នៅក្នុងវិស័យកីឡា ជារឿយៗជោគជ័យតែងតែចាប់ផ្ដើមចេញពីការតស៊ូ ប៉ុន្តែសម្រាប់អតីតម្ចាស់មេដាយមាសស៊ីហ្គេម វ៉ា មិថុនា ផ្លូវឆ្ពោះទៅកាន់ពិភពតេក្វាន់ដូ WT គឺចាប់ផ្ដើមចេញពីប្រវត្តិដ៏គួរឱ្យអស់សំណើច និងនឹកស្មានមិនដល់មួយ។

វីរកីឡាកររូបនេះបានទម្លាយរឿងរ៉ាវអតីតកាលទាំងស្នាមញញឹមថា ហេតុផលដំបូងបង្អស់ដែលធ្វើឱ្យលោកសម្រេចចិត្តបោះជំហានចូលហ្វឹកហាត់ក្បាច់គុន គឺដោយសារតែលោកធ្លាប់ត្រូវបាន «អ្នករត់ម៉ូតូឌុបវាយ» ពេលកំពុងធ្វើដំណើរតាមដងផ្លូវ។ ព្រឹត្តិការណ៍ចៃដន្យ និងគួរឱ្យហួសចិត្តនោះ បានក្លាយជាកាតាលីករ (ការរុញច្រាន) ដ៏សំខាន់ ធ្វើឱ្យលោកប្ដេជ្ញាចិត្តថា ត្រូវតែរៀនក្បាច់គុនដើម្បីចេះការពារខ្លួនកុំឱ្យគេធ្វើបាបទៀត។

ទោះបីជាចាប់ផ្ដើមឡើងក្នុងគោលបំណងត្រឹមតែការពារខ្លួនពីការប៉ះទង្គិចតាមផ្លូវថ្នល់ ប៉ុន្តែដោយសារដុងពីកំណើត រួមផ្សំនឹងការខិតខំប្រឹងប្រែងហ្វឹកហាត់មិនខ្លាចនឿយហត់ វ៉ា មិថុនា បានអភិវឌ្ឍសមត្ថភាពខ្លួនយ៉ាងលឿនរហ័ស។ លោកបានប្រែក្លាយពីយុវជនធម្មតាម្នាក់ ទៅជាធនធានកម្រ និងជាកីឡាករឆ្នើមបង្គោលមួយរូបនៅក្នុងក្រុមជម្រើសជាតិតេក្វាន់ដូ WT កម្ពុជា។ផ្លែផ្កានៃការលះបង់ បានស្តែងឡើងតាមរយៈសមិទ្ធផលយ៉ាងត្រចះត្រចង់នៅលើឆាកអន្តរជាតិ។

វ៉ា មិថុនា បានសាងប្រវត្តិសាស្ត្រជូនជាតិ ដោយការដណ្ដើមបានមេដាយមាសដ៏មានតម្លៃពីព្រឹត្តិការណ៍កីឡាស៊ីហ្គេម (SEA Games) រួមទាំងការឈ្នះមេដាយដទៃទៀតជាច្រើនលើសង្វៀនកម្រិតអន្តរជាតិ ដែលធ្វើឱ្យទង់ជាតិខ្ម័យគ្រវីពាសពេញឆាកអន្តរជាតិ។