សម្តេចតេជោ ហ៊ុន សែន គ្រោងបំពេញទស្សនកិច្ចនៅប្រទេសរុស្ស៊ីនាពេលខាងមុខ ដើម្បីបន្តពង្រឹងទំនាក់ទំនង និងកិច្ចសហប្រតិបត្តិការប្រទេសទាំងពីរ។ នេះបើតាមការបញ្ជាក់របស់លោក ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចប្រធានព្រឹទ្ធសភា អនុញ្ញាតឱ្យឯកឧត្តម Andrey Rudenko អនុរដ្ឋមន្ត្រីការបរទេសរុស្ស៊ី ចូលជួបសម្តែងការគួរសម និងពិភាក្សាការងារ នៅវិមានសន្តិភាពនៃព្រឹទ្ធសភា កាលពីរសៀលថ្ងៃទី២៤ ខែសីហា ឆ្នាំ២០២៦។

ក្នុងជំនួបនេះ សម្តេចតេជោ ហ៊ុន សែន បានស្វាគមន៍ដំណើរទស្សនកិច្ចរបស់អនុរដ្ឋមន្ត្រីការបរទេសរុស្ស៊ី ដោយចាត់ទុកថា ជាការរួមចំណែកដល់ការពង្រឹងទំនាក់ទំនងរវាងប្រទេសទាំងពីរ។ ឆ្នាំ២០២៦នេះ កម្ពុជា និងរុស្ស៊ីប្រារព្វខួប ៧០ឆ្នាំនៃទំនាក់ទំនងការទូត រវាងប្រទេសទាំងពីរ។

អនុរដ្ឋមន្ត្រីការបរទេសរុស្ស៊ីបានលើកឡើងពីសារៈសំខាន់នៃតួនាទីរបស់សម្តេចតេជោ ក្នុងការរួមចំណែកពង្រឹងទំនាក់ទំនងកម្ពុជា-រុស្ស៊ី និងបានបញ្ជាក់ពីការត្រៀមខ្លួនរបស់រុស្ស៊ីក្នុងការជំរុញពាណិជ្ជកម្មទ្វេភាគី។

ជាមួយគ្នានេះ សម្តេចតេជោបានស្វាគមន៍ការពិភាក្សារបស់លោក Andrey Rudenko ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលផ្តោតលើ ពាណិជ្ជកម្ម និងសេដ្ឋកិច្ច ដោយចាត់ទុកថា វិស័យទាំងនេះគឺជាសសរស្តម្ភសំខាន់មួយសម្រាប់ពង្រឹងទំនាក់ទំនងប្រទេសទាំងពីរ។

សម្ដេចតេជោបានរំលឹកអំពីប្រវត្តិនៃទំនាក់ទំនងរវាងកម្ពុជា និងរុស្ស៊ី ជាពិសេសគឺការរួមចំណែករបស់សម្ដេចផ្ទាល់ តាំងពីសម្ដេចនៅជារដ្ឋមន្ត្រីការបរទេស រហូតដល់សម្ដេចធ្វើជានាយករដ្ឋមន្ត្រី ដោយបានធ្វើដំណើរទស្សនកិច្ចទៅកាន់ប្រទេសរុស្ស៊ីជាច្រើនលើក និងបានធ្វើកិច្ចការជាមួយមេដឹកនាំរុស្ស៊ីជាច្រើនកន្លងមក។ សម្តេចតេជោបានថ្លែងអំណរគុណដល់រដ្ឋាភិបាលរុស្ស៊ី ដែលបានគាំទ្រកម្ពុជាជាបន្តបន្ទាប់ ជាពិសេសក្នុងការបណ្តុះបណ្តាល ធនធានមនុស្ស។

ចំណុចសំខាន់មួយទៀតក្នុងជំនួបនេះ គឺ ការរៀបចំដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសរុស្ស៊ី។ លោក Andrey Rudenko បានបញ្ជាក់ថា ថ្នាក់ដឹកនាំរុស្ស៊ី រួមទាំងលោកប្រធានាធិបតី Vladimir Putin កំពុងរង់ចាំដំណើរទស្សនកិច្ចរបស់សម្តេចតេជោនាពេលឆាប់ៗខាងមុខ។

យោងតាមលោក ជា ធីរិទ្ធ សម្ដេចតេជោបានបញ្ជាក់ថា នៅពេលនេះ សម្ដេចកំពុងតែពិនិត្យមើលកាលបរិច្ឆេទ ដើម្បីកំណត់ដំណើរទស្សនកិច្ចទៅកាន់ប្រទេសរុស្ស៊ី។ ទន្ទឹមនេះ កម្ពុជាក៏ត្រៀមទទួលដំណើរទស្សនកិច្ចរបស់ប្រធានគណបក្សរុស្ស៊ីរួបរួមផងដែរ។ បច្ចុប្បន្ន ប្រធានគណបក្សរុស្ស៊ីរួបរួម គឺលោកអតីតប្រធានាធិបតី Dmitry Medvedev។ ការផ្លាស់ប្តូរទស្សនកិច្ចកម្រិតខ្ពស់នាពេលខាងមុខនេះ នឹងក្លាយជាកម្លាំងចលករជំរុញដល់ការពង្រឹងទំនាក់ទំនង និងកិច្ចសហប្រតិបត្តិការ កម្ពុជា-រុស្ស៊ី៕