(ខេត្តកំពង់ឆ្នាំង)៖ ឯកឧត្តម ម៉ៅ សុផាន់ បានផ្តាំផ្ញើដល់យោធាចារ្យ និង កម្មសិក្សាការីទាំងអស់ត្រូវស្មោះត្រង់ និង ការពារឱ្យបានដាច់ខាតនូវរាជរដ្ឋាភិបាលស្របច្បាប់ ដែលមានសម្តេចតេជោ ហ៊ុន សែន ជានាយករដ្ឋមន្ត្រី និង ឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីបន្តវេន កើតចេញពីការបោះឆ្នោតដោយត្រឹមត្រូវ សេរី និង យុត្តិធម៌ ស្របតាមលទ្ធិប្រជាធិបតេយ្យ ។ ត្រូវយកចិត្តទុកដាក់ ត្រៀមកម្លាំង មធ្យោបាយសម្ភារដើម្បីជួយសង្រ្គោះប្រជាពលរដ្ឋចេញពីគ្រោះមហន្តរាយផ្សេងៗ និង បង្កបង្កើនផលដល់ប្រជាពលរដ្ឋ ដែលស្ថិតនៅជិតទីតាំងរបស់ខ្លួន ។

ឧត្តមសេនីយ៍ឯក ម៉ៅ សុផាន់ មេបញ្ជាការស្តីទី កងទ័ពជើងគោក នៃកងយោធពលខេមរភូមិន្ទ បានមានប្រសាសន៍បែបនេះ នៅព្រឹកថ្ងៃទី៤ ខែសីហា ឆ្នាំ២០២៣ នៅបញ្ជាការដ្ឋានកាំភ្លើងធំ កងទ័ពជើងគោគ ខេត្តកំពង់ឆ្នាំង ដោយមានការចូលរួមពី លោកជំទាវ H.E Mrs(Dr) Deyani Uttam Khobragade ឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅកម្ពុជា ក្នុងពិធីបិទវគ្គហ្វឹកហ្វឺនពិសេសបំប៉នជំនាញកាំភ្លើងធំ ឆ្នាំ២០២៣ ដែលវគ្គហ្វឹកហ្វឺននេះ បានជួយឧបត្ថម្ភ ដោយយោធាចារ្យឥណ្ឌា ។

ឧត្តមសេនីយ៍ឯក ម៉ៅ សុផាន់ បានអបអរសាទរ និងវាយតម្លៃខ្ពស់ចំពោះ លទ្ធផល ដែលកម្មសិក្សាការី ក្នុងវគ្គបំប៉នជំនាញកាំភ្លើងធំសំរេចបាន ដែលក្នុងរយៈពេល ៣ ខែកន្លងមក បានខិតខំសិក្សារៀនសូត្រ ហាត់ពត់លត់ដំ តស៊ូជម្នះរាល់ការលំបាក និងទទួលបានជោគជ័យគួរជាទីមោទនៈ។

ឯកឧត្តម ម៉ៅ សុផាន់ បានថ្លែងអំណរគុណដល់ប្រទេសឥណ្ឌា ដែលបានជួយកម្ពុជាចាប់តាំងពីក្រោយថ្ងៃរំដោះ ៧ មករា ឆ្នាំ១៩៧៩ ក្នុងនោះឥណ្ឌាក៏បានបញ្ជូនកងទ័ពជាច្រើននាក់ មកចូលរួមក្នុងថែរក្សាសន្តិភាពនៅក្នុងប្រទេសកម្ពុជាក្នុងឆ្នាំ១៩៩៣ ។

ឯកឧត្តម បានកោតសរសើរ និងវាយតម្លៃខ្ពស់ចំពោះយោធាចារ្យ កម្មសិក្សាការីទាំងអស់ ដែលបានខិតខំហ្វឹកហ្វឺនរៀនសូត្រ ពង្រីកបាននូវសមត្ថភាព បច្ចេកទេស ដើម្បីចូលរួមចំណែកក្នុងការកសាងធនធានមនុស្ស កងទ័ពជើងគោក ឲ្យកាន់តែមានការរីក ចម្រើន ក្នុងបុព្វហេតុការពារអធិបតេយ្យ បូរណភាពទឹកដីកម្ពុជាអោយបានគង់វង្ស ។

ឯកឧត្តម ម៉ៅ សុផាន់ បានចាត់ទុក លទ្ធផលដែលវគ្គហ្វឹកហ្វឺនទទួលបាននាពេលនេះ គឺជាលទ្ធផលផ្លែផ្កា នៃកិច្ច សហប្រតិបត្តិការ ដែលបានចុះហត្ថលេខា ដោយកងទ័ពជើងគោក ប្រទេសទាំងពីរ កាលពីខែកុម្ភៈ ឆ្នាំ២០២៣ កន្លងទៅ ។

ឧត្តមសេនីយ៍ឯក ពៅ សុខា មេបញ្ជាការរងកងទ័ពជើងគោក និងជាមេបញ្ជាការ បញ្ជាការដ្ឋានកាំភ្លើងធំ បានបញ្ជាក់ថា៖ ដោយមានកិច្ចសហប្រត្តិបត្តិការជាមិត្តភាព រវាងកម្ពុជា និងកងទ័ពឥណ្ឌា បញ្ជាការដ្ឋានកាំភ្លើងធំ កងទ័ពជើងគោក បានបើកវគ្គហ្វឹកហ្វឺនពិសេសបំប៉នជំនាញថ្នាក់កងអនុសេនាធំកាំភ្លើងធំ ឆ្នាំ២០២៣ថ្នាក់កាំភ្លើធំ 122mm-D30 និង ថ្នាក់កាំភ្លើងធំ 130mm-M46 ដែលវគ្គហ្វឹកហ្វឺននេះ បានប្រព្រឹត្តទៅ បានដោយជោគជ័យ ដោយបានការយកចិត្តទុកដាក់ពីសំណាក់ នាយឧត្តមសេនីយ៍ បណ្ឌិត ហ៊ុន ម៉ាណែត ទាំងស្មារតី ថវិកា ប្រេងឥន្ទនៈ តាមរយៈ ឧត្តមសេនីយ៍ឯក ម៉ៅ សុផាន់ មេបញ្ជាការស្តីទី កងទ័ពជើងគោក។

ឯកឧត្តម ពៅ សុខា បន្តថា៖ វគ្គហ្វឹកហ្វឺនបំប៉នជំនាញកាំភ្លើងធំធុន ១២២ មីលីម៉ែត្រ ចែកចេញជាពីរថ្នាក់ គឺកាំភ្លើងធំ 122mm-D30 និងកាំភ្លើងធំ 130mm-M46 ។ ថ្នាក់កាំភ្លើងធំ 122mm-D30 មានកម្មសិក្សាការី និងយោធាចារ្យ ចំនួន ៥៤នាក់ និង ថ្នាក់កាំភ្លើងធំ 130mm-M46 មានកម្មសិក្សាការី និងយោធាចារ្យចំនួន ៥៤នាក់ ។ ការងារហ្វឹកហ្វឺនពេលវេលារយៈពេលរួម ៣ ខែ ចាប់ពីថ្ងៃទី០៦ ខែឧសភា ឆ្នាំ២០២៣ ដល់ ថ្ងៃទី០៤ ខែសីហា ឆ្នាំ២០២៣ ៕

ប្រភព ៖ កងទ័ពជើងគោក