AC Milan កំពុងប្រឈមហានិភ័យនៃការរបូតកៅអី Champions League រដូវកាលក្រោយទៅលើដៃ Juventus បន្ទាប់ពីពួកគេបានត្រឹមស្មើ០-០ជាមួយ Cagliari ដែលជាការលេងមិនឈ្នះក្រុមមួយនេះជាលើកដំបូងរបស់ Milan តាំងពីឆ្នាំ១៩៩៩មក។
Milan ដែលឈរនៅកំពូលតារាង Serie A ជាច្រើនសប្ដាហ៍ដើមរដូវកាល បានធ្លាក់មកលេខរៀងទី៤ ស្មើពិន្ទុជាមួយ Napoli ដែលបានស៊ី Fiorentina ២-០ ថ្ងៃអាទិត្យម្សិលមិញ។
ក្រុមលោក Stefano Pioli ពេលនេះមាន៧៦ពិន្ទុពី៣៧ប្រកួត នៅលើក្រុមលេខ៥ Juventus តែ១ពិន្ទុគត់។
នៅថ្ងៃប្រកួតបង្ហើយរដូវកាល Milan ត្រូវប៉ះក្រុមលេខ២ Atalanta ដែលធានាកៅអី UCL ជាស្រេចទៅហើយ។ ចំណែក Napoli នឹងជួប Verona ហើយ Juventus តតាំង Bologna។
បើថ្ងៃចុងក្រោយ Milan និង Napoli ឈ្នះ នោះ Juventus នឹងមិនបានលេង Champions League ជាលើកដំបូងតាំងពីរដូវកាល២០១១-១២មក។ តែបើក្រុមទាំង២ខាងដើមមិនបាន៣ពិន្ទុនៅថ្ងៃចុងក្រោយ ហើយក្រុមលោក Andre Pirlo ផ្ដួល Bologna នោះក្រុមសេះបង្កង់នឹងហក់ចូល Top 4 វិញ៕
