បរទេស៖ មេដឹកនាំអ៊ុយក្រែន លោក Zelensky កាលពីថ្ងៃអង្គារ បានអំពាវនាវឱ្យមានការដាក់ទណ្ឌកម្មកាន់តែខ្លាំងពីអន្តរជាតិ លើទីក្រុងម៉ូស្គូ ជាមួយនឹងការបន្ថោកតម្លៃប្រេង របស់ប្រទេសរុស្ស៊ី។

ប្រធានាធិបតីអ៊ុយក្រែន លោក Volodymyr Zelensky បានអំពាវនាវឱ្យមានការដាក់ទណ្ឌកម្មកាន់តែខ្លាំងលើប្រទេសរុស្ស៊ី បែបនេះ តាមរយៈ សុន្ទរកថា ពេលល្ងាចរបស់លោក។

លោកបាននិយាយថា «យើងត្រូវកំណត់ លើក្រុមនាវាដឹកប្រេងរបស់រុស្ស៊ីឱ្យបានច្រើន តាមដែលអាចធ្វើទៅបាន … ហើយធ្វើអ្វីគ្រប់យ៉ាង បន្ថោកតម្លៃប្រេងរបស់រុស្ស៊ី ឱ្យទាបជាងតម្លៃដែលពួកគេអាចទ្រាំទ្របាន»។ លោក Zelensky បន្តថា ដៃគូនីមួយៗដឹងពីតម្លៃកំណត់ ដែលត្រូវការ គឺត្រឹម៣០ដុល្លារ ក្នុងមួយបារ៉ែល មិនត្រូវខ្ពស់ជាងនេះទេ។

ថ្មីៗនេះ សហភាពអឺរ៉ុបបានស្នើឱ្យកាត់បន្ថយកម្រិតតម្លៃលើការនាំចេញប្រេងទៅលើពិភពលោករបស់រុស្ស៊ី ផងដែរ ដែលជាផ្នែកនៃកញ្ចប់ទណ្ឌកម្មថ្មី ជុំវិញសង្គ្រាមអ៊ុយក្រែន។ គណៈកម្មការអឺរ៉ុប ដែលជាប្រតិបត្តិរបស់សហភាពអឺរ៉ុប បានស្នើឱ្យកាត់បន្ថយតម្លៃប្រេងបច្ចុប្បន្ន ពី៥០ ដុល្លារទៅ ៤៥ ដុល្លារអាមេរិក ក្នុងមួយបារ៉ែល៕

ប្រភពពី AFP ប្រែសម្រួល៖ សារ៉ាត