មន្ត្រីជាន់ខ្ពស់ធនាគារជាតិនៃកម្ពុជា៖ ការប្រើប្រាស់ប្រាក់រៀលនៅក្នុងខេត្តតាកែវមានរហូតដល់ ៨៥ ភាគរយ
តាកែវ៖ក្នុងពិធីបើកយុទ្ធនាការផ្សព្វផ្សាយពីប្រាក់រៀល ប្រព័ន្ធបាគង និងខេអេចឃ្យូអរ «KHQR» កាលពីព្រឹកថ្ងៃពុធទី ៣០ ខែ មេសា ឆ្នាំ ២០២៥ នៅសួនច្បារតាកែវ ក្រុងដូនកែវ ខេត្តតាកែវ ឯកឧត្តម យឹម លាត ទេសាភិបាលរងធនាគារជាតិនៃកម្ពុជា បានថ្លែងឱ្យដឹងថា ការប្រើប្រាស់ប្រាក់រៀលនៅក្នុងខេត្តតាកែវមានរហូតដល់ ៨៥ ភាគរយ។
ឯកឧត្តមបានថ្លែងបន្តថា បើយោងតាមកិច្ចសហការអង្កេតរបស់ធនាគារជាតិនៃកម្ពុជា ជាមួយទីភ្នាក់ងារសហប្រតិបត្តិការអន្តរជាតិជប៉ុន ឬចៃកា (JICA) បានបង្ហាញថា ប្រាក់រៀលត្រូវបានទទួលការទុកចិត្ត និងប្រើប្រាស់កាន់តែច្រើននៅក្នុងជីវភាពប្រចាំថ្ងៃរបស់បងប្អូនប្រជាពលរដ្ឋ ជាពិសេសនៅតាមតំបន់ជនបទ ។ដោយឡែកសម្រាប់ខេត្តតាកែវ ទិន្នន័យស្រាវជ្រាវបានបង្ហាញថា ជាមធ្យមការប្រើប្រាស់ប្រាក់រៀលលើការចំណាយជីវភាពប្រចាំថ្ងៃរបស់បងប្អូនប្រជាពលរដ្ឋ មានចំនួនរហូតដល់ ៨៥ ភាគរយ ដែលទិន្នន័យនេះបានបង្ហាញពីការចូលរួមលើកកម្ពស់ប្រាក់រៀលរបស់ប្រជាពលរដ្ឋខេត្តតាកែវ។
ឯកឧត្តមទេសាភិបាលរង ក៏បានលើកឡើងពីប្រព័ន្ធទូទាត់បាគង ខេអេចឃ្យូអរ «KHQR» ដែលមានភាពងាយស្រួលក្នុងការប្រតិបត្តិការឌីជីថល ទូទាត់ និងផ្ទេរប្រាក់បានយ៉ាងឆាប់រហ័ស ងាយស្រួល និងមានសុវត្ថិភាពខ្ពស់ ទាំងក្នុងប្រទេស និងនៅប្រទេសជាដៃគូ រួមមានប្រទេសថៃ វៀតណាម ឡាវ ម៉ាឡេស៊ី និងប្រទេសចិនបានខ្លះដែរ ។នៅពេលខាងមុខ ធនាគារជាតិនៃកម្ពុជានឹងដាក់ឱ្យភ្ញៀវទេសចរអន្តរជាតិប្រើប្រាស់នូវប្រព័ន្ធទូទាត់ទំនើបបាគងសម្រាប់ភ្ញៀវទេសចរ (Bakong Tourists App) ដែលមានភាពងាយស្រួលដល់ភ្ញៀវទេសចរ។
នៅក្នុងឱកាសនោះ ឯកឧត្តម វ៉ី សំណាង អភិបាលខេត្តតាកែវ ចាត់ទុកយុទ្ធនាការផ្សព្វផ្សាយពីប្រាក់រៀល ប្រព័ន្ធបាគង និងខេអេចឃ្យូអរ នៅក្នុងខេត្តតាកែវនៅពេលនេះ នឹងជំរុញការចូលរួមប្រើប្រាស់ប្រាក់រៀលកាន់តែច្រើនឡើងថែមទៀត សំដៅលើកកម្ពស់មុខមាត់ជាតិ និងការអភិវឌ្ឍសេដ្ឋកិច្ចខេត្តឱ្យកាន់តែរីកចម្រើនឡើងមួយកម្រិតទៀត៕
ដោយ៖សាំងសារ៉ាវី
