ដាម៉ាស ៖ ទីភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិ ហៅកាត់ IAEA បានរាយការណ៍ កាលពីថ្ងៃអង្គារថា បានរកឃើញសម្ភារៈនុយក្លេអ៊ែរជាច្រើនតោន នៅទីតាំងមួយកន្លែង នៅក្នុងប្រទេសស៊ីរី។

ប្រធានទីភ្នាក់ងារ UN មួយនេះ បាននិយាយថា សម្ភារៈទាំងនោះ ត្រូវបានរកឃើញ នៅឯទីតាំងមួយ ដែលទីក្រុងដាម៉ាសបានរាយការណ៍ជូនទីភ្នាក់ងារ IAEA កាលពីខែមុន។

ថ្លែងនៅក្នុងសន្និសីទសារព័ត៌មានមួយ នៅទីក្រុងដាម៉ាស, លោក Rafael Grossi ប្រធាន IAEA បានកោតសរសើរចំពោះ “ការសម្រេចចិត្តដ៏ក្លាហាន” របស់ទីក្រុងដាម៉ាស ក្នុងការរាយការណ៍អំពីទីតាំង ដែលមិនធ្លាប់ត្រូវបានប្រកាសជាសាធារណៈពីមុនមក និងជាទីតាំង មានតាំងពីសម័យកាល នៃការគ្រប់គ្រង របស់អតីតមេដឹកនាំ Bashar-al-Assad។

លោកបានមានប្រសាសន៍ថា ក្នុងចំណោមការរកឃើញ មានសម្ភារៈនុយក្លេអ៊ែរ ពីរ ៣ តោន ដែលអាចត្រូវបានគេយកទៅប្រើប្រាស់ក្នុងផ្លូវខុស។

រដ្ឋមន្ត្រីការបរទេសស៊ីរី លោក Asaad al-Shaibani បានមានប្រសាសន៍ដែរថា ផ្អែកតាមការវាយតម្លៃផ្នែកបច្ចេកទេស សម្ភារៈទាំងនោះមិនបង្កហានិភ័យអ្វីឡើយ ហើយ នៅតែស្ថិតក្រោមការគ្រប់គ្រងរបស់ជាតិស៊ីរី ប៉ុន្តែ ស្ថិតក្រោមប្រព័ន្ធត្រួតពិនិត្យសុវត្ថិភាព របស់ទីភ្នាក់ងារ UN។

លោកបន្ថែមថា «យើងកំពុងចាប់ផ្តើមបើកទំព័រថ្មីមួយ ហើយការបើកទំព័រថ្មី មិនមែនមានន័យថា ជាការបំភ្លេចអតីតកាលនោះទេ»៕

ប្រភព ៖ AFP ប្រែសម្រួល ៖ សារ៉ាត