កម្ពុជា នឹងបន្តរងឥទិ្ធពលព្យុះទី២៦ ឈ្មោះ ស៊ូរីហ្គាអេ ដែលវិវត្តមកពីសម្ពាធទាបនៅលើមហាសមុទ្រប៉ាស៊ីហ្វិកខាងលិច ហើយមានឥទ្ធិពលខ្លាំងលើរបបខ្យល់មូសុងនិរតី ដែលបក់លើឈូងសមុទ្របេងហ្គាល សមុទ្រ អាន់ដាម៉ាន់ សមុទ្រចិនខាងត្បូង ឆ្ពោះមកអាងទន្លេមេគង្គ សមុទ្រកម្ពុជា។ ឥទិ្ធពលព្យុះទី២៦នេះ នឹងធ្វើឱ្យប្រទេសកម្ពុជាអាចនឹងបន្តធ្លាក់ភ្លៀង ជាមួយខ្យល់កន្ត្រាក់ និងផ្គររន្ទះ ចាប់ពីថ្ងៃទី២៤ ដល់ថ្ងៃទី៣០ ខែកញ្ញា ឆ្នាំ២០២៦។
 
ក្រសួងធនធានទឹក និងឧតុនិយម បានបញ្ជាក់ថា ទោះជាយ៉ាងណា កម្ពុជាមិនស្ថិតនៅក្នុងគន្លងផ្លូវដើររបស់ព្យុះនេះទេ។ ប៉ុន្តែស្ថានភាពនេះ នឹងធ្វើឱ្យទូទាំងប្រទេសកម្ពុជាអាចមានភ្លៀងបន្តធ្លាក់ ខណៈខេត្តនៅជាប់សមុទ្រអាចនឹងមានរលកសមុទ្របោកបក់ខ្លាំង ដែលមានកម្ពស់មធ្យមអប្បបរមា កន្លះម៉ែត្រ និងកម្ពស់មធ្យមអតិបរមា ១,៧៥ម៉ែត្រ។
 
ក្រសួងធនធានទឹក និងឧតុនិយម បានអំពាវនាវឱ្យពលរដ្ឋប្រុងប្រយ័ត្នខ្ពស់ចំពោះបាតុភូតភ្លៀង ផ្គររន្ទះ និងខ្យល់កន្ត្រាក់ ជាពិសេសពលរដ្ឋដែលធ្វើដំណើរតាមផ្លូវគោកនិងផ្លូវទឹក៕

សៅ សុខអេង