​ផ្អែកលើសមត្ថភាពកាន់តែរឹងមាំ និងបទពិសោធពេញដៃពីការប្រកួតមុនៗ ក្រុមកីឡាហាប់គីដូជម្រើសជាតិកម្ពុជា មានជំនឿចិត្តខ្ពស់ក្នុងការប្រជែងយកមេដាយជូនជាតិ ពីព្រឹត្តិការណ៍ «ការប្រកួតហាប់គីដូ ជើងឯកអាស៊ី ២០២៦» ហុងកុង។ នេះជាការថ្លែងរបស់លោក គួច ហុងជៀក អនុប្រធាន​សហព័ន្ធខ្មែរកីឡាហាប់គីដូ។

លោកអនុប្រធានមានប្រសាសន៍បែបនេះក្នុងពិធីជួបសំណេះសំណាលជាមួយកីឡាករ កីឡាការិនីរបស់ខ្លួនដែលត្រៀមព្រឹត្តិការណ៍ធំខាងលើពីថ្ងៃទី១៣ ដល់ថ្ងៃទី១៧ ខែសីហា ឆ្នាំ ២០២៦។ ក្នុងនោះ សរុបទាំងគ្រូបង្វឹក កីឡាករ កីឡាការិនីមានចំនួន ១៨រូប។

ជុំវិញការចូលរួមការប្រកួតនេះ លោក គួច ហុងជៀក បានបង្ហាញជំនឿចិត្តថា កូនក្រុមអាចប្រជែងបានមេដាយដោយសារតែកំណើនសមត្ថភាព បច្ចេកទេស បូករួមទាំងបទពិសោធពីការទៅប្រកួត២លើកមុន។ សម្រាប់វិញ្ញាសាវិញមានចំនួន៦មានទាំងលោតកម្ពស់ លោតចម្ងាយ មេគុណ ការបង្ហាញមានអាវុធ និងអត់អាវុធ និងវិញ្ញាសាប្រយុទ្ធ សរុបប្រមាណ៤០ប្រកួត។

ក្នុងនាមថ្នាក់ដឹកនាំសហព័ន្ធ លោក គួច ហុងជៀក ក៏បានកោតសរសើរនូវឆន្ទៈយ៉ាងមុតមាំរបស់កីឡាករ កីឡាការិនី និងគ្រូបង្វឹកក្នុងការចូលរួមប្រកួតប្រជែង ដណ្ដើមមេដាយជូនជាតិ ជាពិសេសការរួមចំណែកទាំងថវិកាផ្ទាល់ខ្លួនមួយចំនួនថែមទៀត៕