ស្តុកខុល ៖ ប្រទេសឥណ្ឌា និង ស៊ុយអែត បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ អំឡុងដំណើរទស្សនកិច្ច របស់លោកនាយករដ្ឋមន្ត្រី Narendra Modi នៅទីក្រុងស្តុកខុល។

កិច្ចព្រមព្រៀងភាពជាដៃគូយុទ្ធសាស្ត្រនេះ មានគោលបំណងបង្កើនពាណិជ្ជកម្ម និង ការវិនិយោគរបស់ប្រទេសទាំងពីរ ឲ្យកើនឡើងទ្វេដង ក្នុងរយៈពេល ៥ឆ្នាំ ខាងមុខ នេះបើតាមខ្លឹមសារជំនួប រវាង លោក Ulf Kristersson នាយករដ្ឋមន្រ្តីស៊ុយអែត និង លោក Narendra Modi នាយករដ្ឋមន្ត្រីឥណ្ឌា កាលពីថ្ងៃអាទិត្យ។

នៅក្នុងសន្និសីទសារព័ត៌មាន លោក Kristersson បាននិយាយថា «យើងមានមហិច្ឆតារួមគ្នា ក្នុងការធ្វើពាណិជ្ជកម្មទ្វេភាគី និងការវិនិយោគទ្វេភាគីរបស់យើង ក្នុងរយៈពេល ៥ ឆ្នាំ …ខ្ញុំពិតជាជឿថា វាអាចក្លាយជាការពិត កាន់តែឆាប់»។

លោក Modi បាននិយាយថា «ក្រោមភាពជាដៃគូនេះ យើងនឹងឆ្ពោះទៅមុខ លើសសរស្តម្ភសំខាន់ៗ ដូចជា ការផ្លាស់ប្តូរពណ៌បៃតង, ការការពារជាតិ , បច្ចេកវិទ្យា ដែលកំពុងរីកចម្រើន និង ទំនាក់ទំនងរវាងប្រជាជននិងប្រជាជន»។

បើតាម AFP, ពាណិជ្ជកម្មប្រចាំឆ្នាំ រវាងប្រទេសទាំងពីរ បច្ចុប្បន្ន មានចំនួន ៧,៧៥ ពាន់លានដុល្លារ។
អំឡុងដំណើរទស្សនកិច្ច នៅសហភាពអឺរ៉ុប, នាយករដ្ឋមន្ត្រីឥណ្ឌា លោក Narendra Modi ក៏ទៅប្រទេសន័រវែស និង អ៊ីតាលី ផងដែរ៕

ប្រភពពី AFP ប្រែសម្រួល ៖ សារ៉ាត