គូឡាឡាំពួ៖ដើម្បីរក្សាសន្តិភាព និងស្ថេរភាព ម៉ាឡេស៊ី និងចិន ត្រូវតែបើកចំហរជាមួយគ្នាក្នុងការចរចា​ពីបញ្ហាសមុ​ទ្រចិ​នខាងត្បូង។នេះបើតាមប្រសាសន៍របស់លោក អានវ៉ា អ៊ីប្រាហ៊ីម(Anwar Ibrahim )នាយករដ្ឋ​មន្ត្រីរបស់ប្រទេសម៉ាឡេស៊ី ក្នុ​ងជំនួបជាមួយសមភាគីចិន លោក លី ឈាង (Li Qing)​ នៅទីក្រុងណានជីង កាលពីថ្ងៃអាទិត្យទី១៧ ខែកញ្ញា ។​

បើតាមការចុះផ្សាយរបស់ទីភ្នាក់ងារសារព័ត៌មាន Bernama លោកនាយករដ្ឋមន្ត្រី អានវ៉ា បានធ្វើទស្សនកិច្ចទៅកាន់ភាគខាងត្បូងប្រទេសចិនសម្រាប់រយៈពេល១៤ម៉ោង។ក្នុងនោះ លោកបានចូលរួមពិព័រណ៍អាស៊ាន-ចិនលើកទី២០ ដោយបានណែនាំពីផលិតផលក្នុងស្រុករបស់ម៉ាឡេស៊ី ទៅកាន់ទីផ្សារចិន ព្រមទាំងលើកឡើង​ពីការវិនិយោគក្នុងក្របខ័ណ្ឌចិន-អាស៊ាន ផងដែរ។​

លោកនាយករដ្ឋមន្ត្រីក៏បានធ្វើជាសាក្សី ក្នុងការចុះហត្ថលេខាលើអនុស្សរណៈ​យោគយល់​ចំនួនបី​ដែលមា​នតម្លៃជិត ២០ ពាន់លានរីងជីត (៥.៨ ពាន់លានដុល្លារសិង្ហបុរី) និងបានជួបប្រជុំចង្អៀត​ជាមួយក្រុមហ៊ុន​បច្ចេកវិទ្យាយក្ស ហួវៃ(Huawei) និងក្រុមហ៊ុនទំនាក់ទំនង និងសំណង់ចិនផងដែរ។​

បើយោងតាមទីភ្នាក់ងារសារព័ត៌មានស៊ីនហួ លោក លី បាននិយាយថា ប្រទេសចិនបានត្រៀមខ្លួនរួចជាស្រេ​ចដើម្បីធ្វើការកាន់តែជិតស្និទ្ធជាមួយប្រទេស​ម៉ាឡេស៊ី ក្នុងការរក្សាសន្តិភាពនៅសមុទ្រចិនខាងត្បូង កា​រពារក្របខ័ណ្ឌកិច្ចសហប្រតិបត្តិការក្នុងតំបន់ដែលផ្តោតលើអាស៊ាន និងជំរុញការចរចាតំបន់​ពាណិជ្ជ​ក​ម្ម​សេរីចិន-អាស៊ាន ៣.០ ដើម្បីជួយសម្រួលដល់សមាហរណកម្មសេដ្ឋកិច្ចក្នុងតំបន់។​

ក្នុងអំឡុងពេលកិច្ចប្រជុំទ្វេភាគីរបស់មេដឹកនាំទាំងពីរនៅរមណីយដ្ឋាន លី យ៉ាន(Li Yuan) ភាគីទាំងពីរ​ក៏បានពិ​ភាក្សាអំពីស្ថានភាពនៅក្នុងប្រទេសមីយ៉ាន់ម៉ា និងការធ្វើមាតុភូមិនិវត្តន៍ជន​ភៀសខ្លួន​រ៉ូហ៊ីនយ៉ាផងដែរ។​

ទាក់ទិននឹងបញ្ហាជនភៀសខ្លួននេះ លោក អានវ៉ា បាននិយាយនៅក្នុងសេចក្តីថ្លែងការណ៍មួយថា ៖ «នាយករដ្ឋមន្ត្រី លី បានចែករំលែក​គំនិតនៃ​សហគមន៍មួយសម្រាប់អនាគតរួមគ្នាសម្រាប់មនុស្សជាតិ ដែលស​ង្កត់ធ្ងន់លើ​គោលការណ៍​បើកចំហរ អរិយធម៌ បរិយាប័ន្ន និងការគោរពគ្នាទៅវិញទៅមកក្នុង​ការដោះស្រា​យ​ជាមួយកិច្ច​សហប្រតិបត្តិការទ្វេភាគីតំបន់ និងអន្តរជាតិ»។

លើសពីនេះទៅទៀត លោក អានវ៉ា  ក៏បានអញ្ជើញលោក លី​ និងប្រធានាធិបតីចិន លោក ស៊ី ជីនភីង (Xi Jinping)​ មកបំពេញទស្សនកិច្ចនៅ​ប្រទេសម៉ាឡេស៊ីក្នុងឆ្នាំ ២០២៤​ខាងមុខ​ ដើម្បីរំលឹកខួប៥ ទ​សវ​ត្សរ៍នៃ​ទំនាក់ទំនង​ការទូតរវាង​ប្រទេសទាំងពីរ ខណៈដែលខួបលើកទី ៥០ នៃទំនាក់ទំនងការទូតម៉ាឡេស៊ី​-ចិនកំពុង​ត្រូវ​បានគ្រោងទុករួមគ្នា ហើយសកម្មភាពផ្សេងៗនឹងត្រូវធ្វើឡើងនៅក្នុងប្រទេសម៉ាឡេស៊ី និង​ប្រ​ទេសចិនផងដែរ។

ជាមួយគ្នានេះ លោក លី បាននិយាយថា ប្រទេសចិននឹងយកថ្ងៃគម្រប់ខួបនេះជាឱកាសដើម្បី​ធ្វើការជាមួ​យ​​ម៉ាឡេស៊ី ដើម្បីបន្ត និងពង្រឹងចំណងមិត្តភាពរវាងប្រទេសទាំងពីរពីមួយ​ជំនាន់ទៅមួយជំនាន់។

លោកបានបន្ថែមថា ប្រទេសចិនបានត្រៀមខ្លួនរួចជាស្រេចដើម្បីធ្វើការលើគម្រោងកិច្ចសហ​ប្រតិបត្តិការចិ​ន-ម៉ាឡេស៊ីដែលលេចធ្លោដូចជា ប្រទេសពីរ មានសួនឧស្សាហកម្មតែមួយ​ និងផ្លូវរថភ្លើង East Coast Rail Link ជាដើម​ ខណៈពេលចិនក៏កំពុងស្វែងរកកិច្ចសហប្រតិបត្តិការ​ទ្វេភាគី​នៅក្នុងតំបន់ផ្សេងទៀត៕​

ប្រែសម្រួល៖កែវ បុស្បា

ប្រភព៖ Malaysia, China to have open communication over South China Sea issue: Anwar