំង ទៅកាន់តំបន់មជ្ឈិមបូព៌ា។
 
ប្រទេសបារាំងបានបញ្ជូននាវាផ្ទុកយន្តហោះ ដើរដោយថាមពលនុយក្លេអ៊ែរ​ Charles de Gaulle ទៅកាន់តំបន់នេះ ហើយ ចក្រភពអង់គ្លេស កាលពីថ្ងៃសៅរ៍ បាននិយាយថា ខ្លួននឹងកំពុងបញ្ជូននាវាពិឃាត HMS Dragon ទៅកាន់ទីនោះ ផងដែរ៕
 
ប្រភពពី CNA ប្រែសម្រួល ៖ សារ៉ាត