ក្លិប យក្សអាល្លឺម៉ង់ FC Bayern Munich កំពុងជួបប្រទះវិបត្តិខ្វះខាតកីឡាករ បន្ទាប់ពីការប្រកួតដ៏ស្វិតស្វាញជាមួយក្រុម Borussia Dortmund បានបញ្ចប់ទៅដោយបន្សល់ទុកបញ្ហារបួសកីឡាកររហូតដល់ទៅ ៤ រូបក្នុងមួយប្រកួតនោះ។

Ismael Saibari (របួសកជើងធ្ងន់ធ្ងរ)៖ នៅក្នុងវគ្គទីមួយ ខ្សែប្រយុទ្ធម៉ារ៉ុក Ismael Saibari បានរងរបួសដាច់សរសៃរកជើង (Syndesmosis tear)។ តាមប្រភពព័ត៌មានពីសារព័ត៌មាន Bild បានឱ្យដឹងថា រូបគេបានទទួលការវះកាត់រួចរាល់ហើយ និងត្រូវសម្រាកព្យាបាលយ៉ាងតិចណាស់ ៣ ខែ។

• Serge Gnabry (របួសសាច់ដុំ ឡើងវិញ)៖ បន្ទាប់ពី Saibari ខ្សែប្រយុទ្ធជម្រើសជាតិអាល្លឺម៉ង់ Serge Gnabry ក៏ត្រូវផ្លាស់ប្តូរចេញពីទីលានផងដែរ។ Gnabry តែងតែជួបបញ្ហាសាច់ដុំញាំញីជាញឹកញាប់ ដោយធ្លាប់មានរបួសសរសៃរពួរច្រើនលើកមកហើយ ហើយថ្មីៗនេះទើបតែដាច់សាច់ដុំជើងខាងស្តាំដែលធ្វើឱ្យរូបគេខកខានការប្រកួត World Cup កាលពីខែមិថុនាទៀតផង។

តាមការរាយការណ៍ពីសារព័ត៌មាន Bild បានបញ្ជាក់ថា រូបគេបានរងរបួសសាច់ដុំសរសៃរពួរសារជាថ្មី និងត្រូវអវត្តមានពី ៤ ទៅ ៦ សប្តាហ៍។

• Michael Olise (រងការប៉ះទង្គិចនៅចុងម៉ោង)៖ ឈានចូលដល់ចុងការប្រកួត Michael Olise បានបង្ហាញសញ្ញាមានបញ្ហារបួស។ បច្ចុប្បន្នមិនទាន់មានការវិនិច្ឆ័យច្បាស់លាស់នៅឡើយទេ ហើយវត្តមានរបស់គេសម្រាប់ការប្រកួត UEFA Champions League ទល់នឹង Atlético Madrid នៅតែស្ថិតក្នុងភាពមន្ទិលសង្ស័យ ខណៈក្លិបរំពឹងថារូបគេអាចជាសះស្បើយទាន់ពេលវេលា។
• Jonas Urbig (ប៉ះទង្គិចក្បាល)៖ អ្នកចាំទី Jonas Urbig គឺជាកីឡាករមួយរូបផ្សេងទៀតដែលស្ថិតក្នុងបញ្ជីរបួស បន្ទាប់ពីមុខរបស់គេប៉ះទង្គិចនឹងជង្គង់របស់កីឡាករ Carney Chukwuemeka។

Bayern Munich កំពុងតាមដានស្ថានភាពសុខភាពរបស់ Urbig យ៉ាងយកចិត្តទុកដាក់បំផុត។ ស្ថានភាពនេះកាន់តែស្មុគស្មាញ ដោយសារអ្នកចាំទីដៃមួយ Manuel Neuer មិនទាន់សះស្បើយពីរបួសនៅឡើយ។

ទោះបីជា Bayern Munich ត្រូវប្រឈមមុខនឹង Atlético Madrid ដោយមានកម្លាំងប្រយុទ្ធ និងតំបន់ការពារស្តើងយ៉ាងណាក៏ដោយ អ្វីដែលសំខាន់បំផុតគឺក្លិបនឹងមិនប្រញាប់ប្រញាល់បញ្ជូនកីឡាករឱ្យចូលលេងទាំងប្រថុយប្រថាន ដើម្បីតែតាមឱ្យទាន់កាលវិភាគប្រកួតនោះឡើយ។