កម្ពុជា បានចាប់ផ្តើមបេសកកម្មជិះម៉ូតូ ពីរាជធានីភ្នំពេញទៅកាន់ទីក្រុងមីឡាន ប្រទេសអ៊ីតាលី ដើម្បីនាំយកម៉ូតូផលិតនៅកម្ពុជា ទៅដាក់តាំងបង្ហាញឲ្យពិភពលោកបានស្គាល់ក្នុងពិព័រណ៍ម៉ូតូអន្តរជាតិ ឆ្នាំ២០២៦។ បេសកកម្មនេះក៏ជាផ្នែកមួយដើម្បីផ្សព្វផ្សាយសក្តានុពលទេសចរណ៍កម្ពុជាផងដែរ។
 
បេសកកម្មប្រកបដោយមោទនភាពមួយរបស់កម្ពុជាបានបានចាប់ផ្តើមហើយ គឺការជិះម៉ូតូលើចម្ងាយផ្លូវប្រមាណ ៣ម៉ឺនគីឡូម៉ែត្រ ពីរាជធានីភ្នំពេញទៅកាន់ទីក្រុងមីឡាន ប្រទេសអ៊ីតាលី ដោយឆ្លងកាត់ជាង១៤ប្រទេស ​​ដើម្បីចូលរួមក្នុងពិព័រណ៍ម៉ូតូអន្តរជាតិ EICMA ដែលនឹងប្រារព្ធឡើងពីថ្ងៃទី៥ ដល់ថ្ងៃទី៨ ខែវិច្ឆិកា ឆ្នាំ២០២៦។
 
ពិធីបើកជាផ្លូវការបេសកកម្មបើកបរម៉ូតូម៉ាក CALYPSO XPLORER ពីកម្ពុជាឆ្ពោះទៅកាន់ពិព័រណ៍នៅទីក្រុងមីឡាននេះ ត្រូវបានរៀបចំឡើងកាលពីព្រឹកថ្ងៃទី៩ ខែកក្កដា នៅផ្សារទំនើប ជីបម៉ុង មេហ្គាម៉ល ២៧១ ដោយមានការចូលរួមពីឯកឧត្តម ហួត ហាក់ រដ្ឋមន្រ្តីក្រសួងទេសចរណ៍។
 
ឯកឧត្តមបាន​បង្ហាញមោទនភាព​ចំពោះការបង្ហាញសមត្ថភាពនៃឧស្សាហកម្មយានយន្តក្នុងស្រុករបស់កម្ពុជាទៅកាន់ឆាកអន្តរជាតិ។
  
ឯកឧត្តម ហួត ហាក់ បានកោតសរសើរចំពោះគំនិតផ្ដួចផ្ដើមរបស់ក្រុមហ៊ុន Calypso Motors និងការគាំទ្រពីក្រុមហ៊ុន ជីប ម៉ុង ដោយគូសបញ្ជាក់ថា បេសកកម្មនេះមិនមែនគ្រាន់តែជាការនាំយកទោចក្រយានយន្តដែលដំឡើង និងផលិតនៅកម្ពុជាទៅចូលរួមពិព័រណ៍អន្តរជាតិប៉ុណ្ណោះទេ ប៉ុន្តែក៏ជាការផ្សព្វផ្សាយសក្តានុពលទេសចរណ៍ និងវិនិយោគរបស់កម្ពុជាទៅកាន់ពិភពលោកផងដែរ។
 
លោក វ៉ាន់ ហ្សាកូលីន ដែលជាអ្នកបើកបរម៉ូតូម៉ាក CALYPSO XPLORER ទៅអ៊ីតាលី នឹងដើរតួនាទីជាទូតសុច្ឆន្ទៈ ផ្សព្វផ្សាយវប្បធម៌ អរិយធម៌ សក្តានុពលទេសចរណ៍ និងបដិសណ្ឋារកិច្ចដ៏កក់ក្តៅរបស់ប្រជាជនកម្ពុជា ព្រមទាំងលើកស្ទួយកម្ពុជាជាគោលដៅទេសចរណ៍ប្រកបដោយសុវត្ថិភាព និងបង្ហាញសមត្ថភាពផលិតម៉ូតូដែលមានស្លាកសញ្ញា Made in Cambodia ទៅកាន់ពិភពលោក។
 
ឯកឧត្តមរដ្ឋមន្ត្រីក្រសួងទេសចរណ៍ជឿជាក់ថា បេសកកម្មនេះនឹងផ្ញើសារយ៉ាងច្បាស់ទៅកាន់ពិភពលោកថា កម្ពុជា គឺជាប្រទេសមានសុខសន្តិភាព សុវត្ថិភាព សក្តានុពលទេសចរណ៍ដ៏សម្បូរបែប និងកំពុងអភិវឌ្ឍសមត្ថភាពផលិតកម្មឧស្សាហកម្ម ដែលអាចនាំយកផលិតផលរបស់ខ្លួនទៅប្រកួតប្រជែង និងបង្ហាញខ្លួននៅលើវេទិកាអន្តរជាតិ៕

អត្ថបទ៖ជាវ ចន្ធូ