ភ្នំពេញ៖ អង្គភាពប្រឆាំងអំពើពុករលួយកម្ពុជា និងអគ្គរដ្ឋអាជ្ញា នៃ​សហព័ន្ធរុស្ស៊ី បានប្តេជ្ញាសហការរួមគ្នាប្រយុទ្ធប្រឆាំង អំពើពុករលួយ លើការងារអប់រំ ទប់ស្កាត់ បណ្តុះបណ្តាល និង ស៊ើបអង្កេត ។ ការប្ដេជ្ញា​ដូចនេះបានធ្វើឡើង​នៅក្នុង​ឱកាស​គណៈប្រតិភូអគ្គរដ្ឋ​អាជ្ញានៃសហព័ន្ធរុស្ស៊ីចំនួន ១៨ រូប ដឹកនាំដោយឯកឧត្តម អ៊ីហ្គូ ក្រាស្នូវ(IGOR KRASNOV )អគ្គរដ្ឋ​អាជ្ញានៃសហព័ន្ធរុស្ស៊ី អញ្ជើញ​ជួបសម្តែងការគួរសម និងពិភាក្សាការងារជាមួយឯកឧត្តម កិត្តិនីតិ​កោសលបណ្ឌិត ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំង​អំពើពុករលួយកម្ពុជា នាសៀលថ្ងៃទី ២៧ ខែឧសភា ឆ្នាំ ២០២៥ នៅអង្គភាពប្រឆាំងអំពើពុករលួយ ។គណៈប្រតិភូអគ្គរដ្ឋអាជ្ញានៃ​សហព័ន្ធរុស្ស៊ី​បានអញ្ជើញ​មកបំពេញទស្សន​កិច្ច​នៅព្រះរាជាណាចក្រ​កម្ពុជារយៈពេលពីរថ្ងៃចាប់ថ្ងៃទី២៦-២៧ ខែឧសភា ឆ្នាំ២០២៥ ។

ក្នុងជំនួបពិភាក្សា ភាគីទាំងពីរ បានជម្រាបជូនគ្នាទៅវិញទៅមក អំពីយុទ្ធសាស្ត្រអប់រំដើម្បីឱ្យមនុស្សប្រឆាំងអំពើពុករលួយ និងកែប្រែ​អាកប្បកិរិយាអសកម្ម។ ឯកឧត្តមទេសរដ្ឋមន្ត្រី បានលើកឡើងអំពីការ​យកចិត្តទុកដាក់របស់ អ.ប.ព. ទៅលើការ​បង្កើតសៀវភៅប្រឆាំងអំពើ​ពុករលួយ ដាក់ទៅក្នុងកម្មវិធីសិក្សានៅ​កម្រិត​បឋមសិក្សា រហូតដល់​វិទ្យាល័យ និងមានគ្រូ​បង្គោល និងជនបង្គោលប្រចាំស្ថាប័ន ក្រសួង ។

ចំណែកឯកឧត្តមអគ្គរដ្ឋអាជ្ញានៃសហព័ន្ធរុស្ស៊ី ក៏បានជម្រាបអំពីការ​អប់រំ បណ្តុះបណ្តាល មន្ត្រីរាជការ យុវជន កុមារ និងគ្រួសារ រួមទាំង​ញាតិ​សន្តានជិតស្និទ្ធទាំងអស់ឱ្យមានអាកប្បកិរិយា ប្រឆាំងអំពើពុក​រលួយ នៅសហព័ន្ធរុស្ស៊ីផងដែរ ។

ឯកឧត្តមប្រធាន អ.ប.ព. បានចាត់ទុកដំណើរទស្សនកិច្ចរបស់​ឯកឧត្តម​អគ្គរដ្ឋអាជ្ញានៃសហព័ន្ធរុស្ស៊ី មានសារសំខាន់​ចំពោះ​ទំនាក់ទំនង ការចែករំលែកព័ត៌មាន និងយុទ្ធសាស្ត្រប្រឆាំងអំពើ​ពុករលួយ ការពង្រីកកិច្ចសហប្រតិបត្តិការ ផ្លាស់​ប្តូរបទពិសោធ​លើការងារប្រយុទ្ធប្រឆាំងអំពើពុករលួយ រវាងអាជ្ញាធរមាន​សមត្ថកិច្ច​ប្រឆាំងអំពើពុករលួយទាំងពីរ ។

ឯកឧត្តម Igor KRASNOV មានប្រសាសន៍ថា អំពើពុករលួយ ជា​ឧបសគ្គមួយ បើយើងប្រឹងប្រែងរួមគ្នា នោះកិច្ចការប្រឆាំង​អំពើពុក​រលួយ នឹងទទួលបានប្រសិទ្ធភាព ។ ឯកឧត្តម ត្រៀមខ្លួនគ្រប់​ការ​សន្ទនា សហការបើកចំហជាមួយ អ.ប.ព. គោរព​គ្នាទៅ​វិញ​ទៅមក ជាដៃគូរបស់យើង ផលប្រយោជន៍រួម ។

ភាគីទាំងពីរ ក៏បានសម្តែងនូវក្តីរីករាយចំពោះការផ្លាស់ប្តូរ និងផ្តល់​ព័ត៌មានថ្មីៗ ល្អៗ ពីគ្នាទៅវិញទៅមក និងបទពិសោធ​ជាក់​ស្តែង ដែលជាដើមទុនមួយ ឆ្ពោះទៅរកការវិវឌ្ឍនាពេលអនាគត ហើយ​ត្រៀមខ្លួន ចែករំលែកបទពិសោធផ្សេងទៀត សម្រាប់កិច្ចសហប្រតិ​បត្តិការ ប្រឆាំងអំពើពុករលួយ ។

ក្នុងឱកាសនេះដែរ ក៏មានពិធីចុះអនុស្សរណៈ នៃការយោគយល់គ្នា (MoU) រវាងអង្គភាពប្រឆាំងអំពើពុករលួយ នៃព្រះ​រាជាណាចក្រកម្ពុជា និងការិយាល័យអគ្គរដ្ឋអាជ្ញា នៃសហព័ន្ធរុស្ស៊ី ក្នុងការប្រយុទ្ធប្រឆាំង​អំពើពុករលួយ ដើម្បី​ពង្រីក​ទំនាក់ទំនងអន្តរស្ថាប័ន លើក្របខណ្ឌច្បាប់ នៃអាជ្ញាធរមានសមត្ថកិច្ចប្រឆាំងពុករលួយទាំងពីរ និងប្រទេសទាំងពីរ ។

តាមរយៈអនុស្សរណៈនៃការយោគយល់គ្នានេះ ស្ថាប័នទាំងពីរ នឹង​អនុវត្ត​កិច្ចសហប្រតិបត្តិការគ្នាតាមទម្រង់នានា ដូចជា ការផ្លាស់ប្ដូរបទ​ពិសោធន៍ ឧត្តម្មានុវត្តន៍និងព័ត៌មាន ក្នុងផ្នែកប្រយុទ្ធប្រឆាំងអំពើ​ពុករលួយ, ការរៀបចំកម្មវិធីអន្តរជាតិរួមគ្នា, ការពិគ្រោះយោបល់ លើបញ្ហាផ្លូវច្បាប់, ជំនួយផ្នែកច្បាប់ទៅវិញទៅមក, ការស៊ើបអង្កេត, ការបណ្តុះបណ្តាលបង្កើន​សមត្ថភាព របស់មន្ត្រី និងការស្រាវជ្រាវ​លក្ខណៈវិទ្យាសាស្ត្ររួមគ្នា ក្នុងវិស័យប្រយុទ្ធប្រឆាំងអំពើ​ពុករលួយ​ជាដើម ។

សូមបញ្ជាក់ថា លក្ខណៈពិសេស នៃការិយាល័យរដ្ឋអាជ្ញារុស្ស៊ី គឺមិនស្ថិតក្រោមអំណាចទាំងបី (នីតិប្បញ្ញត្តិ នីតិប្រតិបត្តិ និងតុលាការ) និងស្ថិតនៅក្រោមប្រធានាធិបតីតែម្នាក់គត់ ៕

អត្ថបទ៖ វណ្ណលុក
រូបភាព៖ គ្រី សម្បត្តិ