វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃ ចន្ទ បានបដិសេធឆ្លើយសំណួរពាក់ព័ន្ធនឹងការបន្តចរចាជាមួយអ៊ីរ៉ង់ ប៉ុន្តែលោកបានព្រមានធ្ងន់ៗថា ការប្រើប្រាស់កម្លាំងយោធាទ្រង់ទ្រាយធំមិនធ្លាប់មាន នឹងនៅតែជាជម្រើសលើតុ ។

នៅពេលត្រូវបានអ្នកសារព័ត៌មានសាកសួរថាតើការវាយប្រហារទ្រង់ទ្រាយធំប្រឆាំងនឹងសាធារណៈរដ្ឋឥស្លាមអ៊ីរ៉ង់ នៅតែជាជម្រើសដែរទេ ? លោក ត្រាំ បានឆ្លើយតបច្បាស់ៗថា សហរដ្ឋអាមេរិកមានសមត្ថភាពជ្រើសរើសជម្រើសបែបនេះ ប្រសិនបើលោកសម្រេចចិត្តធ្វើរឿងនោះ ប្រសិនបើការចរចាមិនអាចឈានដល់កិច្ចព្រមព្រៀង ប៉ុន្តែអ្នកនឹងដឹងនៅពេលក្រោយ ។

ប្រធានាធិបតីអាមេរិករូបនេះបន្ថែមថា សហរដ្ឋអាមេរិកនឹងទាមទារលុយសំណងការខូចខាត ដែលអ៊ីរ៉ង់បានបង្កឡើងក្នុងអំឡុងពេល ៥០ ឆ្នាំកន្លងមកនេះ ដើម្បីឆ្លើយតបការដែលទីក្រុងតេហេរ៉ង់ទាមទារលុយសងការខូចខាត ដោយសារការវាយប្រហាររបស់សហរដ្ឋអាមេរិក និងអ៊ីស្រាអែល ។

លោក ត្រាំ ដែលមានវ័យ៨០ឆ្នាំរូបនេះ បានសង្កត់ធ្ងន់ថា ប្រសិនបើមានការទាមទារលុយសងការខូចខាត នោះលោកគិតថា អ៊ីរ៉ង់ក៏ត្រូវតែសងថ្លៃខូចខាតទាំងនោះត្រឡប់មកវិញផងដែរ ។

ការអះអាងបែបនេះរបស់លោក ត្រាំ ធ្វើឡើងបន្ទាប់ពីអ៊ីរ៉ង់បានទាមទារលុយសំណងពីអាមេរិកក្នុងទំហំទឹកប្រាក់ចំនួន ៣០០ពាន់លានដុល្លារ ជាថ្នូរនឹងការស្តារប្រទេសឡើងវិញ និងជាលក្ខខណ្ឌក្នុងការបញ្ចប់ជម្លោះ ឬបើកច្រកសមុទ្រ Hormuz ឡើងវិញ ៕

ប្រភព ៖ Anadolu ប្រែសម្រួល ៖ ឈឹម ទីណា