ខេត្តតាកែវ៖ ឯកឧត្តមបណ្ឌិត ជា វ៉ាន់ដេត បានមានប្រសាសន៍ បានណែនាំដល់ក្រុមការងារ និងអាជ្ញាធរមូលដ្ឋាន ទូទាំងខេត្តតាកែវ ឱ្យយកចិត្តទុកដាក់ខ្ពស់បំផុតចំពោះបងប្អូនភៀសសឹក វីរកងទ័ពនិងគ្រួសារវីរកងទ័ព ស្របតាមអនុសាសន៍ដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន ប្រមុខគណបក្សប្រជាជនកម្ពុជា។

ឯកឧត្តម បណ្ឌិត ជា វ៉ាន់ដេត សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តតាកែវ មានប្រសាសន៍បែបនេះ កាលពីព្រឹកថ្ងៃទី១៧ ខែឧសភា ឆ្នាំ២០២៦ ក្នុងឱកាសអញ្ជើញដឹកនាំកិច្ចប្រជុំផ្សព្វផ្សាយផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ ដោយមានការចូលរួមពី អនុប្រធាន សមាជិក សមាជិកាក្រុមការងារគណបក្សចុះមូលដ្ឋាន ក្រុង ស្រុក ឃុំ សង្កាត់ និងសមាជិកក្រុមប្រឹក្សាឃុំ សង្កាត់ ទាំង ១០០ នៃខេត្តតាកែវ នៅទីស្នាក់ការគណបក្សប្រជាជនកម្ពុជាខេត្តតាកែវ។

ឆ្លៀតក្នុងឱកាសនេះ ឯកឧត្តម ក៏បានធ្វើការណែនាំដល់សមាជិក សមាជិកា នៃអង្គពិធីទាំងអស់ត្រូវខិតខំអនុវត្តឱ្យបានពេញលេញចំពោះផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ ដែលបានដាក់ចេញដោយគណបក្សប្រជាជនកម្ពុជា។

បន្ថែមលើនេះ ប្រធានក្រុមការងារគណបក្សចុះមូលដ្ឋានខេត្តតាកែវ ក៏បានធ្វើការណែនាំដល់ប្រធាន អនុប្រធាន និងក្រុមការងារចុះមូលដ្ឋានទាំងអស់ ត្រូវបន្តចុះជួបប្រជាពលរដ្ឋក្នុងមូលដ្ឋាន ដោយរៀបចំជាវេទិកាសាធារណៈដើម្បីបានស្វែងយល់ពីតម្រូវការ និងដោះស្រាយបញ្ហាប្រឈមនានា។ ចំពោះសមាជិកក្រុមប្រឹក្សាឃុំ សង្កាត់ ត្រូវខិតខំផ្តល់សេវាសាធារណៈជូនប្រជាពលរដ្ឋក្នុងមូលដ្ឋានឱ្យកាន់តែល្អប្រសើរបន្ថែមទៀត៕

អត្ថបទ៖ង៉ាន់ ទិត្យ
រូបភាព៖រិន រចនា