Lionel Messi រកបាន២គ្រាប់និងបញ្ជូន១គ្រាប់ក្នុងជ័យជម្នះ៤-១របស់ Barcelona លើ Huesca ក្នុងក្របខណ្ឌ La Liga យប់ថ្ងៃចន្ទទី១៥ខែមីនាឆ្នាំ២០២១។
នោះជាការចូលលេងលើកទី៧៦៧របស់ Messi សម្រាប់ Barca ដែលស្មើនឹងកំណត់ត្រារបស់ Xavi ក្នុងនាមជាកីឡាករចូលលេងច្រើនដងបំផុតក្នុងប្រវត្តិសាស្ត្រក្លិបនៅកាតាឡូនីញ៉ាមួយនេះ។
កំពូលខ្សែប្រយុទ្ធអាហ្សង់ទីនវ័យ៣៣ឆ្នាំ បានចូលលេងឱ្យ Barca លើកដំបូងដោយប្ដូរចូលក្នុងជ័យជម្នះ១-០នៅទឹកដី Espanyol ថ្ងៃទី១៦ខែតុលាឆ្នាំ២០០៤។ មកទល់ពេលនេះ Messi បានឈ្នះជើងឯក៣៤ពានរង្វាន់ជាមួយក្លិប និងបានឈ្នះ Ballon d’Or ៦ដងផងដែរ។
ប្រសិនបើនៅថ្ងៃអាទិត្យខាងមុខនេះ គេបានចូលលេងទល់នឹង Real Sociedad នោះ គេនឹងបំបែកកំណត់ត្រារបស់ Xavi។
ដោយឡែក Barca យប់មិញដែល២គ្រាប់ផ្សេងទៀតរកបានដោយ Antoine Griezmann និង Oscar Mingueza ឥឡូវកំពុងឈរលេខរៀងទី២ មាន៥៩ពិន្ទុ នៅក្រោម Atletico Madrid ៤ពិន្ទុ និងលើ Real Madrid ២ពិន្ទុ ខណៈនៅសល់១១សប្ដាហ៍ប្រកួតទៀត៕
