ភ្នំពេញ៖អ្នកប្រដាល់គុនខ្មែរព្រុំ សំណាង បានអះអាងថា ជំនួប ប្រកួតជាមួយ ស្តេចប្រដាល់ភូមា ដាវ លីឌុច នៅទឹកដីកម្ពុជា លោក ពុំមាន អារម្មណ៍ភ័យខ្លាចនោះទេ។លោក មានក្តីសង្ឈឹមឈ្នះ ច្រើន ថែមទៀតផង។

កីឡាករគុនខ្មែរ ព្រុំ សំណាង ម្ចាស់មេដាយមាសកីឡាស៊ីហ្គេម លើក ទី៣២ ឆ្នាំ២០២៣ នឹងត្រូវជួបស្តេចប្រដាល់ភូមា កីឡាករ ដាវ លីឌុច ក្នុងជំនួបមិត្តភាពអន្តរជាតិនៅលើទឹកដីប្រទេសកម្ពុជា នៅថ្ងៃទី៥ ខែ វិច្ឆិកាខាងមុខ នាសង្វៀនប្រដាល់គុនខ្មែរស្ថានីយទូរទស្សន៍ ក្នុង ស្រុក មួយ។
ប្រាប់ទូរទស្សន៍អប្សរា នៅកន្លែងហ្វឹកហាត់ កីឡាករ ព្រុំ សំណាង បាន និយាយថា ការជួបស្តេចប្រដាល់ភូមា ដាវ លីឌុច រូបគាត់មិនមាន ក្តីបារម្ភ អ្វីទេ ព្រោះលោកក៏បានហ្វឹកហាត់ត្រៀមខ្លួនបានយ៉ាងល្អដែរ។ កីឡាករ ព្រុំ សំណាងលើកឡើងទៀតថា ចំពោះស្តេចប្រដាល់ ដាវ លីឌុច បើតាមរយៈវីដេអូប្រកួតកន្លងមក កាលពីដាវ លីឌុចប៉ះកីឡាករ ប្រដាល់ ទួន ទួនមីន ដែលធ្លាប់ប៉ះរូបគាត់ កាលពីកំលុងស៊ីហ្គេម ក្បាច់របស់កីឡាករ ដាវ លីឌុច ហាក់មិនលើសទួន ទួនមីននោះទេ ពោលកាលពីទួន ទួនមីន ប៉ះរូបគាត់ គឺនូវតែគាត់យកឈ្នះបាន។
កីឡាករវ័យ៣៨ឆ្នាំរូបនេះ បានអះអាងថា សម្រាប់ជំនួប នៅថ្ងៃទី៥ ខែ វិច្ឆិកា ខាងមុខនេះ ការរំពឹងទុកចំពោះក្តីសង្ឃឹម ឈ្នះនៅ តែមានច្រើន ដ្បិតរូបគាត់កាន់តែមានកម្លាំងចិត្ត ព្រោះជំនួប គ្នារវាង ស្តេចប្រដាល់ ដាវ លីឌុច និងរូបលោក ទទួលបានការសាទរពីនាយក រដ្ឋមន្រ្តីថ្មីរ បស់ព្រះរាជណាចក្រកម្ពុជា។ ខណៈលោកជាកីឡាករតំណាងប្រទេសកម្ពុជា លោក និងប្រឹងប្រែង ហ្វឹកហាត់ពង្រឹងសមត្ថភាព និងប្រកួតឱ្យ អស់ពីលទ្ធភាព ដើម្បីលើកមុខ មាត់គុនខ្មែរ និងកេត្យានុភាពគុនខ្មែរលើឆាកអន្តរជាតិ។
ដោយឡែក លោក ជា ស្រួច អតីតកីឡាករប្រដាល់គុនខ្មែរ ក៏បានបង្ហាញនូវការព្យាករថា ជំនួបរវាងអ្នកប្រដាល់ទាំងពីរនេះ ភាគរយៈឈ្នះមាន៥០ភាគរយដូចគ្នា ព្រោះម្នាក់ល្អកណ្តាប់ដៃ និង ម្នាក់ល្អជង្គង់។ ប៉ុន្តែការប្រកួតតាមលក្ខខណ្ឌគុនខ្មែរមួយ ទឹក៩នាទី ភាគរយៈឈ្នះអាចនឹងកីឡាករ ព្រុំ សំណាង មានច្រើនជាង ព្រោះ កីឡាករ ដាវ លីឌុច អាចនិងបែកដោយផ្លែកែងរបស់ព្រុំ សំណាង។
សូមជម្រាបថា ជំនួបប្រកួតរវាងព្រុំ សំណាង និងស្តេច ប្រដាល់ ដាវ លីឌុច នឹងធ្វើឡើងនៅលើទឹកដីប្រទេសកម្ពុជានៅថ្ងៃទី៥ ខែ វិច្ឆិកា ឆ្នាំ២០២៣ ក្នុងលក្ខខណ្ឌវាយច្បាប់គុនខ្មែរមួយទឹកមាន៩នាទី គ្មាន អ្នកសន្លប់ លទ្ធផលស្មើគ្នា។
គួររំលឹកថា បើតាមផេកផ្លូវការរបស់ស្តេចប្រដាល់ភូមា ដាវ លីឌុច បានបង្ហោះថា ប៉ះព្រុំ សំណាង ហើយរូបគាត់នឹងចូលនិវត្តន៍ ពីអាជីពប្រដាល់ ៕
រូបភាព៖ ងីម ឆៃហួត អត្ថបទៈ ជាវ ចន្ធូ