តេហេរ៉ង់ ៖ អគ្គលេខាធិការក្រុមប្រឹក្សាសន្តិសុខអ៊ីរ៉ង់បានប្រកាសកាលពីថ្ងៃសៅរ៍ថា ច្រកសមុទ្រហ័រមូស (Hormuz) នឹងមិនត្រូវបានបើកឡើងវិញឡើយ រហូតទាល់តែសហរដ្ឋអាមេរិកផ្លាស់ប្តូរឥរិយាបថរបស់ខ្លួន។

យោងតាមសារព័ត៌មាន Anadolu, លោក Zulqadr អគ្គលេខាធិការក្រុមប្រឹក្សាសន្តិសុខអ៊ីរ៉ង់ បានចេញសេចក្តីថ្លែងការណ៍ជាលាយលក្ខណ៍អក្សរមួយពាក់ព័ន្ធនឹងបញ្ហានេះ។

លោក Zulqadr បានបញ្ជាក់ថា ការបើកច្រកសមុទ្រហ័រមូសឡើងវិញគឺអាស្រ័យលើការផ្លាស់ប្តូរជំហររបស់សហរដ្ឋអាមេរិក ដោយលោកបានលើកឡើងថា «ច្រកសមុទ្រហ័រមូសនឹងមិនត្រូវបានបើកឡើងវិញឡើយ រហូតទាល់តែសហរដ្ឋអាមេរិកកែតម្រូវឥរិយាបថរបស់ខ្លួន»។

លោក Zulqadr បានបញ្ជាក់ថា ដើម្បីឱ្យច្រកសមុទ្រហ័រមូសអាចបើកឡើងវិញបាន សហរដ្ឋអាមេរិកត្រូវតែដោះលែងទ្រព្យសម្បត្តិរបស់អ៊ីរ៉ង់ ដែលត្រូវបានបង្កកដោយគ្មានលក្ខខណ្ឌ, បញ្ឈប់ការបិទខ្ទប់ផ្លូវសមុទ្រ, ដកកងកម្លាំងជើងទឹក និងទ័ពអាកាសរបស់ខ្លួនចេញពីតំបន់ជុំវិញប្រទេសអ៊ីរ៉ង់, លុបចោលការដាក់ទណ្ឌកម្ម និងសងសំណងសម្រាប់សង្គ្រាម ពីរលើកចុងក្រោយដែលខ្លួនបានធ្វើឡើងប្រឆាំងនឹងអ៊ីរ៉ង់។

មន្ត្រីអ៊ីរ៉ង់រូបនេះក៏បានដាក់ចេញនូវលក្ខខណ្ឌផងដែរថា សហរដ្ឋអាមេរិកត្រូវបញ្ឈប់សង្គ្រាមប្រឆាំងនឹងសម្ព័ន្ធមិត្តរបស់អ៊ីរ៉ង់ នៅក្នុងប្រទេសលីបង់, ប៉ាឡេស្ទីន, យេម៉ែន និងអ៊ីរ៉ាក់ ព្រមទាំងត្រូវជៀសវាងការគំរាមកំហែងដល់អ៊ីរ៉ង់ និង មិនត្រូវប្រមាថមើលងាយតម្លៃដ៏ពិសិដ្ឋរបស់ប្រជាជាតិអ៊ីរ៉ង់នោះឡើយ៕

ប្រភព ៖ ប្រែសម្រួល ៖ សារ៉ាត