វ៉ាស៊ីនតោន ៖ សហរដ្ឋអាមេរិកត្រៀមដកលុយចេញពីហោប៉ៅរហូតដល់ ២៧៥ ពាន់លានដុល្លារ ដើម្បីចំណាយលើកម្មវិធីសាងសង់នាវាចម្បាំងដើរដោយថាមពលនុយក្លេអ៊ែរប្រភេទ Trump-Class ថ្មីៗចំនួន ១៥គ្រឿង ដែលជានាវាចម្បាំងទំនើប និងធំបំផុតក្នុងពិភពលោក ។ នេះបើតាមរបាយការណ៍របស់ការិយាល័យថវិកាសភាអាមេរិក ហៅកាត់ CBO កាលពីថ្ងៃ ពុធ ។

ផ្អែកតាម Defense news, នាវាចម្បាំងដើរដោយថាមពលនុយក្លេអ៊ែរប្រភេទ Trump-class ដំបូងគេ ប្រហែលជាមានតម្លៃប្រហែល ២៣,៤ ពាន់លានដុល្លារ ហើយការសាងសង់អាចនឹងចាប់ផ្តើមនៅឆ្នាំ ២០២៨ និងប្រើពេលរហូតដល់ ៨ ឆ្នាំទើបរួចរាល់ ។

កាលពីខែធ្នូឆ្នាំមុន រដ្ឋបាលលោកប្រធានាធិបតី Trump បានប្រកាសពីបំណងសាងសង់នាវាចម្បាំងបំពាក់មីស៊ីលនាំផ្លូវដ៏ទំនើបបំផុត ដែលដាក់តាមឈ្មោះរបស់លោក ។ ទោះបីជាលោក Trump បានហៅពួកវាថា នាវាចម្បាំងពិសេសបំផុតគ្មានគូប្រៀបក៏ដោយ ប៉ុន្តែបើមើលលើរូបរាង និងអាវុធ គឺស្រដៀងគ្នាទៅនឹងនាវាចម្បាំង និងនាវាពិឃាតធំៗរបស់ប្រទេសដទៃទៀតដែរ ។

ប្រសិនបើត្រូវបានចាប់ផ្តើមសាងសង់, នាវាចម្បាំងដើរដោយថាមពលនុយក្លេអ៊ែរមានទម្ងន់ប្រហែល ៣៥,០០០ តោននេះ នឹងក្លាយជាអធិរាជនៅលើផ្ទៃទឹក ដែលបំពាក់ដោយអាវុធធុនធ្ងន់បំផុតមិនធ្លាប់មានក្នុងប្រវត្តិសាស្រ្តកងទ័ពជើងទឹកអាមេរិក ។

បើតាមរបាយការណ៍, វាត្រូវបានគេគ្រោងបំពាក់មីស៊ីលប្រឆាំងយន្តហោះ, មីស៊ីលវាយប្រហារទៅដីគោក និងប្រឆាំងនាវា, មីស៊ីលលឿនជាងសំឡេង, មីស៊ីលនាំផ្លូវនុយក្លេអ៊ែរ, កាំភ្លើងឡាស៊ែរធំៗ និងកាំភ្លើងយន្ត ។

នៅពេលសាងសង់រួច នាវាចម្បាំងនេះ ត្រូវបានគេរំពឹងថា នឹងក្លាយជានាវាចម្បាំងធំបំផុតក្នុងពិភពលោក និងធំជាងនាវាចម្បាំងទាំងឡាយ ដែលបណ្តាប្រទេសនានាសាងសង់ឡើងសម្រាប់កងទ័ពជើងទឹក ចាប់តាំងពីសង្គ្រាមលោកលើកទី២មក ។

ទន្ទឹមគ្នា កងទ័ពជើងទឹកអាមេរិក ព្យាករថា នៅចន្លោះឆ្នាំ ២០២៨ ដល់ឆ្នាំ ២០៥៦ ខ្លួននឹងទទួលបាននាវាចម្បាំងដើរដោយថាមពលនុយក្លេអ៊ែរប្រភេទ Trump-Class សរុបចំនួន ១៥គ្រឿង ដោយ ១៤គ្រឿងបន្ទាប់ ប្រហែលជាមានតម្លៃ ១៨ ពាន់លានដុល្លារក្នុងមួយគ្រឿង ៕

ប្រភព ៖ Defense news ប្រែសម្រួល ៖ ឈឹម ទីណា