បរទេស ៖ អ៊ីរ៉ាក់បានប្រកាសថ្កោលទោស «ការវាយប្រហារ របស់អ៊ីស្រាអែល ម្តងហើយម្តងទៀត» លើប្រទេសលីបង់ នេះបើតាមនាយករដ្ឋមន្ត្រីអ៊ីរ៉ាក់ និយាយ កាលពីថ្ងៃអាទិត្យ។

ការថ្កោលទោសនេះ បានធ្វើឡើង ក្រោយពេលអ៊ីស្រាអែល បានបន្តវាយលុកប្រទេសលីបង់ ក្បែរខាង បើទោះបីជា មានបទឈប់បាញ់ កាលពីខែវិច្ឆិកា ដែលបានបញ្ចប់ជម្លោះ ជាងមួយឆ្នាំ ក៏ដោយ។

អំឡុងសន្និសីទសារព័ត៌មាន ជាមួយមេដឹកនាំប្រទេសលីបង់ នាយករដ្ឋមន្ត្រីអ៊ីរ៉ាក់ លោក Mohammed Shia al-Sudani បានថ្កោលទោស ការវាយប្រហាររបស់អ៊ីស្រាអែល ដោយចោទថា ប្រឆាំងនឹងអធិបតេយ្យភាព របស់ប្រទេសលីបង់ និងជាការរំលោភលើច្បាប់អន្តរជាតិ។

លោក បានអំពាវនាវឱ្យ «អនុវត្តឱ្យបានពេញលេញ» នូវដំណោះស្រាយ របស់ក្រុមប្រឹក្សាសន្តិសុខអង្គការសហប្រជាជាតិ ដែលបានបញ្ចប់សង្រ្គាមឆ្នាំ ២០០៦ រវាងអ៊ីស្រាអែល និងក្រុម Hezbollah ដែលគាំទ្រដោយអ៊ីរ៉ង់ ហើយបានបម្រើជាមូលដ្ឋានសម្រាប់បទឈប់បាញ់ចុងក្រោយបង្អស់ ដែលបានចូលជាធរមាន នៅថ្ងៃទី២៧ ខែវិច្ឆិកា។

គួរបញ្ជាក់ថា កាលពីថ្ងៃអាទិត្យ អ៊ីស្រាអែលបានវាយប្រហារលើអគារមួយ នៅភាគខាងត្បូងនៃទីក្រុង Toul ប្រទេសលីបង់ បណ្តាលឲ្យស្លាប់មនុស្ស២នាក់ ដោយចោទថា មានទំនាក់ទំនង ជាមួយក្រុមសកម្មប្រយុទ្ធ Hezbollah៕

ប្រភពពី AFP ប្រែសម្រួល៖ សារ៉ាត