សៀមរាប៖មន្រ្តីជាន់ខ្ពស់នៃក្រសួងសុខាភិបាលបានជំរុញដល់​មន្ទីរសុខាភិបាលខេត្ត គ្រូពេទ្យនៅខេត្តសៀមរាប ​បន្តពង្រឹង​និងកែលម្អសេវាសុខភាពបឋមដល់ប្រជាពលរដ្ឋ។

ក្នុងកិច្ចប្រជុំពិនិត្យវឌ្ឍនភាព និងជំរុញការអនុវត្តផែនការកែលម្អ​មណ្ឌលសុខភាព និងការថែទាំសុខភាពបឋម ដែលបាន​ប្រព្រឹត្តទៅ​នៅសាលាប្រជុំមន្ទីរពេទ្យជ័យវរ្ម័នទី ៧ (គន្ធបុប្ផា) ខេត្តសៀមរាបកាលពីថ្ងៃទី៥ ខែមិថុនា ឆ្នាំ២០២៥ លោកជំទាវ​វេជ្ជបណ្ឌិត ឱ វណ្ណឌីន រដ្ឋលេខា​ធិការក្រសួងសុខាភិបាល តំណាងឯកឧត្ដមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខា​ភិបាល បានលើកឡើង​នូវអនុ​សាស​ន៍ ១៩ ចំណុចសម្រាប់ជំរុញ​សេវាសុខភាពបឋម ដោយផ្ដោតសំខាន់​លើការពង្រឹងគុណភាព​សេវា ការចូលរួមរបស់​សហគមន៍ និងការផលិតគំនិតថ្មីៗសម្រាប់​ការអភិវឌ្ឍសេវាសុខភាព។ លោកជំទាវក៏បាន​វាយតម្លៃខ្ពស់​ចំពោះលទ្ធផល​សម្រេចបាន​របស់មន្ទីរសុខាភិបាលខេត្ត ដែលមានការគាំទ្រយ៉ាងសកម្មពី​អាជ្ញាធរមូលដ្ឋាន។

លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត​សៀមរាប បានឱ្យដឹងថា ខេត្តទេសចរណ៍វប្បធម៌មួយនេះ​មាន​មន្ទីរពេទ្យបង្អែក និងមណ្ឌលសុខភាពជាច្រើនកន្លែង បម្រើ​សេវាសុខភាពចាប់ពីកម្រិតទី១ ដល់កម្រិតទី៣។ មាន​​មណ្ឌល​សុខភាព និងប៉ុស្តិ៍សុខភាពចំនួន ៩៥កន្លែងនិងមាន​គ្រែសម្រាកចំនួន ៧០៣គ្រែ។ក្រៅពីនេះ នៅមាន​មន្ទីរ​ពេទ្យធំៗដូចជា មន្ទីរពេទ្យជ័យវរ្ម័នទី៧ មានចំនួន១ ១២៩ គ្រែ,មន្ទីរពេទ្យកុមារអង្គរចំនួន១០០ គ្រែ​និងមន្ទីរពេទ្យយោធ ភូមិភាគ ៤ចំនួន៥០ គ្រែ។ចំណែកពេទ្យឯកជនក៏បានចូលរួម​ផ្តល់សេវា ៨៨៥កន្លែងដែល​មានអាជ្ញាបណ្ណត្រឹមត្រូវ

នៅខេត្តសៀមរាបដដែល មានមណ្ឌលសុខភាពចំនួន៩៣កន្លែង​ក្នុងនោះមានចំនួន៣៩ត្រូវបានជ្រើសរើសជាគំរូ,ចំនួន ៤១ត្រូវបន្តកែលម្អ និង១៣ត្រូវតែធ្វើឱ្យបានល្អបន្ថែមទៀត៕
ដោយ៖ប៊ុន រដ្ឋា