អាជ្ញាធរជាតិអប្សរា ប្រកាសរៀបចំបើកទេសភាពទស្សនា «ព្រះអង្គផ្ទី» នៅចំកណ្តាលបារាយណ៍បេងមាលា ខេត្តសៀមរាប ដើម្បីផ្តល់បទពិសោធន៍ទស្សនាថ្មីសន្លាង និងលើកស្ទួយបេតិកភណ្ឌជាតិ។

តំបន់រមណីយដ្ឋានប្រវត្តិសាស្ត្របេងមាលា ក្នុងខេត្តសៀមរាប កំពុងរៀបចំផ្លូវទស្សនាថ្មីសន្លាងមួយទៀត បន្ទាប់ពីអាជ្ញាធរជាតិអប្សរាបានប្រកាសបើកទេសភាព និងកសាងផ្លូវដើរទស្សនាឆ្ពោះទៅកាន់ «ព្រះអង្គផ្ទី» ដែលជាសំណង់បុរាណលាក់ខ្លួនចំកណ្តាលបារាយណ៍បេងមាលា ដើម្បីលើកតម្លៃបេតិកភណ្ឌវប្បធម៌ និងបង្កើនភាពសម្បូរបែបនៃបទពិសោធន៍ទេសចរណ៍។

«ព្រះអង្គផ្ទី» ជាសំណង់បុរាណធ្លាប់រងការបាក់រលំស្ទើរទាំងស្រុង ដោយនៅសល់ត្រឹមដុំថ្មរាយប៉ាយប៉ុណ្ណោះ រហូតដល់ឆ្នាំ២០២១ ទើបក្រុមអ្នកជំនាញនៃអាជ្ញាធរជាតិអប្សរា បានខិតខំស្រាវជ្រាវ និងជួសជុលរៀបចំឡើងវិញឱ្យលេចរូបរាងជាថ្មី។

យោងតាមសេចក្តីជូនដំណឹងរបស់អាជ្ញាធរជាតិអប្សរា ដើម្បីសម្រួលដល់ការចូលទស្សនា អាជ្ញាធរជាតិអប្សរាកំពុងរៀបចំផ្លូវទស្សនាថ្មីដែលមានប្រវែង ៧៥០ម៉ែត្រ និងទទឹង ១០ម៉ែត្រ ដោយរៀបចំចេញពីកំពង់ទឹកខាងលិចបារាយណ៍បេងមាលា រហូតដល់ទីតាំងសំណង់បុរាណចំកណ្តាលទឹកតែម្តង។ គម្រោងនេះ នឹងអនុញ្ញាតឱ្យភ្ញៀវទេសចរជាតិ និងអន្តរជាតិ អាចធ្វើដំណើរចូលទៅទស្សនា និងសិក្សាស្វែងយល់ពីប្រវត្តិសាស្ត្រសំណង់បុរាណនេះ។

ពាក់ព័ន្ធនឹងកាលបរិច្ឆេទបើកស្វាគមន៍ជាផ្លូវការ អាជ្ញាធរជាតិអប្សរាមិនទាន់បានបញ្ជាក់នៅឡើយទេ ប៉ុន្តែការងារកាត់ឆ្ការដើមឈើ និងរៀបចំទេសភាពត្រូវបានចាប់ផ្តើមអនុវត្តជាបណ្តើរៗហើយ ចាប់តាំងពីចុងខែសីហា ឆ្នាំ២០២៦ នេះតទៅ។

លោក សុខ វិសាល បុគ្គលិកបច្ចេកទេសអាជ្ញាធរជាតិអប្សរាប្រចាំប្រាសាទបេងមាលា បានឱ្យដឹងថា សំណង់ «ព្រះអង្គផ្ទី» ឬ «ប្រាសាទផ្ទី» ទំនងជាកសាងឡើងក្នុងរជ្ជកាលព្រះបាទជ័យវរ្ម័នទី៧។ លោកបានគូសបញ្ជាក់ថា នេះជាសំណង់ប្រាសាទទោលដ៏កម្រ និងគ្មានពីរ ដែលបុព្វបុរសខ្មែរបានកសាងនៅចំកណ្តាលវាលផ្ទី។ នៅពេលបារាយណ៍មានទឹកពេញ ទីនេះបង្កើតបានជាទស្សនីយភាពប្រៀបដូចជា ព្រះពុទ្ធគង់លើផ្ទៃទឹក ឬសត្វនាគកំពុងអណ្តែតខ្លួនលើផ្ទៃទឹកយ៉ាងស្ងប់ស្ងាត់។

អាជ្ញាធរជាតិអប្សរាបានគូសបញ្ជាក់ថា ការបើកច្រកទស្សនា និងរៀបចំទេសភាពនៅ «ព្រះអង្គផ្ទី» នេះ គឺជាផ្នែកមួយយ៉ាងសំខាន់ក្នុងការលើកស្ទួយ វិស័យទេសចរណ៍ខេត្តសៀមរាប ឱ្យកាន់តែមានសក្ដានុពល និងទាក់ទាញខ្លាំងបន្ថែមទៀត៕ទួន សុផល