សហព័ន្ធកីឡាវ៉ូវីណាមកម្ពុជាក្នុងនាមជាម្ចាស់ផ្ទះរៀបចំព្រឹត្តិការណ៍កីឡាវ៉ូវីណាមជើងឯកអាស៊ី ឆ្នាំ២០២៦ ក្នុងខែវិច្ឆិកា ប្រកាន់ខ្ជាប់នូវយុត្តិធម៌ និងភាពស្មោះដល់អត្តពលិកគ្រប់រូបដែលចូលរួមការប្រកួត។ នេះជាការអះអាងដោយឯកឧត្ដម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា។

ថ្នាក់ដឹកនាំរូបនេះសង្កត់ធ្ងន់ថា ការរក្សាបាននូវភាពយុត្តិធម៌ក៏ជាផ្នែកមួយនៃការលើកមុខលើកមាត់ជាតិ ហើយកីឡាករកីឡាការិនីទាំងអស់ត្រូវប្រឹងប្រែងអស់ពីសមត្ថភាពប្រកួតប្រជែងយកជ័យជម្នះ ព្រោះមិនមានភាពលម្អៀងឡើយក្នុងនាមម្ចាស់ផ្ទះ។ ទន្ទឹមនឹងនេះ គណៈកម្មការអាជ្ញាកណ្ដាលនឹងមានការចូលរួមពីប្រទេសជាសមាជិកអាស៊ីចូលរួម ហើយក៏មានវត្តមានប្រធានបច្ចេកទេសកម្រិតពិភពលោកចូលរួមដែរ។

ជុំវិញព្រឹត្តិការណ៍កីឡាវ៉ូវីណាមជើងឯកអាស៊ី ឆ្នាំ២០២៦ ប្រមុខសហព័ន្ធដដែលថ្លែងថា នឹងមានប្រទេសចូលរួមមិនក្រោម២០ឡើយ ខណៈការបើកឱ្យចុះឈ្មោះនៅមានសុពលភាពរហូតដល់ដំណាច់ខែសីហា ឆ្នាំ២០២៦។ សម្រាប់វិញ្ញាសាមានចំនួន៥៥ និងបែងចែកជាកម្រិតយុវជន និង អាយុក្រោម១៨ឆ្នាំ។ ចំណែកអត្តពលិកកម្ពុជាដែលត្រៀមប្រកួតប្រជែងយកមេដាយមានជាង៤០រូប ហើយផ្ដោតសំខាន់លើការសម្រួចសមត្ថភាពយុវជនទៀតផង៕