កង់បេរ៉ា៖​ ខណៈពេលដែលរដ្ឋាភិបាលអូស្តា្រលីកំពុងព្យាយាមដើម្បីឱ្យមានការគាំទ្រចំពោះការដាក់បញ្ចូលក្រុមប្រឹក្សា​ជនជាតិដើមភាគតិចនៅក្នុងរដ្ឋធម្មនុញ្ញ មុនការបោះឆ្នោតប្រជាមតិក្នុងរយៈពេលប្រហែលប្រាំមួយសប្តាហ៍ខាងមុខនេះ ស្រាប់តែការស្ទង់មតិរបស់កាសែតមួយកាលពីថ្ងៃចន្ទបានបង្ហាញថា ជាងពាក់កណ្តាល​នៃ​ប្រជាជនអូស្ត្រាលីមិនគាំទ្រសំណើនេះឡើយ​។

ការស្ទង់មតិព័ត៌មានចុងក្រោយបង្អស់ដែលធ្វើឡើងដោយកាសែតអូស្ត្រាលីបានបង្ហាញថា ការគាំទ្រឱ្យ​មា​ន​​គណៈកម្មាធិការជនជាតិដើមភាគតិចដើម្បីផ្តល់យោបល់ដល់សភា​ពីបញ្ហាដែលប៉ះពាល់ដល់ពួកគេ ​មានអ្ន​កបោះឆ្នោតគាំទ្រត្រឹមតែ ៣៨ ភាគរយប៉ុណ្ណោះ។ ចំណែកប្រហែល ៥៣ ភាគរយនឹងជំទាស់លើសំណើនេះ​។

ប្រាំមួយសប្តាហ៍មុនពេលបោះឆ្នោតប្រជាមតិនៅថ្ងៃទី ១៤ ខែតុលាខាងមុខ ប្រទេសអូស្ត្រាលីកំពុងប្រឈមមុខនឹ​ងបញ្ហាចម្បងមួយដែលរកដំណោះស្រាយមិនទាន់ចេញ គឺនៅពេលដែលពួកគេ​ត្រូវបានចោទសួរថាតើគួរគាំទ្រការកែប្រែរដ្ឋធម្មនុញ្ញដើម្បីបង្កើតគណៈកម្មាធិការជនជាតិដើមដើម្បីផ្តល់យោបល់ដល់សភាសហព័ន្ធឬអត់។

ការបោះឆ្នោតប្រជាមតិទាមទារសំឡេងភាគច្រើន​ ក៏ដូចជាសំឡេងភាគច្រើននៅក្នុងរដ្ឋយ៉ាងតិចបួនក្នុងចំ​ណោមរដ្ឋទាំងប្រាំមួយ ដើម្បីផ្លាស់ប្តូររដ្ឋធម្មនុញ្ញ ហើយចាប់តាំងពី​ទទួលបានឯករាជ្យ ក្នុងឆ្នាំ ១៩០១មក  អូស្ត្រាលីមានប្រវត្តិកែប្រែររដ្ឋធម្មនុញ្ញប្រាំបីដងក្នុងចំណោមសំណើចំនួន ៤៤ដង។

រដ្ឋាភិបាលកំពុង​ស្ថិត​ក្រោម​សម្ពាធ​ក្នុង​ការ​កែលម្អ ​​សារ​របស់​ខ្លួន​ចំពេល​ការ​គាំទ្រមាន​ការ​ធ្លាក់​ចុះ​ជា​លំដាប់​ក្នុ​ងការបោះឆ្នោតសម្រាប់​ប្រជាមតិ។ ជាមួយគ្នានេះ ការស្ទង់មតិក៏បានបង្ហាញថាការគាំទ្រចំពោះ លោក Anthony Albanese បានស្ថិតក្នុងភាពអវិជ្ជមានជាលើកដំបូងចាប់តាំងពីលោកបានក្លាយជានាយករដ្ឋមន្ត្រីនៃប្រទេសមួយនេះកាលពីឆ្នាំមុន។

លើសពីនេះ ការគាំទ្រសម្រាប់គណបក្សប្រឆាំងចម្រុះអភិរក្សបានកើនឡើងដល់កម្រិតខ្ពស់បំផុតចាប់តាំងពីការបោះឆ្នោតខែឧសភាឆ្នាំ ២០២២៕

ប្រែសម្រួល៖ស្រ៊ុន សិរីវឌ្ឍនៈ

ប្រភព៖ More than half of Australians oppose Indigenous panel in constitution, poll shows